ମହଙ୍ଗା ଭତ୍ତା ୨% ବୃଦ୍ଧି

ଭୁବନେଶ୍ବର: ରାଜ୍ୟର ସରକାରୀ ଉଦ୍ୟୋଗ ବା PSU କର୍ମଚାରୀଙ୍କ ମହଙ୍ଗା ଭତ୍ତା (DA) ୨ ପ୍ରତିଶତ ବୃଦ୍ଧି କରିଛନ୍ତି ଓଡ଼ିଶା ସରକାର । ସଂଶୋଧିତ ଦରମା ହାର, ୨୦୧୭ ଅନୁସାରେ, ଦରମା ପାଉଥିବା ଯୋଗ୍ୟ PSU କର୍ମଚାରୀଙ୍କ ପାଇଁ DA ୫୮ ପ୍ରତିଶତରୁ ୬୦ ପ୍ରତିଶତକୁ ବୃଦ୍ଧି କରାଯାଇଛି । ଏହି ବର୍ଦ୍ଧିତ DA ୨୦୨୬ ଜାନୁଆରୀ ୧ ତାରିଖରୁ ପିଛିଲା ଭାବେ ଲାଗୁ ହେବ । ପବ୍ଲିକ ଏଣ୍ଟରପ୍ରାଇଜେସ୍ ବିଭାଗର କମିଶନର ତଥା ସଚିବ ମହମ୍ମଦ ସାଦିକ ଆଲମଙ୍କ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ଅର୍ଥ ବିଭାଗର ୨୦୨୬ ମେ’ ୧୮ ତାରିଖର ନିର୍ଦ୍ଦେଶକୁ ଆଧାର କରି ରାଜ୍ୟ ସରକାରୀ ଉଦ୍ୟୋଗର କର୍ମଚାରୀଙ୍କ ପାଇଁ ଅତିରିକ୍ତ ୨ ପ୍ରତିଶତ DA ମଞ୍ଜୁର କରାଯାଇଛି ।ସମସ୍ତ ରାଜ୍ୟ ସରକାରୀ ଉଦ୍ୟୋଗର କର୍ମଚାରୀଙ୍କୁ ସ୍ୱୟଂଚାଳିତ ଭାବେ ଏହି ବର୍ଦ୍ଧିତ DA ମିଳିବ ନାହିଁ । ସରକାରଙ୍କ ନିର୍ଦ୍ଦେଶ ଅନୁସାରେ, ସମ୍ପୃକ୍ତ ସରକାରୀ ଉଦ୍ୟୋଗଗୁଡ଼ିକୁ ନିର୍ଦ୍ଦିଷ୍ଟ ଯୋଗ୍ୟତା ମାନଦଣ୍ଡ ପୂରଣ କରିବାକୁ ପଡ଼ିବ । ଏହି ମାନଦଣ୍ଡଗୁଡ଼ିକ ଆଧାରରେ ପ୍ରସ୍ତାବଗୁଡ଼ିକୁ ମାମଲା ଅନୁସାରେ ବିଚାର କରାଯିବ । DA ବୃଦ୍ଧି ପାଇଁ ରାଜ୍ୟ ସରକାରୀ ଉଦ୍ୟୋଗଗୁଡ଼ିକୁ ୧୦ଟି ସର୍ତ୍ତ ପୂରଣ କରିବାକୁ ହେବ । ମାନଦଣ୍ଡ ପୂରଣ କରୁଥିବା ଏବଂ କାଟାଗୋରାଇଜେସନ ଫ୍ରେମୱାର୍କ ଅଧୀନରେ ବର୍ଗୀକୃତ ସରକାରୀ ଉଦ୍ୟୋଗଗୁଡ଼ିକ ସେମାନଙ୍କ ବୋର୍ଡ ଅଫ ଡାଇରେକ୍ଟର୍ସଙ୍କ ଅନୁମୋଦନ ପରେ ନିଜ ନିଜ ପ୍ରଶାସନିକ ବିଭାଗ ନିକଟରେ ପ୍ରସ୍ତାବ ପଠାଇବେ । ଅନ୍ୟପକ୍ଷରେ କାଟାଗୋରାଇଜେସନ୍ ଫ୍ରେମୱାର୍କ ଅଧୀନରେ ନଥିବା ସରକାରୀ ଉଦ୍ୟୋଗଗୁଡ଼ିକ ବୋର୍ଡ ଅନୁମୋଦନ ପରେ ସେମାନଙ୍କ ପ୍ରଶାସନିକ ବିଭାଗ ମାଧ୍ୟମରେ ପବ୍ଲିକ ଏଣ୍ଟରପ୍ରାଇଜେସ୍ ବିଭାଗ ନିକଟକୁ ପ୍ରସ୍ତାବ ପଠାଇବେ । ଏହି ପ୍ରସ୍ତାବଗୁଡ଼ିକୁ ମାମଲା ଅନୁସାରେ ବିଚାର କରାଯାଇ ବର୍ଦ୍ଧିତ DA ପ୍ରଦାନ ସମ୍ପର୍କରେ ଆବଶ୍ୟକ ଅନୁମୋଦନ ଦିଆଯିବ ।