ଓଡ଼ିଶାରେ ରାଜ୍ୟସଭା ନିର୍ବାଚନ: ୧୬ ବର୍ଷ ପରେ ଲେଉଟିବ କି ‘ଘୋଡ଼ାବେପାର’!

ଭୁବନେଶ୍ୱର : ୨୦୧୦ ପରଠାରୁ ଓଡ଼ିଶାରେ ଆଉ ରାଜ୍ୟସଭା ନିର୍ବାଚନ ବେଳେ ଘୋଡ଼ାବେପାର ହୋଇନାହିଁ । ସେବେଠାରୁ ସୁରୁଖୁରୁରେ ବିଜେଡ଼ି ତା’ର ପ୍ରାର୍ଥୀମାନଙ୍କୁ ଜିତାଇ ଚାଲିଛି । ୨୦୧୪ରେ ରଞ୍ଜୀବ ବିଶ୍ୱାଳ ବିଜେଡ଼ି-ବିଜେପିକୁ ଚକମା ଦେଇ ବାଜିମାତ୍‌ କରିଥିଲେବି ସେତେବେଳେ ଘୋଡ଼ାବେପାରର ସୋରଶବ୍ଦ ନଥିଲା । କିନ୍ତୁ ପୁଣି ୧୬ ବର୍ଷ ପରେ ଓଡ଼ିଶାର ରାଜ୍ୟସଭା ନିର୍ବାଚନରେ ଘୋଡ଼ାବେପାର ହେବାର ସମ୍ଭାବନା ସୃଷ୍ଟିହୋଇଛି ।
ବିଜୁ ଜନତା ଦଳ ସୁପ୍ରିମୋ ନବୀନ ପଟ୍ଟନାୟକ ବଢ଼ିଆ ଗୋଟି ଚଳାଇଛନ୍ତି । ବିଜେଡ଼ି ପକ୍ଷରୁ ଦୁଇ ପ୍ରାର୍ଥୀ ଦିଆଯାଇଛି । ସଂତୃପ୍ତ ମିଶ୍ରଙ୍କୁ ଦଳୀୟ ପ୍ରାର୍ଥୀ ଭାବେ ଘୋଷଣା କରାଯାଇଥିବାବେଳେ ଡାକ୍ତର ଦତ୍ତେଶ୍ୱର ହୋତାଙ୍କୁ ‘କମନ କ୍ୟାଣ୍ଡିକେଟ୍‌’ ବୋଲି କହିଛନ୍ତି ନବୀନ । କିନ୍ତୁ ଏହାକୁ ନେଇ ପିସିସି ସଭାପତି ଭକ୍ତ ଚରଣ ଦାସ ଟିକେ ଅସହଜ ମନେକରିଛନ୍ତି । କାହିଁକିନା ସେ ହିଁ ନବୀନଙ୍କୁ ପ୍ରଥମେ ସ୍ୱାଧୀନ ପ୍ରାର୍ଥୀ ଠିଆ କରିବାକୁ ପ୍ରସ୍ତାବ ଦେଇଥିଲେ । ନବୀନଙ୍କ ସହ ଆଲୋଚନା ବି କରିଥିଲେ । ହେଲେ ତାଙ୍କ ଅନୁପସ୍ଥିତିରେ କମନ କ୍ୟାଣ୍ଡିଡେଟ ଘୋଷଣା କରିବା କଥାକୁ ସେ ଦେହକୁ ନେଇ ଯାଇଛନ୍ତି । ଅବଶ୍ୟ ପ୍ରାର୍ଥୀପତ୍ର ଦାଖଲ ବେଳେ ସବୁକିଛି ସ୍ପଷ୍ଟ ହୋଇଯିବ । ବିଧାନସଭାରେ ପ୍ରାର୍ଥୀପତ୍ର ଦାଖଲ ବେଳେ ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ ଓ ପିସିସି ସଭାପତି ଭକ୍ତ ଚରଣ ଦାସ ଏକାଠି ଠିଆହୋଇ ମିଡ଼ିଆକୁ ସମ୍ବୋଧିତ କରୁଛନ୍ତି