Garvita Odia
ଭାରତୀୟ ଲେଗ୍-ସ୍ପିନର ପୀୟୂଷ ଚାୱଲା କ୍ରିକେଟର ସମସ୍ତ ପ୍ଲାଟଫର୍ମରୁ ଅବସର ଘୋଷଣା କରିଛନ୍ତି । ପୀୟୂଷ ଚାୱଲା ଆଜି ସୋସିଆଲ ମିଡିଆରେ ତାଙ୍କର ଅବସର ଘୋଷଣା କରିଥିଲେ । ଚାୱଲା ୨୦୦୭ ଟି-୨୦ ବିଶ୍ୱକପ୍ ଏବଂ ୨୦୧୧ ଏକଦିବସୀୟ ବିଶ୍ୱକପରେ ଭାରତୀୟ ଦଳର ଅଂଶ ଥିଲେ । ଭାରତୀୟ ଦଳ ମହେନ୍ଦ୍ର ସିଂହ ଧୋନୀଙ୍କ ଅଧିନାୟକତ୍ୱରେ ସେହି ଦୁଇଟି ବିଶ୍ୱକପ୍ ଜିତିଥିଲା ।୩୬ ବର୍ଷୀୟ ପୀୟୂଷ ଚାୱଲା ଇନଷ୍ଟାଗ୍ରାମରେ ଲେଖିଛନ୍ତି, ‘ମୁଁ କୃତଜ୍ଞତାର ସହିତ ଏହି ଅଧ୍ୟାୟର ଶେଷ କରୁଛି । ମୁଁ କ୍ରିକେଟର ସମସ୍ତ ଫର୍ମାଟରୁ ଅବସର ନେଉଛି । ଏହି ସୁନ୍ଦର ଯାତ୍ରାରେ ମୋତେ ସର୍ବଦା ସମର୍ଥନ କରିବା ପାଇଁ ସମସ୍ତଙ୍କୁ ଧନ୍ୟବାଦ ।’ ଏହା ସହିତ ପୀୟୂଷ ଚାୱଲା ଏକ ଲମ୍ବା ପୋଷ୍ଟ ମଧ୍ୟ ସେୟାର କରିଛନ୍ତି ।ପୀୟୂଷ ଚାୱଲା ତାଙ୍କ ପୋଷ୍ଟରେ ଲେଖିଛନ୍ତି, ‘ମଇଦାନରେ ଦୁଇ ଦଶନ୍ଧିରୁ ଅଧିକ ସମୟ ବିତାଇବା ପରେ, ଏବେ ଏହି ସୁନ୍ଦର ଖେଳକୁ ବିଦାୟ ଦେବାର ସମୟ ଆସିଛି । ଭାରତକୁ ପ୍ରତିନିଧିତ୍ୱ କରିବାଠାରୁ ଆରମ୍ଭ କରି ୨୦୦୭ ଟି-୨୦ ବିଶ୍ୱକପ୍ ଏବଂ ୨୦୧୧ ଦିନିକିଆ ବିଶ୍ୱକପ୍ ଜିତିଥିବା ଦଳର ଅଂଶ ହେବା ପର୍ଯ୍ୟନ୍ତ, ଏହି ଆଶ୍ଚର୍ଯ୍ୟଜନକ ଯାତ୍ରାର ପ୍ରତ୍ୟେକ ମୁହୂର୍ତ୍ତ ମୋ ପାଇଁ ଏକ ଆଶୀର୍ବାଦ ହୋଇଛି । ଏହି ସ୍ମୃତିଗୁଡ଼ିକ ସବୁବେଳେ ମୋ ହୃଦୟରେ ରହିବ।’