Garvita Odia
ପୁରୀ/ସାକ୍ଷୀଗୋପାଳ: ପବିତ୍ର ଅଁଳା ନବମୀ ପାଇଁ ପୁରୀ ସାକ୍ଷୀଗୋପାଳ ମନ୍ଦିରରେ ମା’ ରାଧାରାଣୀଙ୍କ ପାଦ ଦର୍ଶନ କରିବାକୁ ଲକ୍ଷାଧିକ ଶ୍ରଦ୍ଧାଳୁଙ୍କ ଭିଡ ଜମିଛି । ଅଁଳା ନବମୀରେ ବର୍ଷକୁ ଗୋଟିଏ ଥର ସାକ୍ଷୀଗୋପିନାଥ ମନ୍ଦିରରେ ଶ୍ରୀରାଧାରାଣୀଙ୍କ ଓଡ଼ିଆଣୀ ବେଶ ଓ ପାଦ ଦର୍ଶନ ଅନୁଷ୍ଠିତ ହୋଇଥାଏ । ଏହାସହ ଠାକୁର ଶ୍ରୀ ଗୋପାଳଜୀଉଙ୍କ ନଟବର ବେଶ ଅନୁଷ୍ଠିତ ହୋଇଥାଏ । ଏହି ମନୋରମ ବେଶ ଦର୍ଶନ ଓ ପୂଜା ପାଇଁ ଲକ୍ଷାଧିକ ଭକ୍ତଙ୍କ ସମାଗମ ହୋଇଛି । ଏନେଇ ପୁରୀ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି ।ପବିତ୍ର ଅଁଳା ନବମୀ ପାଇଁ ପୁରୀ ପୋଲିସ ପକ୍ଷରୁ ପ୍ରସ୍ତୁତି ହୋଇଛି । ଆଜି ସକାଳୁ ରାଧା ପାଦ ଦର୍ଶନ ପାଇଁ ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ସମାଗମ ହୋଇଛି । ଏଣୁ ଏହାକୁ ଦୃଷ୍ଟିରେ ରଖି ପୋଲିସ ପକ୍ଷରୁ ସମସ୍ତ ପ୍ରସ୍ତୁତି ଶେଷ ହୋଇଛି । ଟ୍ରାଫିକ ପାଇଁ ସ୍ବତନ୍ତ୍ର ବ୍ୟବସ୍ଥା ଗ୍ରହଣ କରାଯାଇଛି । ଭକ୍ତଙ୍କ ଶୃଙ୍ଖଳିତ ଦର୍ଶନ ପାଇଁ ବ୍ୟାରିକେଡ଼ ବ୍ୟବସ୍ଥା କରାଯାଇଛି । ବ୍ୟାରିକେଡ଼ ମଧ୍ୟରେ ସିସିଟିଭି, ଲାଇଟିଙ୍ଗ ସହିତ ଫ୍ୟାନ ବ୍ୟବସ୍ଥା କରାଯାଇଛି। ସୁରକ୍ଷା ଦାୟିତ୍ବରେ ୨ ଜଣ ଅତିରିକ୍ତ ଏସପି, ୧୧ ଡିଏସପି, ୨୧ ଜଣ ଇନ୍ସପେକ୍ଟର, ୭୦ ଏଏସଆଇ, ୨୫୦ ହୋମଗାର୍ଡଙ୍କ ସହିତ ୨୫ ପ୍ଲାଟୁନ ପୋଲିସ ଫୋର୍ସ ମୁତୟନ ହେବେ। ଆଜି ରାତି ୧୨ ଟା ରୁ ପୋଲିସ ପକ୍ଷରୁ ଟ୍ରାଫିକ ଓ ପୋଲିସ ମୁତୟନ ବ୍ୟବସ୍ଥା ଆରମ୍ଭ ହେବ। ଏଥିସହ ତିନୋଟି କ୍ୟୁଆରଟି ବ୍ୟବସ୍ଥା କରାଯାଇଛି। ସେହିପରି ଅଗ୍ନିଶମ ବିଭାଗ ଏବଂ ଆମ୍ବୁଲାନ୍ସ ବ୍ୟବସ୍ଥା କରାଯାଇଛି । ପୁରୀ ଏସପି ପ୍ରତୀକ ସିଂ ଏହି ସୂଚନା ଦେଇଛନ୍ତି ।
