Garvita Odia
ଭୁବନେଶ୍ବର: ଖୋର୍ଦ୍ଧା ଜିଲ୍ଲାରେ ଶିଳ୍ପ ସମୁହର ଶିଳାନ୍ୟାସ କଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ବିଜେପି ସରକାର ଆସିବା ପରେ ଜାନୁଆରୀରେ ଉତ୍କର୍ଷ ଓଡ଼ିଶାରେ ନିବେଶକାରୀଙ୍କ ସହ ଶିଳ୍ପ ପାଇଁ ଏମ୍ଓୟୁ କରିଥିଲେ ରାଜ୍ୟ ସରକାର । ଆଉ ତିନି ମାସ ଭିତରେ ଶିଳ୍ପ ପ୍ରକଳ୍ପର ଗ୍ରାଉଣ୍ଡେଡ ଆରମ୍ଭ ହୋଇଛି । ଗୁରୁବାର ପ୍ରଥମ ପର୍ୟ୍ୟାୟରେ ମୁଖ୍ୟମନ୍ତ୍ରୀ ଖୋର୍ଦ୍ଧା ହଳଦୀପଦା ଠାରେ ୧୩ ଶିଳ୍ପ ପାଇଁ ଭିତ୍ତିପ୍ରସ୍ତର କରିବା ସହ ଗୋଟିଏ ଶିଳ୍ପର ଶ୍ରୀ ଗଣେଶ କରିଛନ୍ତି । ଏହି ଶିଳ୍ପ ସମୁହରେ ପ୍ରାଥମିକ ପର୍ୟ୍ୟାୟରେ ୬ ହଜାର କୋଟି ନିବେଶ ହେବା ସହ ୩୭ ହଜାର ନିଯୁକ୍ତି ସୃଷ୍ଟି ହେବ । ଏହାସହ ଶ୍ରମିକ ମାନଙ୍କ ଲାଗି ଦୀନ ଦୟାଲ କର୍ମଚାରୀ ଆବାସ ଯୋଜନାରେ ୩ ଶହ କୋଟି ବ୍ୟୟରେ ଶ୍ରମିକ ଆବାସ ଗୃହର ଭିତ୍ତିପ୍ରସ୍ତର ସ୍ଥାପନ କରିଛନ୍ତି ମୁଖ୍ୟମନ୍ତ୍ରୀ ।
ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ପୂର୍ବ ସରକାରରେ ମେକ୍ ଇନ୍ ଓଡ଼ିଶାରେ ପ୍ରଚାର ପ୍ରବଳ ହେଉଥିଲା ଗ୍ରାଉଣ୍ଡେଡ ଦୁର୍ବଳ ଥିଲା । ଆମ ଡବଲ ଇଞ୍ଜିନ ସରକାର ସମୟରେ ମୋଦିଙ୍କ ଗ୍ୟାରେଣ୍ଟି ଯୋଗୁ ଆମେ ଶିଳ୍ପ ପାଇଁ କେବଳ ଏମ୍ଓୟୁ ନୁହେଁ ଶିଳ୍ପକୁ ଗ୍ରାଉଣ୍ଡେଡ କରିପାରିଛୁ । ଉତ୍ସବରେ ଶିଳ୍ପମନ୍ତ୍ରୀ ସମ୍ପଦ ସ୍ବାଇଁ ରାଜ୍ୟ ସରକାରଙ୍କ ଶିଳ୍ପ ଅନୁକୂଳ ବାତାବରଣ ଶିଳ୍ପପତି ମାନଙ୍କୁ ଭିତ୍ତିଭୂମି ଯୋଗାଇଦେବା ଯୋଗୁ ଶିଳ୍ପ ଖୋଲିବା ସମ୍ଭବ ହୋଇପାରିଛି ବୋଲି କହିଛନ୍ତି ।
