ଆସିଲା ଡଲଫିନ୍ ଗଣନା ରିପୋର୍ଟ

ଭୁବନେଶ୍ୱର: ଆସିଲା ଡଲଫିନ୍ ଗଣନା ରିପୋର୍ଟ । ରାଜନଗର ମଙ୍ଗରୋଭ ୱାଇଲଡ୍ ଲାଇଫ୍ ଡିଭିଜନରେ ସର୍ବାଧିକ ୫୦୫ ଟି ଡଲଫିନ୍ ଥିବାବେଳେ ଚିଲିକା ଡିଭିଜନର ଚିଲିକା ରେଞ୍ଜ ଅଞ୍ଚଳରେ ୧୭୪ ଟି ଏବଂ ପୁରୀ ରେଞ୍ଜ ଅଞ୍ଚଳରେ ୭ ଟି, ବ୍ରହ୍ମପୁର ଅଞ୍ଚଳରେ ୧୩ ଟି, ଭଦ୍ରକ ଅଞ୍ଚଳରେ ୪ ଟି ଓ ବାଲେଶ୍ୱର ରେଞ୍ଜ ଅଞ୍ଚଳରେ ୭ ଟି ଡ଼ଲଫିନ ଅଛନ୍ତି । ତେବେ ରାଜ୍ୟରେ ବର୍ତ୍ତମାନ ୪ ଟି ପ୍ରଜାତିର ଡ଼ଲଫିନ ଥିବା ଜଣାପଡିଛି ।
ଚିଲିକାରେ ୧୯୪ ଟି ଡଲଫିନ୍ ଥିବା ବେଳେ ସମଗ୍ର ଓଡିଶାରେ ୭୧୦ଟି ଡଲଫିନ୍‌ ଅଛନ୍ତି । ସେମାନଙ୍କ ମଧ୍ୟରେ ୪୯୮ଟି ହମ୍ପବ୍ୟାକ ଡଲଫିନ ଥିବା ବେଳେ ୧୮୮ ଟି ଇରାୱାଡି ଡ଼ଲଫିନ ଅଛନ୍ତି । ବନ୍ୟପ୍ରାଣୀ ବିଭାଗ ତରଫରୁ କରାଯାଇଥିବା ଡ଼ଲଫିନ ଗଣନା ପରେ ଏହି ତଥ୍ୟ ସାମ୍ନାକୁ ଆସିଛି । ୩ ଦିନ ଧରି ଏହି ଗଣନା କାର୍ୟ୍ୟ କରାଯାଇଥିଲା । ଅର୍ଥାତ ଚଳିତ ବର୍ଷ ଜାନୁଆରୀ ମାସ ୨୦, ୨୧ ଏବଂ ୨୨ ତାରିଖରେ ଏହି ଡଲଫିନ୍ ଗଣନା କାର୍ୟ୍ୟ କରାଯାଇଥିଲା ।

ସରକାରୀ ରିପୋର୍ଟ ଅନୁସାରେ, ୨୦୨୧ ମସିହାରେ ଚିଲିକାରେ ୧୬୨ ଟି ଇରାୱାଡି ଡଲଫିନ୍ ଏବଂ ୨୬ ଟି ବଟଲ୍-ନୋଜ୍ ଡଲଫିନ୍ ଥିବା ଚିହ୍ନଟ ହୋଇଥିଲା । ୨୦୨୨ ମସିହାରେ ୧୫୧ ଟି ଇରାୱାଡି ଡଲଫିନ୍ ଏବଂ ୧୬ ଟି ବଟଲ୍-ନୋଜ୍ ଡଲଫିନ୍ ଥିବାବେଳେ ୨୦୨୩ ମସିହାରେ ଚିଲିକାରେ ୧୫୪ ଟି ଇରାୱାଡି ଡଲଫିନ ଏବଂ ୧୯ ଟି ବଟଲ୍ ନୋଜ୍ ପ୍ରଜାତିର ଡଲଫିନ ଥିବା ଚିହ୍ନଟ ହୋଇଥିଲା । ଏହା ପରେ ୨୦୨୪ ମସିହାରେ ଚିଲିକାରେ ୧୫୫ ଟି ଇରାୱାଡି ଡଲଫିନ ଏବଂ ୧୯ ଟି ବଟଲ୍ ନୋଜ୍ ପ୍ରଜାତିର ଡ଼ଲଫିନ ଥିବା ଚିହ୍ନଟ ହୋଇଥିଲା । ୨୦୨୫ ମସିହାରେ ଚିଲିକା ରେ ୧୯୪ ଟି ଡ଼ଲଫିନ୍ ଥିବା ଚିହ୍ନଟ ହୋଇଛି ।