ଆଜି ରଥର ଚକ-ଅଖ ଡେରା ନୀତି

ପୁରୀ: ଆଜ ଭଉଁରୀ ଉତ୍ସବରେ ରଥର ଚକ-ଅଖ ଡେରା ବିଧି ସମ୍ପନ୍ନ ହେବ । ଅର୍ଥାତ୍ ବଡ଼ଦାଣ୍ଡରେ ୩ ରଥର ଚକ ସହ ଅଖ ସଂଯୋଗ ହେବ । ୨ଟି ଲେଖାଏଁ ନାହାକା ଚକରେ ଗୋଟିଏ ଲେଖାଏଁ ନାହାକା ଅଖ ଭୁଞ୍ଜା ହେବ । ସଂଯୁକ୍ତ ଚକ-ଅଖରେ ଲାଗି କରାଯିବ ମହାପ୍ରଭୁଙ୍କ ଆଜ୍ଞାମାଳ । ଏଣୁ ଯଥେଷ୍ଟ ପୂର୍ବରୁ ପ୍ରସ୍ତୁତ ରହିଛି ୩ ନାହାକା ଅଖ ଓ ୬ ନାହାକା ଚକ । ରଥ ଆଜ୍ଞାମାଳ ବିଜେ ପାଇଁ ପ୍ରାଶାସନିକ ଧାର୍ଯ୍ୟ ସମୟ ରହିଛି ସକାଳ ୯ଟା ୩୦ । ଏପଟେ ରଥ ଖଳାରେ ପହି ନପହଞ୍ଚିବାରେ ଚକ ତିଆରି ଧିମେଇଛି ।
ଭୋଇ ସର୍ଦ୍ଦାର ରବି ଭୋଇ କୁହନ୍ତି, ଭଉରୀଁ ଦିନ ସକାଳ ଧୂପ ସରିଲେ ରଥ ଖଳାକୁ ବିଜେ ହେବେ ଠାକୁରଙ୍କ ଆଜ୍ଞା ମାଳ । ପଟୁଆରରେ ପୂଜାପଣ୍ଡା ସାମନ୍ତମାନେ ଶ୍ରୀବିଗ୍ରହଙ୍କ ଆଜ୍ଞାମାଳ ନେଇ ଶ୍ରୀନଅର ସିଂହଦ୍ୱାର ସମ୍ମୁଖକୁ ଆସିବେ । ଏହା ପୂର୍ବରୁ ଆଗେ ଭୋଇ ସେବକମାନେ ରଥ ଖଳାରୁ ନାହାକା ଚକ ବୋହି ଆଣି ଅଖ ସହ ଯଥା ସ୍ଥାନରେ ରଖିଥିବେ । ଆଜ୍ଞାମାଳ ପହଞ୍ଚିଲେ ଚକ ଓ ଅଖ ସଂଯୋଗ କରି ହରିବୋଲ ପଡ଼ିବ । ୩ ରଥର ତିନି ମୁଖ୍ୟ ବିଶ୍ୱକର୍ମା ସଂଯୁକ୍ତ ଚକର ତୁମ୍ବରେ ଖଣ୍ଡୁଆ ପକାଇବେ । ପରେ ପୂଜାପଣ୍ଡା ସାମନ୍ତ ଆଜ୍ଞାମାଳ ଲାଗି କରିବେ । ପୁଣି ମୁଖ୍ୟ ବିଶ୍ୱକର୍ମାମାନେ ଆଜ୍ଞାମାଳ ଚକ ଉପରେ ସ୍ଥାପନ କରି ମାହାର୍ଦ୍ଦ ସମର୍ପଣ କରି ଶ୍ରୀଫଳ ଭାଙ୍ଗିବେ । କ୍ରମାନ୍ୱୟରେ ଶ୍ରୀବଳଭଦ୍ର, ଶ୍ରୀଜଗନ୍ନାଥ ଓ ଦେବୀ ସୁଭଦ୍ରାଙ୍କ ରଥ କାର୍ଯ୍ୟ ସମାପନ ହେବ । ଉକ୍ତ ଆଜ୍ଞାମାଳ ଉଲାଗି ହୋଇ ରଥ ଖଳା ଅଧିଶ୍ୱରୀ ଦେବୀ ଚର୍ଚ୍ଚିକା, ଦେବୀ ତାରା ଓ ଭୈରବୀଙ୍କୁ ଲାଗି କରାଯିବ ।

ଆଜି ଅଷ୍ଟାଦଶ ଦିବସରେ ରଥ ଚାଳିରେ ଜାରି ରହିଛି ଠାକୁରଙ୍କ ରଥ ନିର୍ମାଣ । ଭୋଇ ସେବକମାନେ ଯନ୍ତାଗାଡ଼ରେ ପକାଇ ତୁମ୍ବ ବିନ୍ଧରେ ୧୬ ଅର ଭୁଞ୍ଜି ସିଙ୍ଗଡ଼ା ପ୍ରସ୍ତୁତ କରୁଛନ୍ତି । ଆଜି ସନ୍ଧ୍ୟା ସୁଦ୍ଧା ୨୨ଟି ସିଙ୍ଗଡ଼ା ପ୍ରସ୍ତୁତ ସରିଛି । କରତୀ ସେବକମାନେ ଉକ୍ତ ସିଙ୍ଗଡ଼ାର ତୁମ୍ବରେ ମେସିନରେ ବିନ୍ଧ ଖୋଦେଇ କରୁଛନ୍ତି । ଚକ କାମ ଆଗେଇ ନେବାକୁ ପହିକୁ ଅପେକ୍ଷା କରାଯାଇଛି । ବିଶ୍ୱକର୍ମାମାନେ ତିନି ରଥର ୧୨ଟି ଓରା ଓ ୨୭ଟି ଜଳଯନ୍ତ୍ର ତିଆରି ସାରିଛନ୍ତି । ରଥରେ ଜଳଯନ୍ତ୍ର ସ୍ଥାପନ ହେଲେ ପାଶ୍ୱର୍ଦେବତା ଅଧିଷ୍ଠିତ ହେବେ । ତିନି ରଥର ସାଲ ଗୁଜ, ତୀଖ ଗୁଜ, କୁଡ଼ୁକା ଓ ଖମ୍ବୀ ତିଆରି ଶେଷ ହେବା ଉପରେ । ଆଗ, ପଛ ଓ ପାଶ୍ୱର୍ ନିରାଡ଼ି କାମ ଶେଷ ହେଉଛି । ରୂପକାରମାନେ ଗୁଜରେ ସିଂହ ବିରାଳ ଖୋଦେଇ ଜାରି ରଖିଛନ୍ତି । ଓଝା ସେବକମାନେ କମାର ଶାଳରେ ରଥ ପାଇଁ ପନ୍ଦାରି, ପନ୍ଦାରିଚାବି ଓ ବଳା ଆଦି ତିଆରି ଚାଳିକୁ ଯୋଗାଉଛନ୍ତି ।