ରସଗୋଲା ଦିବସ

ଭୁବନେଶ୍ୱର: ରସଗୋଲା କାହାକୁ ବା ଭଲ ନ ଲାଗେ । ସମ୍ପର୍କରେ ମିଠାପଣ ଭରେ ଉତ୍ସବରେ ମଧୁରତା ଆଣିଥାଏ ସେ ରସଗୋଲା । ଓଡ଼ିଆ ଘରେ ଅତିଥି ଚର୍ଚ୍ଚା ହେଉ କି ଆନନ୍ଦ ଉଲ୍ଲାସର ମୁହୂର୍ତ୍ତ ସବୁଠି ଲୋଡା ପଡ଼େ ରସଗୋଲା । ଘରେ ଘରେ ପର୍ବପର୍ବଣୀରେ ରସଗୋଲା ଆସିବାଟା ନିଶ୍ଚିନ୍ତ । ପ୍ରତିଟି ଓଡିଆଙ୍କ ଆବେଗ ସେ ରସରୋଲା । ରାଗ-ଋଷା, ମାନ ଅଭିମାନ ଭାଙ୍ଗେ ରସଗୋଲା । ଏ ରସଗୋଲା ଦେଇ ଅଭିମାନୀନି ମହାଲକ୍ଷ୍ମୀଙ୍କ ମାନଭଞ୍ଜନ କରନ୍ତି ମହାପ୍ରଭୁ । ଓଡ଼ିଆ ଜାତିର ପ୍ରାଣ କେନ୍ଦ୍ର ଶ୍ରୀମନ୍ଦିରରେ କାହିଁ କେଉଁ କାଳରୁ ରସଗୋଲା ପ୍ରସାଦ ରୂପେ ଅର୍ପଣ କରାଯାଉଅଛି । ନୀଳାଦ୍ରି ବିଜେ ଅବସରରେ ମହାପ୍ରଭୁ ଶ୍ରୀଜଗନ୍ନାଥଙ୍କ ପାଖରେ ରସଗୋଲା ଲାଗି ହୋଇ ଆସୁଛି । ଆଜି ରସଗୋଲା ଦିବସ । ଓଡ଼ିଶାର ପାରମ୍ପରିକ ମିଠା ରସଗୋଲା ପାଇଁ ଦିନଟି ସମର୍ପିତ ।
ଶ୍ରୀମନ୍ଦିର ପରମ୍ପରା- ନୀଳାଦ୍ରି ବିଜେ ଅବସରରେ ମହାପ୍ରଭୁ ଶ୍ରୀଜଗନ୍ନାଥ, ମାଆ ଲକ୍ଷ୍ମୀ ସାଆନ୍ତାଣୀଙ୍କ ମାନଭଞ୍ଜନ କରିବା ପାଇଁ ରସଗୋଲା ଦେବା ବିଧି ରହିଛି । ଏହାକୁ ନେଇ ରସଗୋଲା ଦିବସ ପାଳନ କରାଯାଉଛି । ପରମ୍ପରା ଅନୁଯାୟୀ ରଥ ନିକଟରେ ରସଗୋଲା ଲାଗି ହୋଇଥାଏ । ବର୍ଷ ବର୍ଷ ଧରି ଚାଲି ଆସୁଛି ଏହି ପରମ୍ପରା । ୨୦୧୫ ଜୁଲାଇ ୩୦ ନୀଳାଦ୍ରି ବିଜେ ଦିନ ରସଗୋଲା ଦିବସ ପ୍ରଥମେ ପାଳନ ଆରମ୍ଭ ହୋଇଥିଲା । ଏହାପରଠୁ ୨୦୧୬ ଜୁଲାଇ ୧୭ରୁ ରସଗୋଲା ଦିବସ ପାଳନ ହୋଇଆସୁଛି ।

ରସଗୋଲା ଆମ ଗର୍ବ ଆମ ଗୌରବ- ଏ ରସଗୋଲାକୁ ନେଇ ବି କେତେ ନାଟ । ରସଗୋଲାକୁ ନେଇ ପଶ୍ଚିମବଙ୍ଗ ଓ ଓଡି଼ଶା ମଧ୍ୟରେ ‘ମିଠାଯୁଦ୍ଧ’ ହୋଇଥିଲା । ‘ରସଗୁଲ୍ଲା’ ତାଙ୍କର ବୋଲି ଯୁକ୍ତି ବାଢିଥିଲା ପଶ୍ଚିମବଙ୍ଗ । ଓଡ଼ିଶାର ରସଗୋଲାକୁ ଜିଆଇ ମାନ୍ୟତା ଦେବା ପାଇଁ ଏକଜୁଟ ହୋଇଥିଲା ଓଡ଼ିଶା । ଶେଷରେ ଓଡ଼ିଶାର ରସଗୋଲାକୁ ଜିଆଇ ଗ୍ୟାଗ୍‌ ମିଳିଥିଲା । ରସଗୋଲା କାହାର ? ପଶ୍ଚିମବଙ୍ଗର ନା ଓଡ଼ିଶାର । ୨୦୧୯ ଜୁଲାଇ ୧୯ରେ ଏହାର ଉତ୍ତର ମିଳିଥିଲା । ରସଗୋଲାକୁ ଜିଆଇ ମାନ୍ୟତା ମିଳିଲା । ଆମ ଓଡିଆଙ୍କ ଛାତି କୁଣ୍ଢେମୋଟ ହୋଇଗଲା । ଜିଆଇ ମାନ୍ୟତା ମିଳିବାକୁ ୬ ବର୍ଷ ପୂରଣ ହୋଇଛି । ରସଗୋଲା ଓଡ଼ିଶାର । ରସଗୋଲା ଆମ ଗର୍ବ ଆମ ଗୌରବ । ରସଗୋଲା ଆମର, ଅଛି , ରହିବ ।