ମାଣିକପାଟଣା ଗାଁକୁ ନେଇ ଓଡ଼ିଶା ଆନ୍ଧ୍ର ଟଣାଓଟରା

ଭୁବନେଶ୍ୱର:ନିକଟରେ ଆରମ୍ଭ ହୋଇଥିବା ଜନଗଣନା ତଥ୍ୟ ସଂଗ୍ରହ ସମୟରେ ଏକ ନୂଆ ପ୍ରକାର ସୀମା ବିବାଦ ଦେଖିବାକୁ ମିଳିଛି । ଗଜପତି ଜିଲ୍ଲାର ମାଣିକପାଟଣା ଗାଁକୁ ନେଇ ଓଡିଶ଼ା ଓ ଆନ୍ଧ୍ରପ୍ରଦେଶ ମଧ୍ୟରେ ଟଣାଭିଡା ଆରମ୍ଭ ହୋଇଯାଇଛି । ଆନ୍ଧ୍ର ସୀମାନ୍ତରେ ଥିବା ଗଜପତି ଜିଲ୍ଲାର ଗଙ୍ଗାବାଡ଼ ପଞ୍ଚାୟତ ଅନ୍ତର୍ଗତ ମାଣିକପାଟଣା ଗ୍ରାମରେ ଓଡ଼ିଶା ପ୍ରଶାସନ ପକ୍ଷରୁ ଜନଗଣନା ସର୍ଭେ ହୋଇଥିଲା। ଗତକାଲି ଆନ୍ଧ୍ର ଅଧିକାରୀମାନେ ଜୋର୍‌ ଜବରଦସ୍ତି ସର୍ଭେ କରିବା ସହ କିଛି ଘରକାନ୍ଥରେ ଉଲ୍ଲେଖ ଥିବା ଓଡ଼ିଶାର ତଥ୍ୟ ଉପରେ ରଙ୍ଗ ବୋଳି ନିଜ ରାଜ୍ୟର ତଥ୍ୟ ଉଲ୍ଲେଖ କରିଥିଲେ। ଯାହାକୁ ନେଇ ଅସନ୍ତୋଷ ପ୍ରକାଶ ପାଇଥିଲା। ଲୋକଙ୍କ ଘରକାନ୍ଥରେ ଓଡ଼ିଶା ପକ୍ଷରୁ ଲେଖା ଯାଇଥିବା ତଥ୍ୟ ଉପରେ ଆନ୍ଧ୍ରର ସରକାରୀ କର୍ମଚାରୀ ରଙ୍ଗ ବୋଳି ଦେଉଥିବା ବେଳେ ଓଡ଼ିଶା ପକ୍ଷରୁ ମଧ୍ୟ ସମାନ ତରିକା ଆପଣାଯାଉଛି। ଜନଗଣନା ସର୍ଭେକୁ ନେଇ ସୀମାନ୍ତରେ ମୁହାଁମୁହିଁ ହେଉଛନ୍ତି ଓଡ଼ିଶା ଓ ଆନ୍ଧ୍ରପ୍ରଦେଶ।