ସମିତି ସଭ୍ୟଙ୍କୁ ଗୁଳିକରି ହତ୍ୟା

ବରଗଡ଼: ବରଗଡ଼ ଜିଲ୍ଲା ଆଗଲପୁର ସମିତି ସଭ୍ୟ ଅଚ୍ୟୁତାନନ୍ଦ ନାଏକଙ୍କୁ ଗୁଳି କରି ହତ୍ୟା l ଗତକାଲି(ଗୁରୁବାର) ବିଳମ୍ବିତ ରାତିରେ ସୋନପୁର ଜିଲ୍ଲା ଡୁଙ୍ଗୁରିପାଲି ଥାନା ଅନ୍ତର୍ଗତ ଚୀନାଜୁରୀ ନିକଟରେ ରାସ୍ତା ଉପରେ ହୋଇଛି ହତ୍ୟାକାଣ୍ଡ l 39 ବର୍ଷୀୟ ଅଚ୍ୟୁତାନନ୍ଦଙ୍କ ମୃତଦେହ ରକ୍ତଜୁଡୁବୁଡୁ ଅବସ୍ଥାରେ କାରର ଡ୍ରାଇଭର ସିଟ୍‌ରେ ଥିବା ଦେଖିବାକୁ ମିଳିଛି l ଖବର ପାଇ ଆଜି ସକାଳୁ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।କାର ଭିତରେ ବନ୍ଧୁକର ଗୋଟିଏ ଖୋଖା ପଡ଼ିଥିବା ବେଳେ ଅଚ୍ୟୁତାନନ୍ଦ ନାଏକଙ୍କ ଛାତିରେ ଗୁଳି ବାଜିଥିବା ପୋଲିସ କହିଛି l ଅଚ୍ୟୁତାନନ୍ଦ ନିଜେ କାର ଚଲାଇ ଯାଉଥିବା ବେଳେ ତାଙ୍କୁ ଗୁଳି ମାରି ହତ୍ୟା କରାଯାଇଥିବା ଅନୁମାନ କରୁଛି ପୋଲିସ l
ତେବେ ଘଟଣାଟି ସୋନପୁର ଜିଲ୍ଲା ଓ ବରଗଡ଼ ଜିଲ୍ଲା ସୀମାନ୍ତ ଅଞ୍ଚଳରେ ହୋଇଥିବା ବେଳେ ଉଭୟ ଜିଲ୍ଲାର ପୋଲିସ ଘଟଣା ସ୍ଥଳକୁ ପହଞ୍ଚିଥିଲେ । ମାତ୍ର ଉକ୍ତ ହତ୍ୟାକାଣ୍ଡ ଘଟଣାଟି ସୋନପୁର ଜିଲ୍ଲାରେ ଆସୁଥିବାରୁ ସୋନପୁର ଜିଲ୍ଲାର ପୋଲିସ ଏହି ମାମଲକୁ ହାତକୁ ନେଇଛି ଓ ଏହାର ତଦନ୍ତ ଆରମ୍ଭ କରିଛି l
ବରଗଡ଼ ବରପାଲି ପୋଲିସ IIC ପ୍ରମୋଦ ସାହୁ ଏହି ହତ୍ୟା ଘଟଣା ସମ୍ପର୍କରେ କହିଛନ୍ତି ଯେ, ଅଚ୍ୟୁତାନନ୍ଦ ନାଏକ ଆଗଲପୁରର ସମିତି ସଭ୍ୟ ଥିଲେ ଯିଏ କି କେବାଡ଼ ଗାଁର ବାସିନ୍ଦା ଅଟନ୍ତି l ସୋନପୁର ଜିଲ୍ଲା ଡୁଙ୍ଗୁରିପାଲିକୁ ସେ ଦୈନନ୍ଦିନ ଆସୁଥିଲେ l ଡୁଙ୍ଗୁରିପାଲିରେ ଥିବା ଶନି ମନ୍ଦିରରେ ଅଚ୍ୟୁତାନନ୍ଦ ପୂଜକ ଭାବେ ଥିଲେ ଓ ପ୍ରତିଦିନ ସେ ମନ୍ଦିରକୁ ଆସୁଥିଲେ lଗତକାଲି(ଗୁରୁବାର) ରାତିରେ 8 ଟାରେ ସେ ଘରୁ ରାତ୍ରି ଭୋଜନ କରିବା ପରେ OD 15 A 8191 ନମ୍ବର ବିଶିଷ୍ଟ କାରରେ ଡୁଙ୍ଗୁରିପାଲିକୁ ଆସିଥିଲେ କିନ୍ତୁ ସେ ଆଉ ଘରକୁ ଫେରିନଥିଲେ l ତେବେ ତାଙ୍କ ମୃତଦେହ କାର ଭିତରେ ରକ୍ତ ଜୁଡୁବୁଡୁ ଅବସ୍ଥାରେ ମିଳିଥିଲା l କାରଟି ଚୀନାଜୁରୀ ଠାରେ ଡୁଙ୍ଗୁରିପାଲିରୁ ବଲାଙ୍ଗୀର ପଟକୁ ମୁହଁ କରିଥିବାରୁ ସେ ଡୁଙ୍ଗୁରିପାଲିରୁ ବଲାଙ୍ଗୀର ପଟକୁ ଯାଉଥିବା ସମୟରେ ତାଙ୍କୁ ଗୁଳି କରି ହତ୍ୟା କରାଯାଇଥିବା ପୋଲିସ ଅନୁମାନ କରୁଛି l
ମୃତ ଅଚ୍ୟୁତାନନ୍ଦଙ୍କ ବାପାଙ୍କ ଥାନାରେ ଦେଇଥିବା ଏତଲା ଅନୁଯାୟୀ, ଅଚ୍ୟୁତାନନ୍ଦଙ୍କୁ କେହି ଜଣେ ଫୋନ କରି ଚିନାଜୁରୀକୁ ଡାକିଥିଲେ ଭେଟ ପଡିବାକୁ l ତେବେ ଅଚ୍ୟୁତାନନ୍ଦ ରାତିରେ ଘରୁ ଖାଇ ସାରିବା ପରେ ବାହାରିପଡିଥିଲେ ଏବଂ ଆଉ ଘରକୁ ଫେରିନଥିଲେ l ରାତିରେ ଘରକୁ ନଫେରିବାରୁ ତାଙ୍କ ବାପା ଚିନାଜୁରୀ ପଟକୁ ଖୋଜିବାକୁ ଆସିଥିଲେ ଓ ରାସ୍ତାରେ କାର ଭିତରେ ତାଙ୍କ ପୁଅର ମୃତଦେହ ପଡ଼ିଥିବା ଦେଖିବାକୁ ପାଇଥିଲେ l
ତେବେ କିଏ ଓ କାହିଁକି ଅଚ୍ୟୁତାନନ୍ଦଙ୍କୁ ଏପରି ଗୁଳିମାରି ହତ୍ୟା କରିଛି ତାହା ସ୍ପଷ୍ଟ ହୋଇପାରିନଥିବା ବେଳେ ଏହା ପୂର୍ବ ଶତ୍ରୁତାକୁ କେନ୍ଦ୍ର କରି ହତ୍ୟା ହୋଇଥିବା ନେଇ ପୋଲିସ ଅନୁମାନ କରୁଛି l ଘଟଣା ସ୍ଥଳକୁ ବିଜେପୁରର ପୂର୍ବତନ ବିଧାୟିକା ରୀତା ସାହୁ ବର୍ତମାନ ପହଞ୍ଚି ଥିବାବେଳେ ଅଚ୍ୟୁତାନନ୍ଦଙ୍କ ହତ୍ୟାକାରୀକୁ ଶୀଘ୍ର ଗିରଫ କରିବାକୁ ଦାବି କରିଛନ୍ତି l ତେବେ ଉଭୟ ବରଗଡ଼ ଓ ସୋନପୁର ମିଶି ଏହି ହତ୍ୟାକାଣ୍ଡ ଘଟଣା ଉପରେ ତଦନ୍ତ ଆରମ୍ଭ କରିଦେଇଥିବା ଜଣାପଡିଛି l