୨୮ରୁ ୩୦ ବ୍ୟାଙ୍କ ଧର୍ମଘଟ

ନୂଆଦିଲ୍ଲୀ : ଦେଶବ୍ୟାପୀ ବ୍ୟାଙ୍କ କର୍ମଚାରୀ ସଂଘଗୁଡ଼ିକ ପକ୍ଷରୁ ସେପ୍ଟେମ୍ବର ୨୮ରୁ ୩୦ ତାରିଖ ପର୍ଯ୍ୟନ୍ତ ଧର୍ମଘଟ ଡାକରା ଦିଆଯାଇଛି। ଏହି ଧର୍ମଘଟ ଡାକରାରେ ୟୁନାଇଟେଡ୍ ଫୋରମ୍ ଅଫ୍ ବ୍ୟାଙ୍କ ୟୁନିଅନ୍ସ (ୟୁଏଫ୍‌ବିୟୁ) ଓ ସର୍ବଭାରତୀୟ ବ୍ୟାଙ୍କ କର୍ମଚାରୀ ସଂଘ (ଏଆଇବିଇଏ) ସାମିଲ ହୋଇଛନ୍ତି। ଏହି ଧର୍ମଘଟ ଯୋଗୁଁ ସେପ୍ଟେମ୍ବର ୨୬ରୁ ୩୦ ତାରିଖ ପର୍ଯ୍ୟନ୍ତ କ୍ରମାଗତ ୫ଦିନ ଧରି ବ୍ୟାଙ୍କ ବନ୍ଦ ରହିବ। କାରଣ ସେପ୍ଟେମ୍ବର ୨୬ ହେଉଛି ୪ର୍ଥ ଶେଷ ଶନିବାର ଓ ୨୭ ହେଉଛି ରବିବାର। ଏହି ସାପ୍ତାହିକ ଛୁଟି ପରେ ସେପ୍ଟେମ୍ବର ୨୮, ୨୯ ଓ ୩୦ (ସୋମ, ମଙ୍ଗଳ ଓ ବୁଧବାର) ଧର୍ମଘଟ ଡାକରା ଯୋଗୁଁ ବ୍ୟାଙ୍କ ବନ୍ଦ ରହିବ। ଫଳରେ ବ୍ୟାଙ୍କ ସେବା କ୍ରମାଗତ ୫ଦିନ ଧରି ବାଧାପ୍ରାପ୍ତ ହେବାର ଆଶଙ୍କା ରହିଛି। ବ୍ୟାଙ୍କଗୁଡ଼ିକରେ ସପ୍ତାହକୁ ୫ ଦିନିଆ କାର୍ଯ୍ୟଦିବସ ବ୍ୟବସ୍ଥା ଲାଗୁ କରିବା। ଖାଲି ପଡ଼ିଥିବା ପଦଗୁଡ଼ିକରେ ନୂତନ ନିଯୁକ୍ତି ଓ ଅନ୍ୟାନ୍ୟ ଦାବି ପୂରଣ କରିବା ଦାବିରେ ଏହି ଧର୍ମଘଟ ଡାକରା ଦିଆଯାଇଛି। ଏହା ପୂର୍ବରୁ ସେପ୍ଟେମ୍ବର ୧୧ରୁ ୧୫ କ୍ରମାଗତ ୫ଦିନ ବ୍ୟାଙ୍କ ବନ୍ଦ ରହିଥିଲା। ଏହି ଧର୍ମଘଟ ପାଇଁ ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ (ଏସବିଆଇ) ସମେତ ପ୍ରମୁଖ ବ୍ୟାଙ୍କଗୁଡ଼ିକ ସେମାନଙ୍କ ଗ୍ରାହକଙ୍କୁ ସେପ୍ଟେମ୍ବର ୨୮ ପୂର୍ବରୁ ନିଜର ଆବଶ୍ୟକୀୟ କାମ ଯଥା: ଟଙ୍କା ଜମା/ଉଠାଣ, ଚେକ୍ କ୍ଲିୟରାନ୍ସ, ଡକ୍ୟୁମେଣ୍ଟେସନ୍ ସାରିବାକୁ ପରାମର୍ଶ ଦେଇଛି। ବ୍ୟାଙ୍କ ଶାଖାରେ କାମ ପ୍ରଭାବିତ ହେବ, କିନ୍ତୁ ୟୁପିଆଇ, ଇଣ୍ଟରନେଟ୍ ବ୍ୟାଙ୍କିଂ, ୟୋନୋ ଆପ୍, ଏଟିଏମ୍‌ ଏବଂ ସିଏସପି ପୂର୍ବପରି କାର୍ଯ୍ୟକ୍ଷମ ରହିବ। ଏହି ପ୍ରସଙ୍ଗରେ କେନ୍ଦ୍ର ଅର୍ଥ ମନ୍ତ୍ରଣାଳୟର ସଚିବ ବ୍ୟାଙ୍କ ମୁଖ୍ୟମାନଙ୍କ ସହ ଜରୁରୀ ବୈଠକ ଡକାଇଛନ୍ତି। ୟୁନିଅନ୍ ଚେତାବନୀ ଦେଇଛି ଯେ ଦାବି ପୂରଣ ନହେଲେ ଅକ୍ଟୋବର ୨୬ ରୁ ଅନିର୍ଦ୍ଦିଷ୍ଟ କାଳ ପାଇଁ ଆନ୍ଦୋଳନ କରାଯିବ।