Garvita Odia
ଭୁବନେଶ୍ୱର: ନୂଆବର୍ଷରେ ପଳାଶୁଣି ଛକରେ ମର୍ମନ୍ତୁଦ ସଡକ ଦୁର୍ଘଟଣା। ବାଇକ୍କୁ ଧକ୍କା ଦେଲେ ଘରୋଇ ବସ। ଦୁର୍ଘଟଣାରେ ବାଇକ୍ ଚାଳକ ଆହତ ବେଳେ ମହିଳା ଆରୋହୀ ଗୁରୁତର ଆହତ ହୋଇଛନ୍ତି। ମହିଳାଙ୍କୁ ରକ୍ତାକ୍ତ ଅବସ୍ଥାରେ ଉଦ୍ଧାର କରାଯାଇ ୧୦୮ ଆମ୍ବୁଲାନ୍ସ ଯୋଗେ ମେଡିକାଲକୁ ପଠାଯାଇଥିବା ଜଣାପଡିଛି। ବସ୍ଟି ଦୁର୍ଘଟଣା ଘଟାଇ ଘଟଣାସ୍ଥଳରୁ ଫେରାର ହୋଇଯାଇଥିବା ପ୍ରତ୍ୟକ୍ଷଦର୍ଶୀ ସୂଚନା ଦେଇଛନ୍ତି। ଦୁର୍ଘଟଣା ପରେ ଘଟଣାସ୍ଥଳରେ ଚାପାଉତ୍ତେଜନା ଦେଖିବାକୁ ମିଳିଥିବା ବେଳେ ଟ୍ରାଫିକ୍ ଜାମ୍ ଲାଗି ରହିଛି। ମଞ୍ଚେଶ୍ବର ପୋଲିସ ଘଟଣାସ୍ଥଳରେ ସ୍ଥିତି ନିୟନ୍ତ୍ରଣ କରିବା ତଦନ୍ତ ଆରମ୍ଭ କରିଛି।
ଆଜି ଦିନ ପ୍ରାୟ ୧୧ଟା ବେଳେ କଟକରୁ ମହିଳା ଜଣଙ୍କ ଓଲା ବାଇକ୍ ଯୋଗେ ସହିଦ ନଗର ଆସୁଥିଲେ। ପଳାଶୁଣି ଛକ ନିକଟରେ ଏକ ଘରୋଇ ବସ୍ ଧକ୍କା ଦେଇଥିଲା। ଦୁର୍ଘଟଣା ଫଳରେ ବାଇକ୍ ଚାଳକ ଛିଟିକି ପଡିଥିଲେ। ତାଙ୍କ ଗୋଡ଼ ମାଡ଼ ହୋଇଥିବା ପ୍ରତ୍ୟକ୍ଷଦର୍ଶୀ କହିଛନ୍ତି। ସେହିଭଳି ମହିଳା ଜଣକ ବାଇକ୍ରୁ ଖସିପଡିବାରୁ ତାଙ୍କ ମୁଣ୍ଡ ଡାହାଣ କାନ ମାଡ଼ ହେବାରୁ ସେ ଗୁରୁତର ହୋଇଛନ୍ତି। ତାଙ୍କୁ ସ୍ଥାନୀୟଲୋକ ରକ୍ତାକ୍ତ ଅବସ୍ଥାରେ ଉଦ୍ଧାର କରି ମେଡିକାଲ ପଠାଇଥିବା ଜଣାପଡିଛି। ଘଟଣାସ୍ଥଳରେ ମଞ୍ଚେଶ୍ବର ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିବା ଜଣାପଡ଼ିଛି।
