Garvita Odia
ବ୍ରହ୍ମପୁର: ମନ କି ବାତରେ ଓଡ଼ିଆ ପୁଅ ହର୍ଷବର୍ଦ୍ଧନ ସାହୁଙ୍କୁ ପ୍ରଶଂସାରେ ପୋତିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ମାସିକ ରେଡିଓ କାର୍ୟ୍ୟକ୍ରମ ‘ମନ କି ବାତ’ରେ ବ୍ରହ୍ମପୁରର ଯୁବ ଭାରତ୍ତୋଳକ ହର୍ଷବର୍ଦ୍ଧନ ସାହୁଙ୍କ ନାମ ନେବା ସହିତ ତାଙ୍କ ସଫଳତାକୁ ନେଇ ଭୂୟସୀ ପ୍ରଶଂସା କରିଛନ୍ତି ପ୍ରଧାନମନ୍ତ୍ରୀ । ଯାହାକୁ ନେଇ ପୂରା ବ୍ରହ୍ମପୁରରେ ଅଞ୍ଚଳରେ ଖୁସିର ମାହୋଲ ।ରାଜ୍ୟ ତଥା ଦେଶରେ ଭାରତ୍ତୋଳନ କ୍ରୀଡାରେ ସ୍ୱତନ୍ତ୍ର ସ୍ଥାନ ହାସଲ କରିଥିବା ବ୍ରହ୍ମପୁର ସହର ପାଇଁ ଆଜି ପୁଣି ଏକ ଗର୍ବ ଓ ଗୌରବ ଆଣିଛନ୍ତି ବ୍ରହ୍ମପୁର ସହରର ଶାନ୍ତି ନଗରର ହର୍ଷବର୍ଦ୍ଧନ ସାହୁ । ମୋଦିଙ୍କ ମନ କି ବାତ କାର୍ୟ୍ୟକ୍ରମରେ ଆଜି ଭାରତ୍ତୋଳନ କରୁଥିବା ହର୍ଷବର୍ଦ୍ଧନଙ୍କ ସଫଳତାକୁ ଭୂୟସୀ ପ୍ରଶଂସା କରିଛନ୍ତି ପ୍ରଧାନମନ୍ତ୍ରୀ । ଭାରତ୍ତୋଳନ ଭଳି କ୍ରୀଡାରେ ପ୍ରଥମେ ଜିଲ୍ଲାସ୍ତରୀୟ ପ୍ରତିଯୋଗିତା ଭାଗ ନେଇ ପରେ ରାଜ୍ୟ ଏବଂ ବର୍ତ୍ତମାନ ବିହାରର ଚାଲିଥିବା ଖେଲୋ ଇଣ୍ଡିଆରେ ୪୯ କେଜି ବର୍ଗରେ ହର୍ଷବର୍ଦ୍ଧନ ସ୍ୱର୍ଣ୍ଣ ପଦକ ହାସଲ କରିଛନ୍ତି । ଏଥିସହ ପୂର୍ବରୁ ଏହି କ୍ରୀଡାର ୪୯ କେଜି ବର୍ଗରେ ରହିଥିବା ପୂର୍ବର ଝାଡ଼ଖଣ୍ଡର ଜଣେ ପ୍ରତିଯୋଗୀଙ୍କ ୨୦୨ ରାଙ୍କକୁ କାଟି ଯୁବ ଭାରତ୍ତୋଳକ ହର୍ଷବର୍ଦ୍ଧନ ୨୦୩ ରାଙ୍କ ରଖି ନୂତନ ରେକର୍ଡ କରିଛନ୍ତି ।ମନ କି ବାତ କାର୍ୟ୍ୟକ୍ରମରେ ହର୍ଷବର୍ଦ୍ଧନ ନାମ ନିଆଯିବା ପରେ ବ୍ରହ୍ମପୁରର ଯୁବ ଭାରତ୍ତୋଳକ ହର୍ଷବର୍ଦ୍ଧନ ସାହୁ କହିଛନ୍ତି, ‘ମୁଁ ପ୍ରଥମେ ସହରର ଶଙ୍କର ଫିଜିକାଲ କ୍ଲବରେ ଏହାକୁ ଆରମ୍ଭ କରିଥିବା ବେଳେ କୋଚ ଜିତେନ୍ଦ୍ର କୁମାର ସାହୁଙ୍କ ଠାରୁ ଏହି ତାଲିମ ନେଇଥିଲି । ପ୍ରଥମେ ଯେତେବେଳେ ଜାତୀୟ ସ୍ତରୀୟ କ୍ରୀଡାରେ ଭାଗ ନେଇଥିଲେ ସେତେବେଳେ ପଞ୍ଚମ ସ୍ଥାନରେ ରହିଥିବା ବେଳେ ପରବର୍ତ୍ତୀ ସମୟରେ ଅରୁଣାଚଳ ପ୍ରଦେଶରେ ହୋଇଥିବା ପ୍ରତିଯୋଗିତାରେ ବ୍ରୋଞ୍ଜ ପଦକ ଜିତିଥିଲି ।’
