Garvita Odia
କଟକ: ଦୂର ହେଲା ବାଲିଯାତ୍ରା ଦ୍ବନ୍ଦ୍ବ । ଉଭୟ ଉପର ଓ ତଳ ପଡିଆରେ ହେବ ବାଲିଯାତ୍ରା । ଉପର ପଡ଼ିଆରେ ବାଲିଯାତ୍ରା ଆୟୋଜନକୁ ନେଇ ଯେଉଁ ଦ୍ୱନ୍ଦ୍ବ ଉପୁଜିଥିଲା ସେଥିରେ ପୂର୍ଣ୍ଣଚ୍ଛେଦ ପଡିଛି । ଫଳରେ ଅନେକ ବ୍ୟବସାୟୀମାନଙ୍କୁ ଆଶ୍ୱସ୍ତି ମିଳିଛି । ତେବେ ବାଲିଯାତ୍ରା ସମୟରେ ଯେପରି ଭିଡ଼ ନଉପୁଜେ ସେଥିପାଇଁ ସମସ୍ତ ବ୍ୟବସ୍ଥା କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି । ବାଲିଯାତ୍ରା ସମ୍ପର୍କିତ ମାମଲାର ଶୁଣାଣି କରି ହାଇକୋର୍ଟଙ୍କ ଦୁଇ ଜଣିଆ ଖଣ୍ଡପୀଠ ଜଷ୍ଟିସ ସଙ୍ଗମ ସାହୁ ଓ ଜଷ୍ଟିସ ଭି ନରସିଂହ ଏହି ନିର୍ଦ୍ଦେଶ ଦେଇଛନ୍ତି ।ବାଲିଯାତ୍ରା ସମୟରେ ଦେଶର ବିଭିନ୍ନ ସ୍ଥାନରୁ ଛୋଟ ଛୋଟ ବ୍ୟବସାୟୀମାନେ ଆସିଥାନ୍ତି। ସିଏମସି ଏବଂ ପ୍ରଶାସନ ସେମାନଙ୍କ ଠାରୁ ୟୁଜର୍ସ ଫି ନେଇ ସେମାନଙ୍କୁ ରାସ୍ତା କଡରେ ବ୍ୟବସାୟ କରିବାକୁ ଅନୁମତି ଦେଇଥାଏ । ଫଳରେ ଟ୍ରାଫିକ ସମସ୍ୟା ସୃଷ୍ଟି କରିଥାଏ। ଏହାକୁ କୋର୍ଟ ଗୁରୁତ୍ୱର ସହ ନେଇ ସେମାନଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା ଗ୍ରହଣ କରିବା ପାଇଁ ନିର୍ଦ୍ଦେଶ ଦେଇଛନ୍ତି । ସେହିପରି କ୍ୟାଣ୍ଟେନମେଣ୍ଟ ରୋଡ଼ ନିକଟରେ ଯେପରି କୌଣସି ବୁଲା ବ୍ୟବସୟୀ ନ ବସନ୍ତି ସେଥିପାଇଁ ପଦକ୍ଷେପ ନେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି ।ମାମଲାର ଶୁଣାଣି ସମୟରେ କଟକ ଜିଲ୍ଲାପାଳ ହାଇକୋର୍ଟରେ ବ୍ୟକ୍ତିଗତ ହାଜର ହୋଇଥିଲେ । ଏହାସହ କଟକ ଡିସିପି,ସିଏମସି କମିଶନରଙ୍କ ସମେତ ବିଭିନ୍ନ ବିଭାଗର ଅଧିକାରୀ ମାନେ ଭର୍ଚୁଆଲ ମାଧ୍ୟମରେ ଉପସ୍ଥିତ ହୋଇଥିଲେ । ବାଲିଯାତ୍ରା ସମୟରେ ପ୍ରବଳ ଭିଡ଼ ହୋଇଥାଏ । ତାହାକୁ କିପରି ନିୟନ୍ତ୍ରଣ କରାଯିବ ବୋଲି ଡିସିପିଙ୍କୁ ପ୍ରଶ୍ନ କରିଥଲେ କୋର୍ଟ । ବିଶେଷକରି ଯୋବ୍ରା ପଟୁ ବାଲିଯାତ୍ରା ପଡିଆ ଆସୁଥିବା ଗାଡି ଗୁଡିକ ପାଇଁ କେମିତି ଓ କେଉଁ କେଉଁ ସ୍ଥାନରେ ପାର୍କିଂ ବ୍ୟବସ୍ଥା କରାଯାଇଛି ସେନେଇ କୋର୍ଟ ପ୍ରଶ୍ନ କରିଥିଲେ । ଜଣେ ଚାଳକ ଯୋବ୍ରା ପଟରୁ ବାଲିଯାତ୍ରା ଆସିଲେ ୨ ରୁ ୩ ଘଣ୍ଟା ସମୟ ଲାଗିଥାଏ । କିପରି ଏହାକୁ ନିୟନ୍ତ୍ରଣ କରାଯିବ ବୋଲି କୋର୍ଟ ପ୍ରଶ୍ନ କରିଥିଲେ । ଏହାର ଉତ୍ତରରେ କଟକ ଡିସିପି କହିଥିଲେ, “ମାତାମଠ ଏବଂ ବୋଷ କଲେଜ ସାମ୍ନାରେ ପ୍ରାୟ ୨ ରୁ ୩ ହଜାର ବାଇକ ଗୁଡିକ ପାର୍କିଂ ବ୍ୟବସ୍ଥା କରାଯାଇଛି ।”
