ନାଟର ଗୋବର୍ଦ୍ଧନ ଅପରାଜିତା

ବେଗୁନିଆ : ଯାହା ଆଶଙ୍କା କରାଯାଉଥିଲା ସେଇଆ ହିଁ ହେଲା । ବେଗୁନିଆ ବିଜେପି ବିଧାୟକ ପ୍ରାର୍ଥୀ ପ୍ରକାଶ ବିଜୁଳି ଓ ଖୋର୍ଦ୍ଧା ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ଭିତରେ ତିକ୍ତତା ଆଉ କେଇପାଦ ଆଗକୁ ଯାଇଛି । ପୂର୍ବରୁ ରାଜନୀତିକ ବିରୋଧ ହେଉଥିବାବେଳେ ଏବେ ତାହା ହିଂସାର ରୂପ ନେଇଛି । ପ୍ରଶାନ୍ତ ଜଗଦ୍ଦେବଙ୍କ ଘନିଷ୍ଠ ସହଯୋଗୀମାନେ ତାଙ୍କ ଉପରେ ଆକ୍ରମଣ କରିଛନ୍ତି ବୋଲି ପ୍ରକାଶ ଆଜି ଥାନାରେ ଏତଲା ବି ଦେଇଛନ୍ତି । ବେଗୁନିଆରେ ଏବେ ବିଜେଡ଼ି ବିଧାୟକ ଥିବାବେଳେ ବିଜେପିର ଗୋଷ୍ଠୀବିବାଦ ପ୍ରଦୀପ ସାହୁଙ୍କୁ ବେଶ୍‌ ସୁହାଇଛି । ସେପଟେ ଗଣେଶଙ୍କୁ ବେଗୁନିଆ-ବୋଲଗଡ଼ ଦାୟିତ୍ୱ ଦେଇ ଅପରାଜିତା ଦଳକୁ ମଜବୁତ୍‌ କରିବାକୁ ଯେଉଁ ଅଙ୍କ କଷିଥିଲେ ତାହା ଭୁଲ୍‌ ହେବା ନିଶ୍ଚିତ ।
ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ସବୁବେଳେ ସୁବିଧାବାଦ ରାଜନୀତି କରନ୍ତି ବୋଲି ପୂର୍ବର ଘନିଷ୍ଠ ସହଯୋଗୀମାନେ ଏହି ପ୍ରତିନିଧିଙ୍କୁ କହିଛନ୍ତି । ୟୁଜ୍‌ ଆଣ୍ଡ ଥ୍ରୋରେ ସେ ବେଶ୍‌ ମାହିର । ପୂର୍ବରୁ ସେ ଋଷଭ ନନ୍ଦଙ୍କୁ ପାନେ ଦେବା ପାଇଁ ପ୍ରକାଶ ବିଜୁଳିଙ୍କୁ ଶକ୍ତିଶାଳୀ କରିଥିଲେ । ଏବେ ପ୍ରକାଶଙ୍କୁ ସାଇଡ୍‌ କରିବା ପାଇଁ ପ୍ରଶାନ୍ତ ଜଗଦ୍ଦେବଙ୍କୁ ସଶକ୍ତ କରିଛନ୍ତି । ନିଜର ସ୍ଥିତି ମଜବୁତ୍‌ ପାଇଁ ଓ ନିଜର ପରିଚୟ ବଢ଼ାଇବା ପାଇଁ ଦଳର ନୀତିନିୟମକୁ ଜଳାଞ୍ଜଳି ଦେବା ଅପରାଜିତାଙ୍କ ପାଇଁ ନୂଆ କଥା ନୁହେଁ । ପୂର୍ବରୁ ସେ ଅଜିତା ଓ ୟୁଥ ଫର ଆକ୍ସନ ନାମରେ ନିଜର ଶକ୍ତି ବଢ଼ାଉଥିଲେ । ଏମିତିକି ସାରା ରାଜ୍ୟରେ କାୟା ବିସ୍ତାର କରିବାକୁ ଚାହୁଁଥିଲେ । ଏନେଇ ପରେ ଆମେ ସବିଶେଷ ଆଲୋଚନା କରିବା ।
ଏବେ ଆସିବା ବେଗୁନିଆ ଆଡ଼କୁ । ପ୍ରଶାନ୍ତ ଜଗଦ୍ଦେବ ଏଥର ରେକଡର଼୍ କରିଛନ୍ତି । ପ୍ରଥମ ନେତା ଭାବେ ସେ ବେଗୁନିଆ, ଚିଲିକା ଓ ଖୋର୍ଦ୍ଧା ଭଳି ତିନି ତିନିଟା ନିର୍ବାଚନମଣ୍ଡଳୀରୁ ବାଜିମାତ୍‌ କରିଛନ୍ତି । ଯେଉଁଥିପାଇଁ ପ୍ରଶାନ୍ତ ହିଁ ଏକମାତ୍ର ନେତା ବୋଲି ସାଂସଦ ମ୍ୟାଡ଼ାମ ଧରି ନେଇଛନ୍ତି । ଖାଲି ସେତିକିନୁହେଁ ପ୍ରଶାନ୍ତଙ୍କୁ ଧରି ସେ ଅସାଧ୍ୟ ସାଧନ କରିପାରିବେ ବୋଲି ଧରି ନେଇଛନ୍ତି । ସିଟୁ ବିଜୁଳି ଭିଡ଼କୁ ନୁହେଁ ବୋଲି ଭାବି ସାଙ୍ଗେସାଙ୍ଗେ ନିଜ ଡାହାଣ ହାତରୁ ପ୍ରକାଶଙ୍କୁ ଫିଙ୍ଗିଦେଇ ଗଣେଶଙ୍କୁ ବସାଇଦେଲେ । ଗଣେଶ ବି ନିଜ ଫାଇଦା ଗୋଟାଇବାରେ ମାହିର । ଆଜ୍ଞା ବିଜେପି ତାଙ୍କୁ ଖୋର୍ଦ୍ଧା ଲଡୁ ଦେଇଥିବାବେଳେ ସାଂସଦ ମ୍ୟାଡ଼ାମ ଯେତେବେଳେ ବେଗୁନିଆ ଲଡୁ ଦେଉଛନ୍ତି ସେ ମଉକାକୁ କିଏ ଛାଡ଼ିବେ କହିଲେ ? ଆଜ୍ଞା ଏତିକିରେ ସରିନି ମ…
କ୍ରମଶଃ… ପୁଣି ଆସନ୍ତାକାଲି ଏଇଠୁ ଆରମ୍ଭ ହେବ