ଗଡମାଣତୀର ପଞ୍ଚାୟତରେ ପତାକା ଉତ୍ତୋଳନ କଲେ ଜେନ-ଜୀ

ବେଗୁନିଆ : ଗଡମାଣତୀର ପଞ୍ଚାୟତର ସରପଞ୍ଚ କରୁଣାକର ଦଳସିଂହରାୟ ସ୍ୱାଧୀନତା ଦିବସ ଅବସରରେ ଏକ ଅଭିନବ ପ୍ରୟାସ କରିଛନ୍ତି । ସମ୍ପ୍ରତି ପଲ୍ଲୀରୁ ଦିଲ୍ଲୀ ପର୍ଯ୍ୟନ୍ତ ଜେନ-ଜୀଙ୍କୁ ନେଇ ଚର୍ଚ୍ଚା ଜୋର ଧରିଥିବା ବେଳେ ଯୁକ୍ତ ଦୁଇର ଛାତ୍ର ଶୁଭାଶିଷ ସାମନ୍ତରାୟଙ୍କ ଦ୍ୱାରା ପଞ୍ଚାୟତ କାର୍ଯ୍ୟାଳୟରେ ପତାକା ଉତ୍ତୋଳନ କରାଯାଇଥିଲା। ଏହି ଅବସରରେ ବରପୁତ୍ରମାନଙ୍କ ସ୍ମୃତି ଚାରଣ କରିବା ସହ ଯୁବ ଶକ୍ତି ଗାଁ ବିକାଶରେ ବ୍ରତୀ ରହିବାକୁ ଶ୍ରୀ ସାମନ୍ତରାୟ ଆହ୍ୱାନ ଦେଇଥିଲେ। ସେହିପରି ସରପଞ୍ଚ ଶ୍ରୀ ଦଳସିଂହରାୟ ତାଙ୍କ ଅଭିଭାଷଣରେ ସ୍ୱାଧୀନତା ଦିବସର ମହତ୍ତ୍ୱ ସଂକ୍ରାନ୍ତରେ ଆଲୋକପାତ କରିବା ସହ ସମୃଦ୍ଧ ଗଡମାଣତୀର ଗଢିବାକୁ ଆହ୍ୱାନ ଦେଇଥିଲେ। ଜେନ-ଜୀଙ୍କ ଦ୍ୱାରା ପତାକା ଉତ୍ତୋଳନ କରିବାର ପ୍ରୟାସ ପାଇଁ ସରପଞ୍ଚଙ୍କୁ ସମସ୍ତେ ସାଧୁବାଦ ଦେଇଥିଲେ। ଏହି ଅବସରରେ ଲୋଚନ ରାଉତରାୟ, ନିବାସ ସୁନ୍ଦରାୟ, ଶ୍ୟାମ ସୁନ୍ଦର ସାହୁ, ନେହେରୁ ରଣସିଂହ, ନିବାସ ପାଇକରାୟ ବଳରାମ ରଣସିଂହ, ଦାଶ ରାଉତରାୟ, କୁଳମଣି ମାନସିଂହ, ଏସଏଚଜି ଗ୍ରୁପର ନେତ୍ରୀମାନେ ଉପସ୍ଥିତ ଥିଲେ।