Garvita Odia
ଭୁବନେଶ୍ୱର:୨୦୦ କୋଟି ଟଙ୍କା ବ୍ୟୟରେ ଭୁବନେଶ୍ୱର ମହାନଗର ନିଗମ(ବିଏମସି) ଅଂଚଳରେ ହେବ ସାମୟିକ ସହରୀ ବନ୍ୟା ନିୟନ୍ତ୍ରଣ କାର୍ୟ୍ୟକ୍ରମ । ବିଏମ୍ ସି କମିଶନର ରାଜେଶ ପ୍ରଭାକର ପାଟିଲଙ୍କ ନିର୍ଦେଶ କ୍ରମେ ଆଜି ବିଏମ୍ ସି ପକ୍ଷରୁ ସିଟି ଇଂଜିନିୟର ଶ୍ରୀ ବିଳାସ କୁମାର ବେହେରା ଏବଂ ମାର୍ସ ପ୍ଲାନିଂ ଆଣ୍ଡ ଇଂଜିନିୟରିଂ ସର୍ଭିସେସ୍ ପ୍ରାଇଭେଟ ଲିମିଟେଡ୍ ପକ୍ଷରୁ ଭାଇସ୍-ପ୍ରେସିଡେଣ୍ଟ ନିହାର ରଂଜନ ପାଢୀଙ୍କ ମଧ୍ୟରେ ଏକ ଚୁକ୍ତିନାମା ସ୍ୱାକ୍ଷରିତ ହୋଇଯାଇଅଛି । ଅତି ପ୍ରବଳ ବର୍ଷା ସମୟରେ ବିଏମ୍ ସି ଅଂଚଳର କେତେକ ସ୍ଥାନରେ ସାମୂହିକ ଜଳବନ୍ଦୀ ପରିସ୍ଥିତି ସୃଷ୍ଟି ହୋଇଥାଏ । ଫଳରେ ଲୋକମାନେ ବହୁ ଅସୁବିଧାର ସମ୍ମୁଖିନ ହୋଇଥାନ୍ତି । ତେଣୁ ଏହାର ଦୀର୍ଘକାଳୀନ ପ୍ରତିକାର ନିମନ୍ତେ ବନ୍ୟା ବିପତ୍ତି ପରିଚାଳନା କାର୍ୟ୍ୟକ୍ରମ ପାଣ୍ଠିରୁ ଉଭୟ ରାଜ୍ୟ ଓ କେନ୍ଦ୍ର ସରକାର ଏଥିପାଇଁ ୨୦୦ କୋଟି ଟଙ୍କା ଯୋଗାଇଦେବେ। ଏହି ସାମୂଦାୟିକ ସହରୀ ବନ୍ୟା ନିୟନ୍ତ୍ରଣ କାର୍ୟ୍ୟ ପାଇଁ ବିସ୍ତୃତ ଯୋଜନା ଏବଂ ସୁପର ଭିଜନ କାମ କରିବ ମାର୍ସ ପ୍ଲାନିଂ ଆଣ୍ଡ ଇଂଜିନିୟରିଂ ସର୍ଭିସେସ୍ ପ୍ରାଇଭେଟ ଲିମିଟେଡ୍ । ୧୮ ମାସ ମଧ୍ୟରେ ଏହି ପ୍ରକଳ୍ପ କାମ ଶେଷ କରିବା ପାଇଁ ସମୟ ଧାର୍ୟ୍ୟ କରାଯାଇଛି । ଆଗକୁ ବର୍ଷା ଦିନ ଆସୁଥିବାରୁ ତୁରନ୍ତ କାର୍ୟ୍ୟ ଆରମ୍ଭ କରିବା ପାଇଁ ସିଟି ଇଂଜିନିୟର ସଂପୃକ୍ତ ସଂସ୍ଥାର ଭାଇସ୍ ପ୍ରେସିଡେଣ୍ଟ ଏବଂ ଉପସ୍ଥିତ ଅଧିକାରୀମାନଙ୍କୁ ନିର୍ଦେଶ ଦେଇଛନ୍ତି । ଭୁବନେଶ୍ୱରର ଇସ୍କନ-ବେହେରା ସାହି, ବମିଖାଲ, ରୁଦ୍ରପୁର, ଏମ୍ସ ଆଦି ୧୩ ଗୋଟି ପ୍ରକଳ୍ପର ବିସ୍ତୃତ ରିପୋର୍ଟ ସହ ସୁପରଭିଜନ କାର୍ୟ୍ୟ କରିବ ମାର୍ସ ପ୍ଲାନିଂ ଆଣ୍ଡ ଇଂଜିନିୟରିଂ ସର୍ଭିସେସ୍ ପ୍ରାଇଭେଟ ଲିମିଟେଡ୍ ।
ଭୁବନେଶ୍ୱର ମହାନଗର ନିଗମ ମୁଖ୍ୟାଳୟସ୍ଥିତ ସମ୍ମିଳନୀ କକ୍ଷରେ ଅନୁଷ୍ଠିତ ଏହି କାର୍ୟ୍ୟକ୍ରମରେ ବିଏମ୍ ସିର କାର୍ୟ୍ୟନିର୍ବାହୀ ଅଧିକାରୀ (ଡ୍ରେନେଜ୍ ଡିଭିଜନ) ପ୍ରୀୟବ୍ରତ ବେହେରା ଓ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ । ସେହିପରି ମାର୍ସ ପ୍ଲାନିଂ ଆଣ୍ଡ ଇଂଜିନିୟରିଂ ସର୍ଭିସେସ୍ ପ୍ରାଇଭେଟ ଲିମିଟେଡର ସହଯୋଗୀ ଭାଇସ୍-ପ୍ରେସିଡେଣ୍ଟ ମଳୟ କୁମାର ପଟ୍ଟନାୟକ ଓ ତାଙ୍କ ଟିମ୍ ଉପସ୍ଥିତ ଥିଲେ । ବର୍ଷା ଦିନେ ସୃଷ୍ଟି ହେଉଥିବା ଜଳବନ୍ଦୀର ନିୟନ୍ତ୍ରଣ କରିବା ପାଇଁ କେନ୍ଦ୍ର ଓ ରାଜ୍ୟ ସରକାର ମିଳିତ ଭାବେ ଏସଆରସି ପାଣ୍ଠି ଏବଂ ବନ୍ୟା ବିପତ୍ତି ପରିଚାଳନା କାର୍ୟ୍ୟକ୍ରମ ପାଣ୍ଠିରୁ ଏହି ୨୦୦ କୋଟି ଟଙ୍କାର ସହାୟତା ପ୍ରଦାନ କରିବେ।
