Garvita Odia
ନୂଆଦିଲ୍ଲୀ : ମଧ୍ୟପ୍ରାଚ୍ୟରେ ଯୁଦ୍ଧ ଘନଘଟା ଜାରି ରହିଲେ ଆଗକୁ ପେଟ୍ରୋଲ ଓ ଡିଜେଲ ଦର ବୃଦ୍ଧି ପାଇବାର ସମ୍ଭାବନା ରହିଛି । ରିଜର୍ଭ ବ୍ୟାଙ୍କ ଅଫ ଇଣ୍ଡିଆର ଗଭର୍ଣ୍ଣର ସଂଜୟ ମାଲହୋତ୍ରା ଏଭଳି ସଂକେତ ଦେଇଛନ୍ତି ।
ଇରାନ୍-ଆମେରିକା ବିବାଦ ଜାରି ରହିଥିବାରୁ ତୈଳ ଯୋଗାଣ ବାଧାପ୍ରାପ୍ତ ହୋଇଛି । ଅଶୋଧିତ ତୈଳ ଦର ହୁହୁ ହୋଇ ବଢ଼ିବାରେ ଲାଗିଛି । ହର୍ମୁଜ ପ୍ରଣାଳୀ ବନ୍ଦ ରହିଥିବାରୁ ବିଶ୍ୱର ବହୁ ଦେଶରେ ତୈଳ ସଂକଟ ସ୍ଥିତି ସୃଷ୍ଟିହୋଇଛି । ଭାରତରେ ୬୦ ଦିନ ପାଇଁ ପର୍ଯ୍ୟାପ୍ତ ତୈଳ ମହଜୁଦ୍ ରହିଛି । କିନ୍ତୁ ଦୀର୍ଘଦିନ ଧରି ଇରାନ୍-ଆମେରିକା ବିବାଦ ଜାରି ରହିଲେ ଭାରତ ବି ବହୁମାତ୍ରାରେ ପ୍ରଭାବିତ ହେବ । ସମ୍ପ୍ରତି ତୈଳ କମ୍ପାନୀଗୁଡ଼ିକ ବହୁ କ୍ଷତି ସହୁଛନ୍ତି ବୋଲି ପୂର୍ବରୁ ପେଟ୍ରୋଲିୟମ୍ ମନ୍ତ୍ରୀ ହରଦୀପ ସିଂହ ପୁରୀ କହି ସାରିଛନ୍ତି । ସମ୍ପ୍ରତି ତୈଳ କମ୍ପାନୀଗୁଡ଼ିକ ପେଟ୍ରୋଲ ଲିଟର ପିଛା ୧୪ ଟଙ୍କା, ଡିଜେଲ ପିଛା ୪୨ ଟଙ୍କା ଓ ଏଲପିଜି ପିଛା ୬୭୪ ଟଙ୍କା କ୍ଷତି ସହୁଛନ୍ତି । ପ୍ରତିଦିନ ତୈଳ କମ୍ପାନୀଗୁଡ଼ିକର କ୍ଷତି ହଜାର କୋଟି ଟପିଗଲାଣି । ଗତ ତିନି ମାସରେ କମ୍ପାନୀଗୁଡ଼ିକ ଲକ୍ଷ ଲକ୍ଷ କୋଟିର କ୍ଷତି ସହିଛନ୍ତି । ଅଶୋଧିତ ତୈଳ ଦର କମୁନଥିବାରୁ ସେମାନଙ୍କର କ୍ଷତି ବଢ଼ିବଢ଼ି ଚାଲିଛି । ସାମଗ୍ରୀକ ଭାବେ ଘଟଣାକୁ ଅନୁଧ୍ୟାନ କଲେ ଆଗକୁ ପେଟ୍ରୋଲ ଓ ଡିଜେଲ ଦର ବୃଦ୍ଧି ପାଇବ ବୋଲି ଅନୁମାନ କରାଯାଉଛି ।
