Garvita Odia
କେନ୍ଦ୍ରାପଡ଼ା: କେନ୍ଦ୍ରାପଡ଼ା ମହାକାଳପଡ଼ା ବ୍ଲକ ତିଖିରୀ ପଞ୍ଚାୟତର ସରପଞ୍ଚ ଚାମେଲି ଓଝାଙ୍କ ସହ ଜଡ଼ିତ ବିବାଦ ଏବେ ଜାତୀୟ ମାନବାଧିକାର କମିସନ (NHRC) ନିକଟରେ ପହଞ୍ଚିଛି। ଘଟଣାର ତଦନ୍ତ ପାଇଁ ଅକ୍ଟୋବର ୫ରେ କେନ୍ଦ୍ରାପଡ଼ାରେ ଏକ ୩ ଜଣିଆ ଟିମ୍ ପହଞ୍ଚିବା ନେଇ ସୂଚନା ମିଳିଛି । ଏନେଇ ଦିଲ୍ଲୀସ୍ଥିତ NHRC କାର୍ଯ୍ୟାଳୟ ପକ୍ଷରୁ କେନ୍ଦ୍ରାପଡ଼ା ଏସ୍ପି ଓ ଜିଲ୍ଲାପାଳଙ୍କୁ ଚିଠି ମାଧ୍ୟମରେ ଜଣାଇଦିଆଯାଇଥିବା କୁହାଯାଇଛି।
ତଦନ୍ତ ସମୟରେ ଘଟଣା ସହ ଜଡ଼ିତ ବିଭିନ୍ନ ପକ୍ଷଙ୍କ ସହ ଆଲୋଚନା କରିବ ଟିମ୍ । ସୂଚନା ଅନୁସାରେ, ମହାକାଳପଡ଼ା ପୁଲିସ, ବିଡିଓ, ବ୍ଲକ୍ କର୍ମଚାରୀ, ଘଟଣାସ୍ଥଳରେ ଉପସ୍ଥିତ ଥିବା ପ୍ରତ୍ୟକ୍ଷଦର୍ଶୀ, ତଦନ୍ତକାରୀ ଅଧିକାରୀ ଏବଂ ଡାକ୍ତରଙ୍କୁ କମିସନଙ୍କ ଟିମ୍ ପଚରାଉଚରା କରିପାରେ। ଘଟଣା ସମ୍ପର୍କିତ ଦସ୍ତାବିଜ, ତଦନ୍ତ ଓ ଚିକିତ୍ସା ସମ୍ବନ୍ଧୀୟ ତଥ୍ୟ ମଧ୍ୟ ଯାଞ୍ଚ କରାଯିବାର ସମ୍ଭାବନା ରହିଛି । ଗତ ଜୁନ ୧୧ ତାରିଖର ଘଟଣାକୁ ନେଇ ବିବାଦ ଦେଖାଦେଇଥିଲା।
ମହାକାଳପଡ଼ା ବିଡିଓଙ୍କ ଚାମ୍ବରରେ ତାଙ୍କ ସହ ମାରପିଟ ଓ ଦୁର୍ବ୍ୟବହାର ହୋଇଥିବା ଚାମେଲି ଓଝା ଅଭିଯୋଗ କରିଥିଲେ। ଅନ୍ୟପଟେ, ଘଟଣାକୁ ନେଇ ପୁଲିସ ଓ ପ୍ରଶାସନ ପକ୍ଷରୁ ମଧ୍ୟ ଭିନ୍ନ ଅଭିଯୋଗ ରହିଥିବା ପୂର୍ବ ରିପୋର୍ଟରେ ଉଲ୍ଲେଖ ହୋଇଛି । ଘଟଣା ପରଠାରୁ ଚାମେଲି ଓଝା ନ୍ୟାୟ ଦାବି କରିଆସୁଥିବା ବେଳେ ଏବେ NHRCର ୩ ଜଣିଆ ଟିମ୍ର ତଦନ୍ତକୁ ନେଇ ଚର୍ଚ୍ଚା ବଢ଼ିଛି। ତେବେ କମିସନଙ୍କ ତଦନ୍ତ ପରେ ଘଟଣା ସମ୍ପର୍କରେ କେଉଁ ତଥ୍ୟ ସାମ୍ନାକୁ ଆସୁଛି, ତା’ଉପରେ ନଜର ରହିଛି।
