Garvita Odia
ରାଇକିଆ: କନ୍ଧମାଳ ଜିଲା ରାଇକିଆସ୍ଥିତ ସୁଧାକିରଣ ମହାବିଦ୍ୟାଳୟରେ ବିଶ୍ୱ ଆତ୍ମହତ୍ୟା ପ୍ରତିରୋଧ ସଚେତନତା କାର୍ଯ୍ୟକ୍ରମ ଅଧ୍ୟକ୍ଷ ଦୀନବନ୍ଧୁ ମହାନ୍ତିଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଛି। ଅଧ୍ୟକ୍ଷ ମହାନ୍ତି ନିଜ ବକ୍ତବ୍ୟରେ ଯୁବପିଢ଼ି ମଧ୍ୟରେ ମାନସିକ ଚାପ ଓ ଅବସାଦ ଦେଖାଦେଲେ ଏହାକୁ ଅଣଦେଖା ନକରି ପରିବାର, ବନ୍ଧୁବାନ୍ଧବ ଓ ବିଶେଷଜ୍ଞଙ୍କ ସହ ଆଲୋଚନା କରିବାକୁ ପରାମର୍ଶ ଦେଇଥିଲେ। ଜୀବନରେ ଦେଖାଦେଉଥିବା ସମସ୍ୟାର ସମାଧାନ ପାଇଁ ସହାୟତା ନେଇ ସୁସ୍ଥ ଓ ସୁନ୍ଦର ଜୀବନ ଗଢ଼ିବା ଉପରେ ସେ ଗୁରୁତ୍ୱାରୋପ କରିଥିଲେ।ମୁଖ୍ୟ ବକ୍ତା ଭାବେ ଫୁଲବାଣୀ ମୁଖ୍ୟ ଚିକିତ୍ସାଳୟର ମାନସିକ ସ୍ୱାସ୍ଥ୍ୟ ବିଭାଗର ମନସ୍ତତ୍ତ୍ୱବିତ୍ ସୁଶ୍ରୀ ମାଳତୀ ବେହେରା ଯୋଗଦେଇ ମାନସିକ ରୋଗର ବିଭିନ୍ନ ଲକ୍ଷଣ, ଅବସାଦର କାରଣ, ଏହାର ପ୍ରତିରୋଧ ଓ ନିୟନ୍ତ୍ରଣ ସମ୍ପର୍କରେ ବିସ୍ତୃତ ଆଲୋଚନା କରିଥିଲେ। ମାନସିକ ଚାପ ଓ ଅବସାଦଗ୍ରସ୍ତ ବ୍ୟକ୍ତିଙ୍କୁ ଚିହ୍ନଟ କରି ସମୟୋଚିତ ସହଯୋଗ ଓ ଆବଶ୍ୟକ ମାନସିକ ସ୍ୱାସ୍ଥ୍ୟ ସେବା ଯୋଗାଇଦେବା ଦ୍ୱାରା ଅନେକ ସଙ୍କଟକୁ ଏଡ଼ାଇ ହେବ ବୋଲି ସେ କହିଥିଲେ।
ଏହି କାର୍ଯ୍ୟକ୍ରମ ରେ ଅଧ୍ୟାପକ ଆଲୋକ ପରିଚ୍ଛା ଅତିଥି ପରିଚୟ ପ୍ରଦାନ କରିଥିବାବେଳେ ଅଧ୍ୟାପକ ଧର୍ମେନ୍ଦ୍ର ଦିଗାଲ ଧନ୍ୟବାଦ ଅର୍ପଣ କରିଥିଲେ। ଅଧ୍ୟାପକ ସୀମାଞ୍ଚଳ ସାହୁ ଓ ଅଧ୍ୟାପିକା ପ୍ରୀୟଲତା ମଞ୍ଚାସୀନ ଥିଲେ। କାର୍ଯ୍ୟକ୍ରମରେ ମହାବିଦ୍ୟାଳୟର ଅଧ୍ୟାପକ, ଅଧ୍ୟାପିକା ଓ ଛାତ୍ରଛାତ୍ରୀ ଉପସ୍ଥିତ ଥିଲେ।
ରିପୋର୍ଟର : ଦୁତି କୃଷ୍ଣ ପଣ୍ଡା
