Garvita Odia
ଭୁବନେଶ୍ବର: ରାହୁଲ ଗାନ୍ଧୀଙ୍କ ପ୍ରଶଂସାରେ କୁନି ପ୍ରଶଂସକ । କଂଗ୍ରେସ ପକ୍ଷରୁ ଭୁବନେଶ୍ବର ବରମୁଣ୍ଡା ପଡ଼ିଆରେ ଆୟୋଜିତ ‘ସମ୍ବିଧାନ ବଞ୍ଚାଅ ମହାସମାବେଶ’ର ମଞ୍ଚ ଉପରେ ଏକ ସ୍ପର୍ଶକାତର ମୁହୂର୍ତ୍ତ ଦେଖିବାକୁ ମିଳିଛି । ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଭେଟିଛନ୍ତି ତାଙ୍କ 9 ବର୍ଷିୟା କୁନି ପ୍ରଶଂସକ ନିଲମ ବସ୍ତିଆ । ରାହୁଲ ତାଙ୍କୁ ଆଲିଙ୍ଗନ କିରିବା ସହ ଭଲ ପଢ଼ିବା ପାଇଁ କହିଛନ୍ତି । ନିଜ କୁନି ପ୍ରଶଂସକଙ୍କ ସହ କିଛି ସମୟ କଥା ହେବା ସହ ରାହୁଲ ତାଙ୍କୁ ଚକୋଲେଟ୍ ମଧ୍ୟ ଦେଇଛନ୍ତି । ନିଲମ ରାହୁଲଙ୍କ ବଡ଼ ପ୍ରଶଂସକ ଓ ବଡ଼ ହେଲେ ପ୍ରିୟଙ୍କା ଗାନ୍ଧୀ ଓ ରାହୁଲ ଗାନ୍ଧୀଙ୍କ ଭଳି ରାଜନୀତି କରିବେ ବୋଲି କହିଛି ।ରାହୁଲଙ୍କ କୁନି ପ୍ରଶଂସକ ଜଗତସିଂହପୁରର ନିଲମ ବସ୍ତିଆ କହିଛନ୍ତି, “ଏତେ ଗହଳି ଭିତରୁ ରାହୁଲ ଅଙ୍କଲ (ରାହୁଲ ଗାନ୍ଧୀ) ମୋତେ ଡାକିଲେ । ମୋ ସହ କଥା ହେଲେ । ସେ ମୋତେ ଚୁମ୍ବନ ଦେବାକୁ କହିଲେ, ଏବଂ ମୁଁ ତାଙ୍କୁ ଚୁମ୍ବନ ଦେଇଥିଲି । ରାହୁଲ ଗାନ୍ଧୀ ମୋର ନାମ ଏବଂ ମୁଁ କେଉଁ ଶ୍ରେଣୀରେ ପଢ଼ୁଛି ବୋଲି ପଚାରିଥିଲେ । ମୋର ନାମ ନୀଲମ ବସ୍ତିଆ ଏବଂ ମୁଁ ଷଷ୍ଠ ଶ୍ରେଣୀରେ ପଢ଼ୁଛି ବୋଲି କହିଥିଲି । ସେ ମୋତେ ମୋର ପ୍ରିୟ ବିଷୟ ବିଷୟରେ ପଚାରିଥିଲେ ଏବଂ ମୁଁ ତାଙ୍କୁ କହିଥିଲି ଯେ, ଗଣିତ ମୋର ପ୍ରିୟ ବିଷୟ । ରାହୁଲ ଗାନ୍ଧୀ ମୋତେ ଭଲ ପଢ଼ିବାକୁ କହିଲେ । ସେ ମୋତେ ଏକ ଚକୋଲେଟ୍ ଦେଲେ ।
ନିଲମ ଆହୁରି କହିଛନ୍ତି, “ମୋତେ ରାହୁଲ ଗାନ୍ଧୀ ଭଲ ଲାଗନ୍ତି, କାରଣ ଯାହାର ବାପା ନଥାନ୍ତି ସେ ହେଉଛନ୍ତି ତାଙ୍କ ବାପା, ଯାହାର ଭାଇ ନଥାନ୍ତି ସେ ହେଉଛନ୍ତି ତାଙ୍କ ଭାଇ । ସେ ଜଣେ ନେତା ନୁହିଁନ୍ତି ବରଂ ସେ ଆମ ପରିବର ସଦସ୍ୟ । ମୁଁ ଚାହୁଁଛି ଯେ, ରାହୁଲ ଗାନ୍ଧୀ ଆମର ପ୍ରଧାନମନ୍ତ୍ରୀ ହୁଅନ୍ତୁ । ସମସ୍ତେ ତାଙ୍କୁ ଭୋଟ ଦେଇ ପ୍ରଧାନମନ୍ତ୍ରୀ କରାନ୍ତୁ । ମୁଁ ବଡ ହେଲେ IAS ଅଫିସର ହେବି । ଅବସର ପରେ ପ୍ରିୟଙ୍କା ଗାନ୍ଧୀ ଓ ରାହୁଲ ଗାନ୍ଧୀଙ୍କ ଭଳି ରାଜନୀତି କରିବି ।”
