ମହିଳାଙ୍କୁ ଦଳିଦେଲା ହାତୀ

ଆଠମଲ୍ଲିକ : ହାତୀ ହାବୁଡ଼ରେ ପଡି କେନ୍ଦୁପତ୍ର ତୋଳାଳିଙ୍କ ଗଲା ଜୀବନ। ଆଠମଲ୍ଲିକ ଥାନା ଅନ୍ତର୍ଗତ ମାଧପୁର ଗ୍ରାମର ବିଜୟ ବିଶ୍ୱାଳଙ୍କ ପତ୍ନୀ ଜ୍ୟୋତ୍ସ୍ନାରାଣୀ ବିଶ୍ୱାଳ(୩୦)ଙ୍କ ହାତୀ ଆକ୍ରମଣରେ ମୃତ୍ୟୁ ହୋଇଛି ।ସୂଚନା ଅନୁଯାୟୀ, ଜ୍ୟୋତ୍ସ୍ନାରାଣୀ ପରିବାରର କିଛି ଲୋକଙ୍କ ସହ ମାନଜୋର ଜଳସେଚନ ପ୍ରକଳ୍ପ ନିକଟସ୍ଥ ଜଙ୍ଗଲକୁ କେନ୍ଦୁପତ୍ର ତୋଳିବାକୁ ସୋମବାର ପ୍ରାତଃ ସମୟରେ ଯାଇଥିଲେ । ପରିବାରର ଅନ୍ୟ ସଦସ୍ୟଙ୍କଠାରୁ କିଛି ଦୂରରେ କେନ୍ଦୁପତ୍ର ତୋଳୁଥିବା ଜ୍ୟୋତ୍ସ୍ନାରାଣୀ ହାତୀ ସହ ମୁହାଁମୁହିଁ ହୋଇଯାଇଥିଲେ । ଖସି ପଳାଇବାକୁ ଉଦ୍ୟମ କରୁଥିବା ବେଳେ ହାତୀ ତାଙ୍କୁ ଶୁଣ୍ଢରେ ଧରି କଚାଡ଼ି ଦେଇ ଦଳି ପକାଇଥିଲା । ଚିତ୍କାର ଶୁଣି ପରିବାର ସଦସ୍ୟ ଓ ଗ୍ରାମବାସୀ ତାଙ୍କୁ ଉଦ୍ଧାର କରି ମାଧପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ସ୍ୱାସ୍ଥ୍ୟାବସ୍ଥା ଗୁରୁତର ଥିବାରୁ ତାଙ୍କୁ ଆଠମଲ୍ଲିକ ଉପଖଣ୍ଡ ଚିକିତ୍ସାଳୟ ସ୍ଥାନାନ୍ତର କରାଯାଇଥିବା ବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପୁଲିସ୍ ପହଞ୍ଚି ଶବ ବ୍ୟବଚ୍ଛେଦ କରାଇ ଅପରାହ୍ଣରେ ପରିବାର ଲୋକଙ୍କୁ ହସ୍ତାନ୍ତର କରିଥିଲା ।