Garvita Odia
ଠିକା ଶ୍ରମିକ ଏବଂ ବି.ଏ କର୍ମଚାରୀଙ୍କୁ ପୁନଃ ନିଯୁକ୍ତି ଦାବି
ଯୋଡା,୧୧/୫ (ରମେଶ ମହାପାତ୍ର)ଟିପି ନର୍ଦର୍ଣ୍ଣ ଓଡିଶା ଡିଷ୍ଟ୍ରିବୁ୍ୟସନ ଲିମିଟେଡ (ଟିପିଏନଓଡିଏଲ) ଅଧୀନରେ କାର୍ଯ୍ୟ କରୁଥିବା ଶ୍ରମିକ ମାନଙ୍କୁ ଛଟେଇ କରାଯିବାର ପ୍ରତିବାଦରେ ଶତାଧିକ ଶ୍ରମିକ ଏକତ୍ରିତ ହୋଇ ଯୋଡା ବୈଦ୍ୟୁତିକ ଖଣ୍ଡ ନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସି ପ୍ରତିବାଦ କରୁଥିବା ଦେଖାଯାଇଛି । ଛଟେଇ ହୋଇଥିବା ଠିକା ଏବଂ ବି.ଏ କର୍ମଚାରୀଙ୍କୁ ପୁନଃ ନିଯୁକ୍ତି ଦାବି ନେଇ ଧାରଣା ଦେଇ ଟାଟା ପାୱାର ବିରୋଧରେ ବିଭିନ୍ନ ସ୍ଲୋଗାନ ଦେଉଥିବା ଦେଖାଯାଇଛି । ଯୋଡା ଗ୍ରୀଡକୋ କାର୍ଯ୍ୟାଳୟ ନିକଟରୁ ପ୍ରାୟ ୨୦୦ ରୁ ଉଦ୍ଧ୍ୱର୍ ଛଟେଇ ଶ୍ରମିକ ଶୋଭାଯାତ୍ରାରେ ବାହାରି ବିଭିନ୍ନ ସ୍ଲୋଗାନ ଦେଇ ନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟ ନିକଟରେ ପହଞ୍ଚି ଧାରଣାରେ ବସିଥିଲେ । ଟାଟା ପାୱାର ଯେତେବେଳେ ନେସ୍କୋକୁ ନେଲା ସେତେବେଳେ ୨୫.୧୭ ଶତକଡା ଏଟି ଆଣ୍ଡ ସି କ୍ଷତି ହେଉଥିଲା । ଏହି ଶ୍ରମିକ ମାନେ ଚ୍ୟାଲେଞ୍ଜିଂ ପରିସ୍ଥିତିରେ ବିଶେଷକରି କ୍ଷେତ୍ର ପରିଚାଳନା, ରକ୍ଷଣାବେକ୍ଷଣ, ଗ୍ରହକ ସେବା,ରାଜସ୍ୱ ସଂଗ୍ରହ ଏବଂ ବିଦ୍ୟୁତ୍ ବଣ୍ଟନ ବ୍ୟବସ୍ଥାକୁ ନିରନ୍ତର ଭାବେ ପରିଚାଳନା କରି ଆସୁଥିଲେ । ଏହି ଶ୍ରମିକ ମାନେ ବହୁ ବାଧାବିଘ୍ନ ସହିତ ନିଜର ନିରନ୍ତର ଭାବେ କାର୍ଯ୍ୟ କରି ଏଟି ଆଣ୍ଡ ସି କ୍ଷତିକୁ ୭.୬୬ ଶତକଡାକୁ ଆଣିବା ଭଳି ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ । କମ ଦରମାରେ ନିଜର କାର୍ଯ୍ୟଦକ୍ଷତା ପ୍ରତିପାଦନ କରିଥିବା ଏହି ଶ୍ରମିକ ମାନଙ୍କୁ ଛଟେଇ ନକରି ପୁନଃ ନିଯୁକ୍ତି ପାଇଁ ଟିପିଏନଓଡିଏଲ ୱାର୍କରସ ଏମ୍ପ୍ଲୋଇଜ ୟୁନାଇଟେଡ ଫୋରମ ଓ ନେସ୍କୋ ପାୱାର ଏମ୍ପ୍ଲୋଇଜ ୟୁନିୟନ ପକ୍ଷରୁ ଏନେଇ ଦାବିପତ୍ର ପ୍ରଦାନ କରାଯାଇଛି । କେନ୍ଦୁଝର ଜିଲ୍ଲାର ଶ୍ରମିକଙ୍କ ସ୍ୱାର୍ଥ ସହିତ ଉତ୍ତର ଓଡିଶାରେ ବିଦୁ୍ୟତ ବଣ୍ଟନ ଦାୟିତ୍ୱରେ ଥିବା ଟାଟା ପାୱାର ଅଧୀନରେ କାର୍ଯ୍ୟ କରୁଥିବା ସମସ୍ତ ଶ୍ରମିକଙ୍କ ବୃହତ ସ୍ୱାର୍ଥକୁ ଦୃଷ୍ଟିରେ ରଖି ତୁରନ୍ତ ପଦକ୍ଷେପ ଗ୍ରହଣ କରାଯାଉ ବୋଲି ଯୋଡା ଡିଭିଜନ ଆସିଷ୍ଟାଣ୍ଡ ଡିଭିଜନ ସେକ୍ରେଟେରୀ ତପିନ୍ଦ୍ର କୁମାର ବାରିକ କହିଛନ୍ତି । ଏନେଇ ସଞ୍ଜୟ କୁମାର ବାରିକ କହିଛନ୍ତି ଯେ,ଟିପିଏନଓଡିଏଲ ଅଧୀନରେ ଆଉଟସୋର୍ସିଂ ବି.ଏ କର୍ମଚାରୀଙ୍କୁ ଛଟେଇ ବନ୍ଦ କରି ତୁରନ୍ତ ପୁନଃ ନିଯୁକ୍ତି ପ୍ରଦାନ କରାଯାଉ । ଓଡିଶାର ଶ୍ରମିକଙ୍କୁ ଶୋଷଣ ସହ ଛଟେଇ କରି ବାହାର ରାଜ୍ୟରୁ ଶ୍ରମିକ ଆଣିବା ଘଟଣାକୁ ନିନ୍ଦା କରିବା ସହିତ ଶ୍ରମିକ ମାରଣନୀତି ବିରୋଧରେ ସ୍ୱର ଉତ୍ତୋଳନ କରାଯାଉଛି ବୋଲି ପ୍ରକାଶ କୁମାର ଜେନା କହିଥିଲେ । ଏନେଇ ଶ୍ରମିକ ମାନେ ଯୋଡା ବୈଦ୍ୟୁତିକ ଖଣ୍ଡ ନିର୍ବାହୀ ଯନ୍ତ୍ରୀ ଇଂ ସୁଜିତ କୁମାର ରଥକୁ ଦାବିପତ୍ର ପ୍ରଦାନ କରିଥିଲେ । ଦାବିପତ୍ରକୁ ଉପରିସ୍ଥ ଅଧିକାରୀଙ୍କୁ ପଠାଇବା ସହ ଏସଂକ୍ରାନ୍ତରେ ଆଲୋଚନା କରିବେ ବୋଲି ଶ୍ରୀ ରଥ ପ୍ରକାଶ କରିଥିଲେ ।
