ଆଜି ସିଏମଏସ-୩ ଉପଗ୍ରହର ଉତ୍‌କ୍ଷେପଣ

ବେଙ୍ଗାଲୁରୁ: ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) ପକ୍ଷରୁ ଆଜି ଏଲଭିଏମ-୩ (ବାହୁବଳୀ) ରକେଟ ଜରିଆରେ ସିଏମଏସ-୩ ଉପଗ୍ରହ ମହାକାଶକୁ ପ୍ରକ୍ଷେପଣ କରାଯିବ। ଆଜି ସନ୍ଧ୍ୟା ୫ଟା ୨୬ ମିନିଟରେ ଆନ୍ଧ୍ର ପ୍ରଦେଶର ଶ୍ରୀହରିକୋଟାସ୍ଥିତ ସତୀଶ ଧାୱନ ମହାକାଶ କେନ୍ଦ୍ରରୁ ଉପଗ୍ରହକୁ ନେଇ ଏହି ରକେଟ ମହାକାଶକୁ ଯାତ୍ରା କରିବ। ସିଏମଏସ-୩ ଉପଗ୍ରହର ଓଜନ ୪୪ କ୍ବିଣ୍ଟାଲ ହୋଇଥିବାବେଳେ ଏହା ଭାରତୀୟ ନୌସେନା ପାଇଁ ଉଦ୍ଦିଷ୍ଟ। ଇସ୍ରୋ ପକ୍ଷରୁ ଏ ପର୍ୟ୍ୟନ୍ତ ପ୍ରକ୍ଷେପିତ ଉପଗ୍ରହ ମଧ୍ୟରେ ଏହା ସବୁଠାରୁ ଓଜନିଆ ବୋଲି ଜଣାପଡିଛି।

ଏହି ଉପଗ୍ରହ କାର୍ୟ୍ୟକ୍ଷମ ହେବାପରେ ନୌସେନା ପୂର୍ବରୁ ବ୍ୟବହାର କରୁଥିବା ଜିସାଟ୍‌-୭ (ରୁକ୍ମିଣୀ) ଉପଗ୍ରହକୁ ସେବାନିବୃତ୍ତ କରାଯିବ ବୋଲି କୁହାଯାଇଛି। ଇତିପୂର୍ବରୁ ୨୦୨୩ରେ ବାହୁବଳୀ ରକେଟ ‘ଚନ୍ଦ୍ରଯାନ-୩’କୁ ନେଇ ମହାକାଶକୁ ଯାତ୍ରା କରିଥିଲା। ଏ ପର୍ୟ୍ୟନ୍ତ ଇସ୍ରୋ ପକ୍ଷରୁ ସାତଥର ବାହୁବଳୀ ରକେଟ ବ୍ୟବହୃତ ହୋଇସାରିଥିବାବେଳେ ସବୁଥର ଏହାର ପ୍ରଦର୍ଶନ ୧୦୦ ପ୍ରତିଶତ ସଫଳ ପ୍ରମାଣିତ ହୋଇଛି। ବାହୁବଳୀ ରକେଟର ଲମ୍ବ ୪୩.୫ ମିଟର ହୋଇଥିବାବେଳେ ଓଜନ ୬୪୨ ଟନ୍‌।