ଟ୍ରାଫିକ ଛକରେ ଗ୍ରୀନ ସେଡ

ଭୁବନେଶ୍ବର: ଟାଇଁ ଟାଇଁ ଖରା ସହି ହେଉନି । ତାତି ଅସହ୍ୟ ହେଉଥିବା ବେଳେ ଖରାରେ ବାହାରକୁ ବାହାରିଲେ ମୁଣ୍ଡ ଝାଇଁଝାଇଁ ହୋଇଯାଉଛି । ଏଣେ ଗରମ ସାଙ୍ଗକୁ ଗୁଳୁଗୁଳି କଲବଲ କରୁଛି । ରାଜଧାନୀ ବି ତାତିରୁ ବାଦ ପଡିନି । ଏତେ ଖରାରେ ଟ୍ରାଫିକ ପୋଷ୍ଟ ଉପରେ ଅଟକିବା ଲୋକଙ୍କ ପାଇଁ ଟେନସନ ହୋଇଛି । ଗ୍ରୀଷ୍ମ ପ୍ରବାହରେ ଲୋକଙ୍କ ପାଇଁ ଛାଇ ଦେବାକୁ ତଥା ଯାତ୍ରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ଟ୍ରାଫିକ ଛକରେ ବିଏମସି ଗ୍ରୀନ ସେଡ ବ୍ୟବସ୍ଥା କରିଛି । ଯେଉଁଠି ଲୋକଙ୍କୁ କିଛି ମାତ୍ରାରେ ଛାଇ ମିଳିବ ।
ଭୁବନେଶ୍ୱର ଭିଡ଼ ଭିତରେ ଟ୍ରାଫିକ ଉପରେ ଟିକିଏ ଅଟକି ଗଲେ ପଛକୁ ପଛ ଗାଡ଼ିର ଲମ୍ବା ଲାଇନ ଲମ୍ବି ଯାଉଛି । ଏସବୁ ଭିତରେ ଦୁଇ ଚକିଆ ଓ ସାଇକେଲ ଆରୋହିଙ୍କ ନାହିଁ ନଥିବା ସମସ୍ୟା ହେଉଛି । କାରଣ ମୁଣ୍ଡଫଟା ଖରାରେ ମିନିଟିଏ ଠିଆ ହେବା କାଠିକର ପାଠ ହେଉଛି । ଏତେ ଖରାରେ ଟ୍ରାଫିକରେ ଠିଆ ହେବ ବଡ଼ ମୁସ୍କିଲ ହେଉଛି । ମୁହଁରେ କପଡା ବାନ୍ଧିଥିଲେ ବା ହେଲମେଟ ଥିଲେ ମଧ୍ୟ ଖରାର ପ୍ରକୋପ ସହିବା ସମ୍ଭବ ହେଉନାହିଁ । ଦେହରୁ ଗମ୍‌ଗମ୍‌ ଝାଳ ବାହାରିବା ସହ ଅସହ୍ୟ ତାତିରେ ଠିଆ ହୋଇଗଲେ ପୁରା ଅସ୍ବଭାବିକ ଭଳି ପରିସ୍ଥିତି ଉପୁଜି ଯାଉଛି । ବ୍ୟସ୍ତ ବହୁଳ ଟ୍ରାଫିକ ଛକରେ ଯାତ୍ରୀଙ୍କ ସୁରକ୍ଷା ପାଇଁ ହୋଇଛି ଅସ୍ଥାୟୀ ସେଡର ବ୍ୟବସ୍ଥା ।
ଭୁବନେଶ୍ୱର ମେୟର ସୁଲୋଚନା ଦାସ କହିଛନ୍ତି, “ଖୁବଶୀଘ୍ର ସ୍ଥାୟୀ ସେଡ୍‌ ଲାଗିଯିବ । ଅନ୍ୟ ଛକରେ ଟେଣ୍ଟ ହାଉସ ବାଲାଙ୍କୁ କହିଦେଇଛୁ, ସେମାନେ କେତକ ଜାଗାରେ କାମ ଆରମ୍ଭ କରିଦେଇଛନ୍ତି । ଏତିକି ତାପମାତ୍ରା ବର୍ତ୍ତମାନ ସହିହେବ । ଆହୁରି ତାପମାତ୍ରା ବଢ଼ିଲେ ବାକି ବ୍ୟବସ୍ଥା କରିବୁ । ସ୍ଥାୟୀ ସେଡ୍‌ କଳିଙ୍ଗ ହସ୍ପିଟାଲ ଛକ ଓ ଏଜି ଛକରେ କରିବା ପାଇଁ ନିଷ୍ପତି ନେଇଛୁ । କଳିଙ୍ଗ ହସ୍ପିଟାଲ ଛକରେ ଯେହେତୁ ମେଟ୍ରୋ ହେବ ସେଥିପାଇଁ ଆମେ ସ୍ଥାୟୀ ସେଡ୍‌ ଷ୍ଟୁଡିଓ ଛକକୁ ସ୍ଥାନାନ୍ତର କରିଛୁ । ପ୍ରଥମେ ଏଜି ଛକ ଓ କଳିଙ୍ଗ ଷ୍ଟୁଡିଓ ଛକରେ ସ୍ଥାୟୀ ସେଡ୍‌ ହେବ । ମେଟ୍ରୋ ଡିଜାଇନ କାମ ପରେ ପରବର୍ତ୍ତି ନିଷ୍ପତି ହେବ । ଏସବୁ ଲୋକଙ୍କ ସୁବିଧା ପାଇଁ କରିଛୁ । ଗତ ବର୍ଷ ମଧ୍ୟ କରାଯାଇଥିଲା ଓ ଲୋକେ ଉପକୃତ ହୋଇଥିଲେ ।”