ପୀୟୂଷ ଚାୱଲା ଆହୁରି ଲେଖିଛନ୍ତି, ‘ମୋ ଉପରେ ବିଶ୍ୱାସ ରଖିଥିବା ସମସ୍ତ IPL ଫ୍ରାଞ୍ଚାଇଜ୍ – ପଞ୍ଜାବ କିଙ୍ଗସ୍, କୋଲକାତା ନାଇଟ୍ ରାଇଡର୍ସ, ଚେନ୍ନାଇ ସୁପର କିଙ୍ଗସ୍ ଏବଂ ମୁମ୍ବାଇ ଇଣ୍ଡିଆନ୍ସଙ୍କୁ ମୁଁ ହୃଦୟର ସହିତ ଧନ୍ୟବାଦ ଜଣାଉଛି । ଇଣ୍ଡିଆନ୍ ପ୍ରିମିୟର ଲିଗ୍ ମୋ କ୍ୟାରିୟରର ଏକ ବିଶେଷ ଅଧ୍ୟାୟ ହୋଇଛି ଏବଂ ମୁଁ ଏଥିରେ ଖେଳିବାର ପ୍ରତ୍ୟେକ ମୁହୂର୍ତ୍ତକୁ ପ୍ରଶଂସା କରିଛି । ମୁଁ ବିଶେଷକରି ମୋର ପ୍ରଶିକ୍ଷକ – କେ.କେ. ଗୌତମ ଏବଂ ସ୍ୱର୍ଗତ ପଙ୍କଜ ସାରସ୍ୱତଙ୍କୁ ଧନ୍ୟବାଦ ଜଣାଉଛି, ଯେଉଁମାନେ ମୋତେ ଜଣେ କ୍ରିକେଟର ଭାବରେ ଗଢ଼ିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ।’ପୀୟୂଷ ଚାୱଲା ଭାବପ୍ରବଣ ହୋଇ ଲେଖିଲେ, ‘ଆଜି ମୋ ପାଇଁ ଏକ ବହୁତ ଭାବପ୍ରବଣ ଦିନ, କାରଣ ମୁଁ ଆନୁଷ୍ଠାନିକ ଭାବରେ ସମସ୍ତ ପ୍ରକାରର ଅନ୍ତର୍ଜାତୀୟ ଏବଂ ଘରୋଇ କ୍ରିକେଟରୁ ଅବସର ଘୋଷଣା କରୁଛି । ଯଦିଓ ମୁଁ ଆଉ ପିଚ୍ରେ ପାଦ ରଖିବି ନାହିଁ, ହେଲେ କ୍ରିକେଟ୍ ସବୁବେଳେ ମୋ ଭିତରେ ରହିବ। ମୁଁ ଏହି ସୁନ୍ଦର ଖେଳର ଶିକ୍ଷାକୁ ମୋ ସହିତ ବହନ କରି ଏକ ନୂତନ ଯାତ୍ରାକୁ ଯିବାକୁ ଉତ୍ସାହିତ।’
ପୀୟୂଷ ଚାୱଲାଙ୍କୁ ଶେଷ ଥର ପାଇଁ ଡିସେମ୍ବର ୨୦୧୨ରେ ଭାରତ ପାଇଁ ଖେଳିବାକୁ ଦେଖାଯାଇଥିଲା । ଡାହାଣହାତୀ ସ୍ପିନର ପୀୟୂଷ ଭାରତ ପାଇଁ ୩ ଟେଷ୍ଟ, ୨୫ଟି ଦିନିକିଆ ଏବଂ ୭ଟି ଟି୨୦ ମ୍ୟାଚ୍ ଖେଳିଛନ୍ତି । ସେ ଟେଷ୍ଟରେ ୭ଟି ୱିକେଟ୍, ଦିନିକିଆରେ ୩୨ଟି ୱିକେଟ୍ ଏବଂ ଟି୨୦ ଆନ୍ତର୍ଜାତୀୟ ମ୍ୟାଚ୍ରେ ୪ଟି ୱିକେଟ୍ ନେଇଛନ୍ତି । ପୀୟୂଷ ଚାୱଲା ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ରେ ୧୯୨ଟି ମ୍ୟାଚ୍ ଖେଳିଛନ୍ତି, ଯେଉଁଥିରେ ସେ ୨୬.୬୦ ହାରରେ ୧୯୨ଟି ୱିକେଟ୍ ନେଇଛନ୍ତି ।