ନା ନାହିଁ ତାହା ଉପରେ ବି ନଜର ରହିଛି । କାହିଁକିନା ନବୀନ ବାବୁ ତାଙ୍କ ଦେହରେ କଂଗ୍ରେସ ବାସ୍ନା ଲାଗୁ ବୋଲି ଚାହାନ୍ତିନି । ଏମିତି ସ୍ଥିତି ଆସିଲେ ନବୀନ କିଭଳି ଚୁପ୍‌ କିନା ଖସିଯିବେ ତା’ର ବାଟ ବି ରଖିଛନ୍ତି । ଏମିତିବି ସେ ରାଜ୍ୟସଭା ପ୍ରାର୍ଥୀଙ୍କ ନାମାଙ୍କନ ପତ୍ର ଦାଖଲ ଅବସରରେ ଉପସ୍ଥିତ ନରହିବାର କୌଶଳକୁ ବି ଆପଣାଇପାରନ୍ତି । ଯାହାଫଳରେ ପ୍ରସନ୍ନ ଆଚାର୍ଯ୍ୟ କିମ୍ବା ଅନ୍ୟ ନେତାଙ୍କ ସହ ମିଶି ଭକ୍ତ ପ୍ରେସକୁ ସମ୍ବୋଧିତ କରିବେ ।
ଏବେ ଆସିବା ବିଜେପି ଆଡକୁ । ବିଜେପିର ନେତାମାନେ ରାଜ୍ୟସଭା ନିର୍ବାଚନ ପୂର୍ବରୁ ବେଶ୍‌ ତୁମ୍ବିତୋଫାନ କରିଥିଲେ । ଆମେ ୩ ଆସନ ଜିତିବା ନିଶ୍ଚିତ । ସେ କୌଶଳ ଆମକୁ ଜଣାଅଛି ବୋଲି କହିଥିଲେ । ଏବେ ନବୀନ-ଭକ୍ତ କମନ କ୍ୟାଣ୍ଡିଡେଟ ଦେବାପରେ ବିଜେପି ଚିନ୍ତାରେ ପଡ଼ିଯାଇଛି । କାହିଁକିନା କଂଗ୍ରେସ-ବିଜେଡ଼ି ଏକାଠି ହୋଇ ଏମିତି ଗୋଟି ଚଳାଇବେ ବୋଲି ସେମାନେ କଳନା ବି କରିନଥିଲେ । ସଂଖ୍ୟା ଦୃଷ୍ଟିରୁ ଡାକ୍ତର ଦତ୍ତେଶ୍ୱରଙ୍କ ପଲା ବେଶ୍‌ ଭାରି ରହିଛି । ଯଦି ବିଜେପି ତୃତୀୟ ଆସନ ପାଇଁ ପ୍ରାର୍ଥୀ ନଦିଏ ତେବେ ଏହା ବିଜେପିର ନୈତିକ ପରାଜୟ । ମିଡ଼ିଆରେ ମୁହଁଭୁରୁଡ଼ି ମାରିଥିବା ନେତାମାନଙ୍କୁ ଏହା ଝଟକା କହିଲେ ଭୁଲ୍‌ ହେବନାହିଁ ।
ଏମିତିବି ବିଜେପି ପାଖରେ ୨୨ ବଳକା ଭୋଟ୍‌ ରହିଛି । କଂଗ୍ରେସ ଓ ବିଜେଡ଼ିରେ ବି ଅନେକ ଅସନ୍ତୁଷ୍ଟ ରହିଛନ୍ତି । ସରକାରୀ ଦଳ ଉଦ୍ୟମ କଲେ ଅତୀତରେ ବିଜେଡ଼ି ଭଳି ସେମାନେ ବି କମାଲ୍‌ କରିପାରିବେ । ବିଜେପି ଯଦି ତୃତୀୟ ପ୍ରାର୍ଥୀ ଦିଏ ତେବେ ପୁଣିଥରେ ଘୋଡ଼ାବେପାର ହେବା ନିଶ୍ଚିତ ।