ଅମୃତଭଣ୍ଡା ଚାଷ ଦେଇଛି ରୋଜଗାରର ପନ୍ଥା

ଦେବଗଡ଼:ତିଲେଇବଣି ବ୍ଲକର ରୁକୁଡା ଗ୍ରାମ ଏକ ଆଦିବାସୀ ଅଧ୍ୟୁଷିତ ପାହାଡ ପର୍ବତ ଘେରା ଗ୍ରାମ। ଉକ୍ତ ଅଂଚଳବାସୀ ରୋଜଗାର ନିମନ୍ତେ ମୁଖ୍ୟତଃ ପାରମ୍ଫରିକ ଧାନ ଚାଷ ଉପରେ ପ୍ରାୟତଃ ନିର୍ଭରଶୀଳ। କିନ୍ତୁ ବିଗତ ୫ ବର୍ଷ ହେବ ଜିଲ୍ଲା ଉଦ୍ୟାନ କୃଷି ବିଭାଗ, ଜିଲ୍ଲା କୃଷି ବିଜ୍ଞାନ କେନ୍ଦ୍ର, ସାର୍କ ଅନୁଷ୍ଠାନ ଏବଂ ନାବାର୍ଡର ସହାୟତାରେ ଉନ୍ନତମାନର କିସମର ଅମୃତଭଣ୍ଡା ଚାଷ କରି ଆତ୍ମନିର୍ଭରଶୀଳ ହୋଇପାରିଛନ୍ତି।ଯାହାକି ସେମାନଙ୍କର ରୋଜଗାରର ମୁଖ୍ୟ ପନ୍ଥା ପାଲଟିଛି।ଅମୃତଭଣ୍ଡା ଚାଷ କରି ଚାଷୀମାନେ ବାହାର ଜିଲ୍ଲାକୁ ମଧ୍ୟ ଅମୃତଭଣ୍ଡା ବିକ୍ରି କରି ବେଶ ଲାଭବାନ ହୋଇଛନ୍ତି।ସୂଚନା ଅନୁଯାୟୀ,ତିଲେଇବଣି ବ୍ଲକ ରୁକୁଡା ଗ୍ରାମର ଚାଷୀମାନେ ପ୍ରାୟତଃ ଆମ୍ବ, କାଜୁ , ଅଦା, ହଳଦୀ, ମକା ଆଦି ଚାଷ କରି ବେଶ ଲାଭବାନ ହୋଇଥାନ୍ତି।ତେବେ ଇତିମଧ୍ୟରେ ସେହି ଗ୍ରାମର ଯୋଗେଶ୍ବର ପଟ୍ଟା, ପରେଶ ନାୟକ, ଶାନ୍ତିଲତା ନାଏକ, ବିଜୟଭାରତୀ ଧାରୁଆ, ତିଳୋତ୍ତମା ନାୟକ ଉଦ୍ୟାନ କୃଷି ବିଭାଗ ସହଯୋଗରେ ପ୍ରାୟ ୩ ଏକର ପରିମିତ ଅଂଚଳରେ ଅମୃତଭଣ୍ଡା ଚାଷ କରିଛନ୍ତି। ଉନ୍ନତ ରେଡଲେଡି କିସମର ବିହନରୁ ଚାରା ପ୍ରସ୍ତୁତ କରି ଜିଲ୍ଲା କୃଷି ବିଜ୍ଞାନ କେନ୍ଦ୍ରରୁ ଉନ୍ନତ ଜ୍ଞାନକୌଶଳ ଆହରଣ କରି ଅମୃତଭଣ୍ଡା ଚାଷ କରି ଆସୁଛନ୍ତି।ଚାଷୀମାନେ ଉନ୍ନତ କିସମ ବିହନ ସହ ପଲିଥିନ ଆଚ୍ଛାଦନ ଡ୍ରିପ ମାଧ୍ୟମରେ ବୁନ୍ଦାଜଳସେଚନ,ମୃତ୍ତିକା ପରୀକ୍ଷା ଏବଂ ଖତ ସାର ପରିଚାଳନା କରୁଛନ୍ତି। ନାବାର୍ଡ ପକ୍ଷରୁ ଚାଷୀମାନଙ୍କୁ ଚାଷ ସଂପର୍କରେ ତାଲିମ ମଧ୍ୟ ଦିଆଯାଇଛି। ଅମୃତଭଣ୍ଡା ଚାଷ କରି ୨ ଲକ୍ଷ ୫୦ ହଜାର ଟଙ୍କା ଅାୟ କରିଥିବା ଚାଷୀମାନେ ପ୍ରକାଶ କରିଛନ୍ତି।ଚାଷୀମାନେ ଅମୃତଭଣ୍ଡା କେଜି ପ୍ରତି ୨୨ ଟଙ୍କା ଦରରେ ସମ୍ବଲପୁର ଜିଲ୍ଲାର ଆରଏମସି ସହଯୋଗରେ ବିକ୍ରି କରି ବେଶ ଲାଭବାନ ହୋଇଛନ୍ତି।