Garvita Odia
ଭୁବନେଶ୍ୱର : ସୋମବାର ଓଡ଼ିଆ ନବବର୍ଷ, ପଣା ସଂକ୍ରାନ୍ତି ଓ ହନୁମାନ ଜୟନ୍ତୀ । ଏଥିପାଇଁ ଉତ୍ସବମୁଖର ହୋଇପଡ଼ିଛି ଭୁବନେଶ୍ୱରର ଛୋଟବଡ଼ ସମସ୍ତ ହନୁମାନ ମନ୍ଦିର। ସରିଲାଣି ସମସ୍ତ ପ୍ରସ୍ତୁତି ଓ ମନ୍ଦିର ସାଜସଜ୍ଜା । କେବଳ ମନ୍ଦିର କାହିଁକି ବଜାରରେ ଖୁନ୍ଦି ହୋଇଯାଇଛି ପୂଜା ସାମଗ୍ରୀ । ଚଉଁରାରେ ବାନ୍ଧିବା ପାଇଁ ଠେକି ଖୋଜନ୍ତୁ କିମ୍ବା ପଣା ପାଇଁ ବେଲ, ସବୁକିଛିର ପସରା ଦେଖିବାକୁ ମିଳୁଛି । ଏହି ପୂଣ୍ୟ ତିଥି ଅବସରରେ ମନ୍ଦିରରେ ହୋମଯଜ୍ଞ ସାଙ୍ଗକୁ ବିଭିନ୍ନ ସ୍ଥାନରେ ଜମିବ ପଣା ଆସର।
ମହାବିଷୁବ ସଂକ୍ରାନ୍ତିରେ ମହାବୀରଙ୍କ ଜନ୍ମଦିନ ପଡ଼ୁଥିବାରୁ ରାଜଧାନୀର ସମସ୍ତ ହନୁମାନ ମନ୍ଦିରରେ ପ୍ରସ୍ତୁତି ହୋଇଛି। କେଉଁ ମନ୍ଦିରରେ ୧୦୮ ହନୁମାନ ଚାଳିଶା ପାଠ ହେବ ତ କେଉଁଠି ସୁନ୍ଦରାକାଣ୍ଡ । ମନ୍ତ୍ରପାଠ ଓ ହୋମଯଜ୍ଞରେ କମ୍ପିବ ମନ୍ଦିର। ୟୁନିଟି-୧ ରେ ଥିବା ହନୁମାନ ମନ୍ଦିରରେ ହୋଇଛି ସ୍ୱତନ୍ତ୍ର ପ୍ରସ୍ତୁତି । ପୁରୋହିତଙ୍କ କହିବା କଥା, ଭୋରରୁ ମଙ୍ଗଳ ଆଳତୀ, ବାଳ ଭୋଗ, ପ୍ରଭୁଙ୍କ ସ୍ନାନ ସହିତ ହୋମଯଜ୍ଞ କରାଯିବ । ଏଥିସହିତ ୧୦୮ ଥର ହନୁମାନ ଚାଳିଶା ପାଠ କରାଯିବ । ଭକ୍ତମାନେ କେମିତି ସୁଚାରୁ ରୂପେ ପ୍ରଭୁଙ୍କ ଦର୍ଶନ କରିପାରିବେ ସେଥିପାଇଁ ବ୍ୟବସ୍ଥା ହୋଇଛି । ସେହିପରି ୮୦୦ ରୁ ୧୦୦୦ ଲୋକଙ୍କ ପାଇଁ ପ୍ରସାଦର ବ୍ୟବସ୍ଥା ମଧ୍ୟ କରାଯାଇଛି । ସିଆରପିରେ ଥିବା ହନୁମାନ ମନ୍ଦିର, ୟୁନିଟି-୨ ସ୍ଥିତ ଡାକ ମହାବୀର, ପଞ୍ଚମୁଖୀ ହନୁମାନ ମନ୍ଦିର ଭଳି ରାଜଧାନୀରେ ଥିବା ଛୋଟବଡ଼ ସମସ୍ତ ମନ୍ଦିରରେ ଧୁମ୍ଧାମ୍ରେ ପାଳିତ ହେବ ହନୁମାନ ଜୟନ୍ତୀ ।
ମହାବିଷୁବ ସଂକ୍ରାନ୍ତିରୁ ଓଡ଼ିଆ ନବବର୍ଷର ଆରମ୍ଭ । ସେଥିପାଇଁ ସୋମବାରଠାରୁ ଚାଲିବ ନୂଆ ପାଞ୍ଜି । ଏହି ସଂକ୍ରାନ୍ତି ପରଠୁ ସୂର୍ୟ୍ୟଙ୍କ ଉତ୍ତାପ ବଢୁଥିବାରୁ ଲୋକମାନେ ଚଉଁରାରେ ବାନ୍ଧିବେ ମାଟି ଠେକି । ସେଥିପାଇଁ ବଜାରରେ ବହୁଳମାତ୍ରାରେ ବିକ୍ରି ହେଉଛି ଭଳିକି ଭଳି ରଙ୍ଗିନ୍ ମାଟିର ଠେକି ।
