Garvita Odia
ଭାରତୀୟ ବକ୍ସର ଲଭଲିନା ବୋରଗୋହେନ ୨୦୨୬ ଏସୀୟ କ୍ରୀଡ଼ାରେ ଦେଶ ପାଇଁ ସ୍ୱର୍ଣ୍ଣ ପଦକ ଜିତି ଇତିହାସ ରଚିଛନ୍ତି । ମହିଳା ୭୫ କିଲୋଗ୍ରାମ ବର୍ଗର ଫାଇନାଲରେ ଚୀନର ବକ୍ସର ବାଓ ଜିୟିଙ୍କୁ ୫-୦ରେ ପରାସ୍ତ କରିଛନ୍ତି । ପ୍ରଥମ ଦୁଇ ରାଉଣ୍ଡରେ ଲଭଲିନା ଅତ୍ୟନ୍ତ କମ୍ ବ୍ୟବଧାନରେ ଆଗୁଆ ଥିଲେ । ତେବେ ଶେଷ ରାଉଣ୍ଡରେ ସେ ଦମଦାର ପ୍ରଦର୍ଶନ କରି ଏକତରଫା ଭାବେ ଆଗୁଆ ହୋଇଥିଲେ ।
ନିଜର ୨୯ତମ ଜନ୍ମଦିନ ଅବସରରେ ଲଭଲିନା ଦେଶବାସୀଙ୍କୁ ଏହି ଐତିହାସିକ ସ୍ୱର୍ଣ୍ଣ ଭେଟି ଦେଇଛନ୍ତି । ଏହି ବିଜୟ ସହିତ ମହିଳା ବକ୍ସିଂରେ ଏସିଆନ୍ ଗେମ୍ସ ସ୍ୱର୍ଣ୍ଣ ପଦକ ପାଇଁ ଭାରତର ୧୨ ବର୍ଷର ଦୀର୍ଘ ଅପେକ୍ଷାର ମଧ୍ୟ ଅନ୍ତ ଘଟିଛି । ଫାଇନାଲ ମୁକାବିଲାର ଆରମ୍ଭରୁ ଚୀନର ବକ୍ସର ବାଓ ଜିୟି ଅଧିକ ଆକ୍ରମଣାତ୍ମକ ଖେଳ ଦେଖାଇଥିଲେ । ସେ ବାରମ୍ବାର ଲଭଲିନାଙ୍କ ନିକଟକୁ ଯାଇ କ୍ଲିଞ୍ଚ୍ କରିବାକୁ ଚେଷ୍ଟା କରୁଥିଲେ। ଏପରିକି ମୁକାବିଲା ସମୟରେ ଦୁଇ ଖେଳାଳି ମଧ୍ୟ ରିଙ୍ଗରେ ପଡ଼ିଯାଇଥିଲେ ।
୨୦୧୪ ଏସୀୟ କ୍ରୀଡ଼ା ପରେ ପ୍ରଥମ ଥର ପାଇଁ ଭାରତର ଜଣେ ମହିଳା ବକ୍ସର ଏସୀୟ କ୍ରୀଡ଼ାରେ ସ୍ୱର୍ଣ୍ଣ ପଦକ ଜିତିଛନ୍ତି । ୨୦୧୪ରେ ମେରି କମ୍ ୫୧ କିଲୋଗ୍ରାମ ବର୍ଗରେ ସ୍ୱର୍ଣ୍ଣ ଜିତି ଏସୀୟ କ୍ରୀଡ଼ାରେ ଭାରତ ପାଇଁ ମହିଳା ବକ୍ସିଂର ପ୍ରଥମ ସ୍ୱର୍ଣ୍ଣ ହାସଲ କରିଥିଲେ । ଏହାର ୧୨ ବର୍ଷ ପରେ ଲଭଲିନା ୭୫ କିଲୋଗ୍ରାମ ବର୍ଗରେ ସ୍ୱର୍ଣ୍ଣ ଜିତିଛନ୍ତି । ପୂର୍ବତନ ବିଶ୍ୱ ଚାମ୍ପିଅନ୍ ଲଭଲିନାଙ୍କ ପାଇଁ ଏହା ଏସୀୟ କ୍ରୀଡ଼ାରେ ପ୍ରଥମ ସ୍ୱର୍ଣ୍ଣ । ୨୦୨୨ ଏସୀୟ କ୍ରୀଡ଼ାରେ ସେ ରୌପ୍ୟ ପଦକ ଜିତିଥିଲେ। ଚାରି ବର୍ଷ ପରେ ସେ ପଦକର ରଙ୍ଗ ବଦଳାଇ ସ୍ୱର୍ଣ୍ଣ ହାସଲ କରିଛନ୍ତି ।
ଟୋକିଓ ଅଲିମ୍ପିକ୍ସରେ ବ୍ରୋଞ୍ଜ ଏବଂ ବିଶ୍ୱ ଚାମ୍ପିଅନ୍ସିପରେ ସ୍ୱର୍ଣ୍ଣ ଜିତିସାରିଥିବା ଆସାମର ଏହି ତାରକା ଆଥଲେଟ୍ଙ୍କ ସଫଳତାରେ ସମଗ୍ର ଦେଶ ଗର୍ବିତ । ଏହି ଅଦ୍ଭୁତପୂର୍ବ ସଫଳତା ପାଇଁ ପ୍ରଧାନମନ୍ତ୍ରୀ, କ୍ରୀଡ଼ା ମନ୍ତ୍ରଣାଳୟ ଏବଂ ଦେଶର ବହୁ ଗଣ୍ୟମାନ୍ୟ ବ୍ୟକ୍ତି ଲଭଲିନାଙ୍କୁ ଜନ୍ମଦିନର ଶୁଭେଚ୍ଛା ସହ ଏହି ସ୍ୱର୍ଣ୍ଣିମ ବିଜୟ ପାଇଁ ସାଧୁବାଦ ଜଣାଇଛନ୍ତି ।
