‘ଶ୍ରୀମନ୍ଦିର ଆଇନରେ ପରିବର୍ତ୍ତନ ନେଇ ସରକାରଙ୍କୁ ଦିଆଯିବା ପ୍ରସ୍ତାବ’

ପୁରୀ: ଶ୍ରୀମନ୍ଦିର ସୁରକ୍ଷା ବୃଦ୍ଧି ପାଇଁ ଶ୍ରୀମନ୍ଦିର ପ୍ରଚଳିତ ଆଇନ ବ୍ୟବସ୍ଥାରେ ହେବ ପରିବର୍ତ୍ତନ । ଶ୍ରୀମନ୍ଦିର ଆଇନରେ ସଂଶୋଧନ ନେଇ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯିବାକୁ ଉଚ୍ଚ ସ୍ତରୀୟ ପ୍ରଶାସନିକ ବୈଠକରେ ନିଷ୍ପତ୍ତି। ଶ୍ରୀମନ୍ଦିରରୁ ସ୍ପାଏ କ୍ୟାମେରା ବାରମ୍ବାର ଜବତ ପରେ ମନ୍ଦିରର ସୁରକ୍ଷା ବ୍ୟବସ୍ଥା କଡାକଡି କରିବା ଓ ଶ୍ରୀମନ୍ଦିର ଆଇନରେ ସଂଶୋଧନ ପାଇଁ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡକ୍ଟର ଅରବିନ୍ଦ ପାଢ଼ୀଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ପୁରୀ ଜିଲ୍ଲାପାଳ ଏବଂ ଶ୍ରୀମନ୍ଦିରର ବରିଷ୍ଠ ପ୍ରଶାସନିକ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ ।

ବୈଠକ ପରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ ନିଜ ପ୍ରତିକ୍ରିୟାରେ କହିଛନ୍ତି,”ଶ୍ରୀମନ୍ଦିରର ସୁରକ୍ଷା ସମ୍ପର୍କିତ ଏକ ବୈଠକ ଅନୁଷ୍ଠିତ ହୋଇଥିଲା। ଶ୍ରୀମନ୍ଦିର ସୁରକ୍ଷାକୁ ନେଇ ଆଲୋଚନା କରାଯାଇଛି । ତେବେ ଶ୍ରୀମନ୍ଦିରର ପ୍ରଚଳିତ ଆଇନରେ ସେଭଳି ଦୃଷ୍ଟାନ୍ତମୂଳକ ଦଣ୍ଡ ବିଧାନ ବ୍ୟବସ୍ଥା ନଥିବା ନେଇ ଆଲୋଚୋନା ହୋଇଥିଲା । ଏଣୁ ଆଜି ନିଷ୍ପତ୍ତି ହୋଇଛି ଏହି ଆଇନରେ ସଂଶୋଧନ ଆଣିବା ପାଇଁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯିବ । ମୁଖ୍ୟତଃ ୪ଟି ବିନ୍ଦୁ ଉପରେ ଆମେ ପ୍ରସ୍ତାବ ରଖିଲୁ । ଏନେଇ ରାଜ୍ୟ ସରକାର ଚୁଡାନ୍ତ ନିଷ୍ପତ୍ତି ନେବେ । ପ୍ରଥମ ହେଉଛି ଯଦି କୌଣସି ବ୍ୟକ୍ତି ଶ୍ରୀ ମନ୍ଦିର ଭିତରେ ଅନଧିକୃତ ଭାବରେ ମୋବାଇଲ ଫୋନ, କ୍ୟାମେରା, ଇଲେକ ଟ୍ରୋନିକ୍ସ ଡିଭାଇସ୍ ବ୍ୟବହାର କରନ୍ତି, ତେବେ ତାଙ୍କ ପାଇଁ ଦଣ୍ଡ ବିଧାନର ପ୍ରସ୍ତାବ ଆମେ ରାଜ୍ୟ ସରକାରଙ୍କୁ ଦେବୁ । ବର୍ତ୍ତମାନ ଯାହା ନିୟମ ପ୍ରଚଳିତ ରହିଛି ଶ୍ରୀମନ୍ଦିର ଭିତରକୁ ମୋବାଇଲ ଫୋନ୍ ନେଲେ ଏକ ହଜାର ଟଙ୍କା ଜୋରିମାନା ବ୍ୟବସ୍ଥା ରହିଛି। ତେବେ ଏହା ଦୃଷ୍ଟାନ୍ତମୂଳକ ଦଣ୍ଡ ନୁହେଁ ବୋଲି ବିଭିନ୍ନ ମହଲରେ ଅଭିଯୋଗ ହୋଇ ଆସୁଛି । ତେବେ କେଉଁ କୋର୍ଟରେ ମାମଲା ହେବ, କଣ ଦଣ୍ଡ ବିଧାନ ରହିବ, ଏହା ବେଲ କି ନନ୍ ବେଲ ହେବ ସେ ନେଇ ପ୍ରସ୍ତାବ ଦିଆଯିବ ।”ସେ ଆହୁରି ମଧ୍ୟ କହିଛନ୍ତି, ମହାପ୍ରଭୁ ଶ୍ରଜଗନ୍ନାଥଙ୍କୁ ନେଇ କେହି ସୋସିଆଲ ମିଡ଼ିଆ ହେଉ କି ଅନ୍ୟ କିଛି ମାଧ୍ୟମରେ ଅପମାନ କଲା ଭଳି କାମ କଲେ ତାଙ୍କ ପାଇଁ କଠୋର ଦଣ୍ଡ ବିଧାନ ପାଇଁ ଆମେ ସରକାରଙ୍କୁ ପ୍ରସ୍ତାବ ଦେବୁ । ଏହାକୁ ଧର୍ତ୍ତବ୍ୟ ଅପରାଧ, ନନ୍ ବେଲ ମାମଲା ଭାବେ ଧରାଯିବା ନେଇ ଆମେ ପ୍ରସ୍ତାବ ରଖିବୁ । ଏହା ଚିଫ ଯୁଡ଼ିଶିଆଲ ମାଜିଷ୍ଟ୍ରେଟଙ୍କ ଠାରେ ବିଚାର କରାଯାଉ ।ଯାହାକି ୭ ବର୍ଷ ଯାଏ ମାମଲା ରହିପାରିବ । ଶ୍ରୀ ମନ୍ଦିର ପାଇଁ ରାଜ୍ୟ ସରକାର ସ୍ବତନ୍ତ୍ର ଆଇନ ପ୍ରଣୟନ କରିଛନ୍ତି । ହେଲେ ଦୃଢ଼ କାର୍ୟ୍ୟାନୁଷ୍ଠାନ ପାଇଁ କୌଣସି ପ୍ରାବଧାନ ନାହିଁ । ଏଣୁ ଶ୍ରୀମନ୍ଦିର ଆଇନରେ ପରିବର୍ତ୍ତନ ପାଇଁ ଆମେ ରାଜ୍ୟ ସରକାରଙ୍କୁ ପ୍ରସ୍ତାବ ଦେବୁ । ନିୟମ ଉଲଘଂନ କାରିଙ୍କୁ ୩ ବର୍ଷ ଜେଲ ଦଣ୍ଡ ସହ ଉଭୟ ଜୋରିମାନା ଓ ଜେଲ ଦଣ୍ଡ ବ୍ୟବସ୍ଥା ପ୍ରଣୟନ ପାଇଁ ଆମେ ସରକାର ଙ୍କୁ ପ୍ରସ୍ତାବ ରଖିବୁ ।