Garvita Odia
ନୂଆଦିଲ୍ଲୀ: ବିଶ୍ବର କୌଣସି ଶକ୍ତି ଜାମ୍ମୁ-କାଶ୍ମୀରରେ ୩୭୦ ଧାରାକୁ ପୁନଃ ଲାଗୁ କରିପାରିବ ନାହିଁ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି। ଧାରା ୩୭୦କୁ ପୁନଃ ଲାଗୁ କରିବା ଲାଗି ଏକ ପ୍ରସ୍ତାବ ଜାମ୍ମୁ-କାଶ୍ମୀର ବିଧାନସଭାରେ ଗୃହୀତ ହୋଇଥିବାବେଳେ ମୋଦୀ ଶୁକ୍ରବାର ଏପରି କହିଛନ୍ତି। ନ୍ୟାସନାଲ କନଫରେନ୍ସ (ଏନସି) ଓ କଂଗ୍ରେସ ମେଣ୍ଟ ସରକାର ଜାମ୍ମୁ-କାଶ୍ମୀରରେ ୩୭୦ ଧାରାକୁ ପୁନର୍ବାର ଲାଗୁ କରିବା ସମ୍ପର୍କରେ ଏକ ପ୍ରସ୍ତାବ ଗୃହୀତ କରିଛନ୍ତି। ଗୃହୀତ ପ୍ରସ୍ତାବ ଅନୁଯାୟୀ ଏହି ପ୍ରସଙ୍ଗରେ ଜାମ୍ମୁ-କାଶ୍ମୀରର ନିର୍ବାଚିତ ପ୍ରତିନିଧି କେନ୍ଦ୍ର ସରକାରଙ୍କ ସହ ଆଲୋଚନା କରିବେ। ଜାମ୍ମୁ-କାଶ୍ମୀର ବିଧାନସଭାରେ ଗୃହୀତ ହୋଇଥିବା ଏପରି ପ୍ରସ୍ତାବକୁ ମୋଦୀ ନିନ୍ଦା କରିଛନ୍ତି। ମହାରାଷ୍ଟ୍ର ନାଗପୁରରେ ନିର୍ବାଚନ ପ୍ରଚାର ରାଲିରେ ଯୋଗ ଦେଇ ମୋଦୀ କଂଗ୍ରେସ ନେତୃତ୍ବ ‘ଇଣ୍ଡି’ ମେଣ୍ଟକୁ ସମାଲୋଚନା କରିବାକୁ ଯାଇ କହିଛନ୍ତି ଯେ ବିଶ୍ବର କୌଣସି ଶକ୍ତି ଜାମ୍ମୁ-କାଶ୍ମୀରରେ ଧାରା ୩୭୦କୁ ପୁନଃ ଲାଗୁ କରିପାରିବ ନାହିଁ। ‘ଇଣ୍ଡି’ ମେଣ୍ଟ ସମ୍ବିଧାନକୁ ଜାମ୍ମୁ-କାଶ୍ମୀର ବାହାରକୁ ଆଣିବାକୁ ଉଦ୍ୟମ କରୁଛି। ଧାରା ୩୭୦ ଉଚ୍ଛେଦ ଦ୍ବାରା ଜାମ୍ମୁ-କାଶ୍ମୀର ଭାରତର ସମ୍ବିଧାନ ପ୍ରଣୀତ ନୀତି ନିୟମ ଦ୍ବାରା ପରିଚାଳିତ ହେଉଛି। ଏବେ ଏହି ଧାରାକୁ ପୁନଃ ଲାଗୁ କରିବାକୁ ‘ଇଣ୍ଡି’ ମେଣ୍ଟ ଯେଉଁ ଯୋଜନା କରିଛି ତାହା ସମ୍ବିଧାନ ବିରୋଧୀ। ତେଣୁ ଭୋଟରମାନେ ‘ଇଣ୍ଡି’ ମେଣ୍ଟର ସମ୍ବିଧାନ ବିରୋଧୀ କାର୍ୟ୍ୟ ପ୍ରତି ସତର୍କ ରହିବା ଦରକାର। ମୋଦୀ କହିଛନ୍ତି ଯେ ସେ ଥିବା ପର୍ୟ୍ୟନ୍ତ ଜାମ୍ମୁ-କାଶ୍ମୀରରେ କୌଣସି କ୍ଷତି ପହଞ୍ଚାଇବାକୁ କଂଗ୍ରେସ ସଫଳ ହୋଇପାରିବ ନାହିଁ। ଏଠାରେ ଭୀମରାଓ ଆମ୍ବେଦକରଙ୍କ ସମ୍ବିଧାନ ପ୍ରଣୀତ ଶାସନ ହିଁ ଚାଲିବ। ନିର୍ବାଚନ ପ୍ରଚାର ସଭାରେ ମୋଦୀ କହିଥିଲେ ଯେ ମହା ବିକାଶ ଅଘାଡି (ଏମଭିଏ) ମେଣ୍ଟର ସମସ୍ତ ନେତା ମୁଖ୍ୟମନ୍ତ୍ରୀ ହେବାକୁ ଆଶାୟୀ। ସେମାନେ ମହାରାଷ୍ଟ୍ରକୁ ଲୁଟିବାକୁ ଚାହୁଁଛନ୍ତି। ସେ କହିଛନ୍ତି ଯେ ଏମଭିଏ ମେଣ୍ଟ ଏକଗାଡି ଯାହାର ଚକ କି ବ୍ରେକ ନାହିଁ। ମାତ୍ର ଚକ ଓ ବ୍ରେକ ନଥିବା ଏହି ଗାଡିର ଡ୍ରାଇଭର ହେବାକୁ ସମସ୍ତେ ଆଗ୍ରହୀ। କାରଣ ଏହି ମେଣ୍ଟର କିଏ ମୁଖ୍ୟମନ୍ତ୍ରୀ ପ୍ରାର୍ଥୀ ତାହା ସ୍ଥିର ହୋଇପାରି ନାହିଁ। କଂଗ୍ରେସ, ଶିବସେନା(ୟୁବିଟି) ଓ ଏନସିପି (ଏସ୍ପି)କୁ ନେଇ ଏମଭିଏ ମେଣ୍ଟ ଗଠନ ହୋଇଛି। ଏହି ମେଣ୍ଟ ବିଜେପି-ଶିବସେନା-ଏନସିପିକୁ ନେଇ ଗଠିତ ମହାୟୁତି ମେଣ୍ଟ ସହିତ ନିର୍ବାଚନ ଲଢୁଛି। ନଭେମ୍ବର ୨୦ରେ ମହାରାଷ୍ଟ୍ରରେ ଭୋଟ ଗ୍ରହଣ ହେବ।
