Garvita Odia
ଗୁମାମାହା: ରାଇକିଆ ବ୍ଲକ ଅନ୍ତର୍ଗତ ଗୁମାମାହା ଗ୍ରାମ ପଞ୍ଚାୟତରେ ପଞ୍ଚାୟତବାସୀଙ୍କ ବିଭିନ୍ନ ସମସ୍ୟା ଓ ଅଭିଯୋଗକୁ ନେଇ ଜନଶୁଣାଣି କାର୍ଯ୍ୟକ୍ରମ ଅନୁଷ୍ଠିତ ହୋଇଛି। ଏହି ଶୁଣାଣିରେ ମୋଟ ୧୫ଟି ଅଭିଯୋଗ ଦାଖଲ ହୋଇଥିବାବେଳେ ସେଥିମଧ୍ୟରୁ ୧୦ଟି ବ୍ୟକ୍ତିଗତ ଏବଂ ୫ଟି ସାମୂହିକ ଅଭିଯୋଗ ରହିଥିଲା। ବ୍ଲକ ପ୍ରଶାସନ ପକ୍ଷରୁ ଆୟୋଜିତ ଏହି ଶୁଣାଣିରେ ପଞ୍ଚାୟତବାସୀ ନିଜ ଅଞ୍ଚଳର ବିଭିନ୍ନ ସମସ୍ୟା ସମ୍ପର୍କରେ ଅଧିକାରୀମାନଙ୍କ ନିକଟରେ ଅଭିଯୋଗ ଉପସ୍ଥାପନ କରିଥିଲେ।କାର୍ଯ୍ୟକ୍ରମରେ ପଞ୍ଚାୟତ ସମିତି ଅଧ୍ୟକ୍ଷା ରୀନା ପ୍ରଧାନ, ଗୋଷ୍ଠୀ ଉନ୍ନୟନ ଅଧିକାରୀ ଡଃ ସବ୍ୟସାଚୀ ସାହୁ, ଜିପିଡିଓ ମହେଶ ପଟ୍ଟନାୟକ, ଏଇଇ ବଣ୍ଟି ଚୌଧୁରୀ, ଏମ୍ଆଇ ସୁଶୀର କୁମାର ବେହେରା, ବ୍ଲକ ସଂଯୋଜକ କମଳ ପ୍ରସାଦ ନାୟକଙ୍କ ସମେତ ବ୍ଲକର ବିଭିନ୍ନ ବିଭାଗର କର୍ମଚାରୀ ଯୋଗଦେଇଥିଲେ।
ଅଧିକାରୀମାନେ ପଞ୍ଚାୟତବାସୀଙ୍କଠାରୁ ଅଭିଯୋଗ ଓ ସମସ୍ୟା ସମ୍ପର୍କିତ ତଥ୍ୟ ଶୁଣିବା ସହ ସେଗୁଡ଼ିକର ସମାଧାନ ନେଇ ଆବଶ୍ୟକ ଆଲୋଚନା କରିଥିଲେ। ବ୍ୟକ୍ତିଗତ ଅଭିଯୋଗଗୁଡ଼ିକରେ ବିଭିନ୍ନ ସରକାରୀ ସୁବିଧା ଓ ଯୋଜନାରେ ହିତାଧିକାରୀଙ୍କ ସମସ୍ୟା ନେଇ ଅଭିଯୋଗ ଆସିଥିବାବେଳେ ସାମୂହିକ ଅଭିଯୋଗଗୁଡ଼ିକରେ ପଞ୍ଚାୟତର ସାଧାରଣ ସମସ୍ୟା, ଭିତ୍ତିଭୂମି ଓ ଉନ୍ନୟନମୂଳକ କାର୍ଯ୍ୟ ସମ୍ପର୍କିତ ବିଷୟ ଉପରେ ଆଲୋଚନା ହୋଇଥିଲା।ଏହା ସହ ପଞ୍ଚାୟତର ବିଭିନ୍ନ ଉନ୍ନୟନମୂଳକ କାର୍ଯ୍ୟ, ଲୋକଙ୍କୁ ମିଳୁଥିବା ସରକାରୀ ସୁବିଧା, ଭିତ୍ତିଭୂମି ସମ୍ପର୍କିତ ସମସ୍ୟା ଏବଂ ବିଭିନ୍ନ ଜନକଲ୍ୟାଣକାରୀ ଯୋଜନାରେ ହିତାଧିକାରୀଙ୍କ ସମସ୍ୟା ନେଇ ମଧ୍ୟ ଆଲୋଚନା ହୋଇଥିଲା। ଶୁଣାଣି ମାଧ୍ୟମରେ ଲୋକମାନେ ନିଜ ଅଞ୍ଚଳର ସମସ୍ୟା ସିଧାସଳଖ ଭାବେ ପ୍ରଶାସନିକ ଅଧିକାରୀଙ୍କ ନିକଟରେ ରଖିବାର ସୁଯୋଗ ପାଇଥିଲେ।ଦାଖଲ ହୋଇଥିବା ୧୫ଟି ଅଭିଯୋଗକୁ ଅଧିକାରୀମାନେ ଗୁରୁତ୍ୱର ସହ ଶୁଣିବା ସହ ନିୟମାନୁସାରେ ଯାଞ୍ଚ କରି ଆବଶ୍ୟକ ପଦକ୍ଷେପ ନିଆଯିବା ନେଇ ଆଲୋଚନା କରିଥିଲେ। ବ୍ଲକ ସ୍ତରରେ ସମାଧାନ ହୋଇପାରୁଥିବା ସମସ୍ୟାଗୁଡ଼ିକୁ ପ୍ରାଥମିକତା ଭିତ୍ତିରେ ସମାଧାନ କରିବା ସହ ଅନ୍ୟ ବିଭାଗ ସହ ସମ୍ପୃକ୍ତ ଅଭିଯୋଗଗୁଡ଼ିକୁ ସମ୍ପୃକ୍ତ ବିଭାଗର ଦୃଷ୍ଟିକୁ ଆଣିବା ନେଇ ପଦକ୍ଷେପ ନିଆଯିବ ବୋଲି ଶ୍ରୀ ସାହୁ କହିଛନ୍ତି ।ଏହି ଅବସରରେ ଗୁମାମାହା ପଞ୍ଚାୟତର ପିଇଓ ଶିବାଜୀରାଜ ପ୍ରଧାନ, ଏଡିଇଓ ପ୍ରିୟଙ୍କା ସାହୁ, ନାଏବ ସରପଞ୍ଚ ମଧୁସୂଦନ ପ୍ରଧାନଙ୍କ ସମେତ ପଞ୍ଚାୟତର ଅନ୍ୟ କର୍ମଚାରୀ ଓ ଜନପ୍ରତିନିଧିମାନେ ଉପସ୍ଥିତ ଥିଲେ।
ରିପୋର୍ଟର: ଦୁତି କୃଷ୍ଣ ପଣ୍ଡା