ଖୋର୍ଦ୍ଧା ହଳଦୀପଦାରେ ଜିପିଟର ଟାଟ୍ରାଉଗୋଙ୍କା ରେଲହୁଇଲ ଫ୍ୟାକ୍ଟି ପ୍ରାଇଭେଟ୍ ଲିମିଟେଡ୍ ଟ୍ରେନ୍ ତିଆରି ପାଇଁ ଯନ୍ତ୍ରାଂଶ ତିଆରି କରିବ । ପ୍ରକଳ୍ପ ପୁରା ହେବାବେଳକୁ ୩ ହଜାର କୋଟି ନିବେଶ କରିବ କମ୍ପାନୀ । ଦେଶର ରେଳ ତିଆରି କ୍ଷେତ୍ରରେ ଯନ୍ତ୍ରାଂଶ ଲାଗିବା ସହ ବିଦେଶକୁ ମଧ୍ୟ ପଠାଯିବ । ସେହିପରି ଭୁବନେଶ୍ବରୀ ଫୁଟ୍ସ ଆଣ୍ଡ୍ ବେଭରେଜେସ୍ ପ୍ରାଇଭେଟ୍ ଲିମିଟେଡ୍ କମ୍ପାନୀର ଶିଳାନ୍ୟାସ ହୋଇଥିବା ବେଳେ ସେଥିରେ ୧୨ ଶହ କୋଟି ନିବେଶ କରିବ କମ୍ପାନୀ । ଏହା ସହ ସାଲିମର ଗ୍ଲାସ ୱାର୍କ ପ୍ରାଇଭେଟ୍ ଲିମିଡେଟ କମ୍ପାନୀର ବି ଶିଳାନ୍ୟାସ ହୋଇଛି । ସ୍ଥାନୀୟ ଅଞ୍ଚଳରେ ନିଯୁକ୍ତି ସୃଷ୍ଟି କରିବା ଲକ୍ଷ୍ୟରେ ଖୋର୍ଦ୍ଧାରେ ଟେକ୍ସଷ୍ଟାଇଲ ପାର୍କ ଉପରେ ସରକାର ଗୁରୁତ୍ବ ଦେଇଛନ୍ତି । ପ୍ରଥମ ପର୍ୟ୍ୟାୟରେ ମିନୁ କ୍ରିଏସନ ଏଲଏଲପି, ପୂଜା ଇଣ୍ଟର ନ୍ୟାଲନାଲ, ନିୟୁ ଟେକ୍ସଷ୍ଟାଇଲ ପାର୍କ ଭଳି କମ୍ପାନି ଗାର୍ମେଣ୍ଟ ତିଆରି କରିବେ । ସେଥିରେ ମହିଳାଙ୍କୁ ପ୍ରଶିକ୍ଷଣ ଦିଆଯାଇ ନିଯୁକ୍ତି ମିଳିବ ବୋଲି କମ୍ପାନୀ କର୍ତ୍ତୃପକ୍ଷ କହିଛନ୍ତି ।
ଆଜିର କାର୍ୟ୍ୟକ୍ରମରେ ସ୍ଥାନୀୟ ବିଧାୟକ ପ୍ରଶାନ୍ତ ଜଗଦେବ, ଜଟଣୀ ବିଧାୟକ ବିଭୁତି ବଳବନ୍ତରାୟ, ଶିଳ୍ପ ସଚିବ ହେମନ୍ତ ଶର୍ମାଙ୍କ ସମେତ ବିଭାଗୀୟ ଅଧିକାରୀ ମାନେ ଉପସ୍ଥିତ ଥିଲେ । ହଳଦୀପଦା ପରେ ମୁଖ୍ୟମନ୍ତ୍ରୀ ଅରାଙ୍ଗ ଠାରେ ଗୋଲ୍ଡେନ୍ ସିମସ୍ ଇଣ୍ଡଷ୍ଟ୍ରିଜ୍ ପ୍ରାଇଭେଟ୍ ଲିମିଟେଡ୍, ପୂଜା ଇଣ୍ଟରନ୍ୟାସନାଲ, ବି ଏଲ୍ ଇଣ୍ଟରନ୍ୟାସନାଲ ପ୍ରାଇଭେଟ୍ ଲିମିଟେଡ୍ ଓ ରେନ୍ବୋ ଫାବାର୍ଟ ପ୍ରାଇଭେଟ୍ ଲିମିଟେଡ୍ ପକ୍ଷରୁ ନିୟୁ ଟେକ୍ସଟାଇଲ୍ ପାର୍କ ଶିଳାନ୍ୟାସ କରିଥିଲେ ।