ପୁରୀ ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ା ନିଜ ପ୍ରତିକ୍ରିୟାରେ କହିଛନ୍ତି, “ପବିତ୍ର ପଂଚୁକ ବ୍ରତ ପାଇଁ ଆମେ ସ୍ବତନ୍ତ୍ର ବ୍ୟବସ୍ଥା କରିଛୁ । ଶ୍ରଦ୍ଧାଳୁ ମାନେ କିଭଳି ଭଲରେ ଆସିପାରିବେ, ଶୃଙ୍ଖଳିତ ଦର୍ଶନ ପାଇଁ ସଠିକ୍ ବ୍ୟାରିକେଡ଼ ବ୍ୟବସ୍ଥା, ପ୍ରବେଶ ଓ ପ୍ରସ୍ଥାନ, ପାର୍କିଂ ଆଦି ସବୁ ଉପରେ ବ୍ୟବସ୍ଥା କରାଯାଉଛି । ଏନେଇ ସବୁ ଅଧିକାରୀଙ୍କ ସହ ଆଲୋଚନା ହୋଇଛି । ଭକ୍ତଙ୍କ ପାଇଁ ପାନୀୟ ଜଳ ବ୍ୟବସ୍ଥା, ଫାଷ୍ଟଏଡ ସେଣ୍ଟର, ହବିଶ୍ୟାଳି ମା’ ମାନଙ୍କ ଦର୍ଶନ ନେଇ ସବୁ ଆଲୋଚୋନା ହୋଇଛି । କାର୍ତ୍ତିକ ପୂର୍ଣ୍ଣିମାରେ ବେଳାଭୂମିରେ ହଜାର ହଜାର ଭକ୍ତଙ୍କ ଭିଡକୁ ଦୃଷ୍ଟିରେ ରଖାଯାଇ ବ୍ୟାପକ ବ୍ୟବସ୍ଥା କରାଯାଉଛି । ଲାଇଫ ଗାର୍ଡ ଓ ଅଗ୍ନିଶମ କର୍ମଚାରୀଙ୍କୁ ମୁତୟନ କରାଯିବ । କେବଳ ପୁରୀ ନୁହେଁ ରାମଚଣ୍ଡୀ, ଚନ୍ଦ୍ରଭାଗା, ପିରଯାହାନିଆରେ ମଧ୍ୟ ଏହି ବ୍ୟବସ୍ଥା ରହିବ । ଆମ୍ବୁଲାନ୍ସ ବ୍ୟବସ୍ଥା ମଧ୍ୟ ରହିବ । ତେବେ ପଂଚୁକରେ ଶ୍ରୀମନ୍ଦିର ସିଂହ ଦ୍ଵାର ଦେଇ ଭକ୍ତ କେବଳ ପ୍ରବେଶ କରିବେ। ଅନ୍ୟ ତିନି ଦ୍ଵାରରେ ଭକ୍ତ ମାନେ ପ୍ରସ୍ଥାନ କରିବେ । ବଡ ଦାଣ୍ଡର ମାର୍କେଟ ଛକରୁ ଶ୍ରୀମନ୍ଦିର ସିଂହ ଦ୍ଵାର ବ୍ୟାରିକେଡ଼ ଯାଏ ଅସ୍ଥାୟୀ ବ୍ୟାରିକେଡ଼ ବ୍ୟବସ୍ଥା ହୋଇଛି । ଭିଡ ନିୟନ୍ତ୍ରଣ ପାଇଁ ପୋଲିସ ମୁତୟନ ରହିବେ ।”
