Garvita Odia
କଟକ : ୧୨ ବର୍ଷ ଧରି ଚାଲିଥିବା ଏକ ଅନୁକମ୍ପାମୂଳକ ନିଯୁକ୍ତି ମାମଲାରେ ହାଇକୋର୍ଟଙ୍କ ଗୁରୁତ୍ଵପୂର୍ଣ୍ଣ ରାୟ। ପତ୍ନୀ ଅସୁସ୍ଥ ଥିଲେ ଚାକିରି ପାଇବ ପୁଅ। ତିନି ମାସ ମଧ୍ୟରେ ନିଷ୍ପତ୍ତି ନେବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ। ଚାକିରି ପାଇଁ ଏ କାର୍ୟ୍ୟାଳୟରୁ ସେ କାର୍ୟ୍ୟାଳୟକୁ ଦୌଡ଼ୁଥିବା ଜଣେ ଯୁବକଙ୍କ ଆବେଦନ ସଂପର୍କରେ ସାନି ବିଚାର କରି ୩ ମାସ ମଧ୍ୟରେ ନିଷ୍ପତ୍ତି ନେବାକୁ ହାଇକୋର୍ଟ କହିଛନ୍ତି। ଉକ୍ତ ନିଷ୍ପତ୍ତି ନେବାର ୧୦ଦିନ ମଧ୍ୟରେ ତାହାକୁ ଆବେଦନକାରୀଙ୍କୁ ଅବଗତ କରିବାକୁ ନିର୍ଦ୍ଦେଶ ଦେଇଛନ୍ତି। ବଲାଙ୍ଗିର ଜିଲ୍ଲାର ସଚ୍ଚିନ ତାଣ୍ଡିଙ୍କ ପକ୍ଷରୁ ଆବେଦନକୁ ବିଚାରକୁ ନେଇ ବିଚାରପତି ଜଷ୍ଟିସ୍ ଆଦିତ୍ୟ କୁମାର ମହାପାତ୍ର ଏହି ନିର୍ଦ୍ଦେଶ ଦେଇଛନ୍ତି ।
ସୂଚନାନୁଯାୟୀ, ୨୦୦୫ ମସିହାରେ ଆବେଦନକାରୀ ସଚ୍ଚିନ ତାଣ୍ଡିଙ୍କ ବାପା ବଲାଙ୍ଗୀର ଜିଲ୍ଲା ଟିଟଲାଗଡ଼ରେ ଜନସ୍ଵାସ୍ଥ୍ୟ ବିଭାଗରେ ଚାକିରି କରୁଥିବା ବେଳେ ତାଙ୍କର ମୃତ୍ୟୁ ହୋଇଥିଲା। ମୃତ୍ୟୁ ପରେ ପତ୍ନୀ ଚାକିରି ପାଇଁ ଆବେଦନ କରିଥିଲେ । ୨୦୧୨ରେ ଚାକିରି ପାଇଁ ତାଙ୍କୁ ସରକାରଙ୍କ ପକ୍ଷରୁ ପ୍ରସ୍ତାବ ଦିଆଯାଇଥିଲା। ହେଲେ ଶାରିରୀକ ଅସୁସ୍ଥତା କାରଣରୁ ସେ ପୁଅ ସଚ୍ଚିନଙ୍କୁ ଅନୁକମ୍ପାମୂଳକ ନିଯୁକ୍ତି ପ୍ରଦାନ ପାଇଁ ଅନୁରୋଧ କରିଥିଲେ। ରାଜ୍ୟ ସରକାର ୨୦୧୬ରେ ତାଙ୍କ ଅନୁରୋଧକୁ ଖାରଜ କରି ଦେଇଥିଲେ। ଏହା ବିରୋଧରେ ସଚ୍ଚିନ ୨୦୧୭ରେ ହାଇକୋର୍ଟଙ୍କ ଦ୍ଵାରସ୍ଥ ହୋଇଥିଲେ। ହାଇକୋର୍ଟ ଆବେଦନକାରୀଙ୍କୁ ଅନୁକମ୍ପାମୂଳକ ନିଯୁକ୍ତି ପ୍ରଦାନ ପ୍ରସଙ୍ଗରେ ପୁନଃବିଚାର କରିବାକୁ ସରକାରଙ୍କୁ ୨୦୨୪ ଜାନୁଆରୀ ୯ରେ ନିର୍ଦ୍ଦେଶ ଦେଇଥିଲେ। ତେବେ ୨୦୨୫ ଏପ୍ରିଲ ୧୯ରେ ସରକାର ନିଯୁକ୍ତି ଆବେଦନକୁ ପୁଣି ଖାରଜ କରିଦେଇଥିଲେ।
ଏହାକୁ ଚ୍ୟାଲେଞ୍ଜ୍ କରି ଆବେଦନକାରୀ ପୁଣି ହାଇକୋର୍ଟଙ୍କ ଦ୍ଵାରସ୍ଥ ହୋଇଥିଲେ। ହାଇକୋର୍ଟ ଏପ୍ରିଲ ୧୯ରେ ଏପରି ନିର୍ଦ୍ଦେଶକୁ ରଦ୍ଦ କରିଛନ୍ତି। ଏଥି ସହିତ ୧୯୯୨ର ଓସିଏସ୍ ନିୟମାବଳୀ ଓ ସାଧାରଣ ପ୍ରଶାସନ ବିଭାଗର ୨୦୨୫ ଏପ୍ରିଲ ୪ର ବିଜ୍ଞପ୍ତିକୁ ଦୃଷ୍ଟିରେ ରଖି ଅନୁକମ୍ପାମୂଳକ ନିଯୁକ୍ତି ଆବେଦନକୁ ସରକାର ୩ ମାସ ଭିତରେ ବିଚାର କରିବେ ବୋଲି ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ୍ ଆଦିତ୍ୟ କୁମାର ମହାପାତ୍ରଙ୍କୁ ନେଇ ଗଠିତ ଖଣ୍ଡପୀଠ ସଚ୍ଚିନ ତାଣ୍ଡିଙ୍କ ଆବେଦନର ଶୁଣାଣି କରି ଏପରି ନିର୍ଦ୍ଦେଶ ଦେଇଛନ୍ତି। ଆବେଦନକାରୀଙ୍କ ତରଫରୁ ଆଇନଜୀବୀ ଶଙ୍କରପ୍ରସାଦ ପାଣି ଓ ରାକେଶ ସରଙ୍ଗୀ ମାମଲା ପରିଚାଳନା କରୁଥିଲେ।
