Garvita Odia
ଦେବଗଡ଼:ଜିଲ୍ଲା ସ୍ବାସ୍ଥ୍ୟ ବିଭାଗ ପକ୍ଷରୁ ଘରୋଇ ପାଥୋ ଲ୍ୟାବର ଯାଞ୍ଚ କରାଯାଇଛି। ସିଡିଏମଓ ଡା. ସଂଘମିତ୍ରା ପଣ୍ଡାଙ୍କ ନେତୃତ୍ବରେ ଏକ ଟିମ ରିଆମାଳ ବ୍ଲକର ବୁଢାପାଳ ଗ୍ରାମରେ ଥିବା କଳିଙ୍ଗ ପାଥୋ ଲ୍ୟାବ ଏବଂ ପ୍ରଧାନ ପାଥୋ ଲ୍ୟାବରେ ସ୍ବାସ୍ଥ୍ୟ ବିଭାଗ ପକ୍ଷରୁ ଅଚାନକ ପରିଦର୍ଶନ କରି ଯାଞ୍ଚ କରାଯାଇଥିଲା। ଯାଞ୍ଚ ସମୟରେ ସରକାରୀ ନିୟମ ମୁତାବକ ନଥି ପତ୍ର ପାଇନଥିବାବେଳେ ବର୍ଜବସ୍ତୁ ପରିଚାଳନାରେ ତ୍ରୁଟି ଦେଖିବାକୁ ପାଇଥିଲେ। ନିୟମ ମୁତାବକ ରୋଗୀମାନଙ୍କର ପଞ୍ଜିକରଣ ତଥା ତଥ୍ୟ ପ୍ରଦାନ କରୁନଥିବାରୁ ଏହି ସବୁ ପ୍ରକ୍ରିୟାରେ ସଂଶୋଧନ ନ କରିବା ପର୍ଯ୍ୟନ୍ତ ପାଥୋଲ୍ୟାବ ନ ଖୋଲିବାକୁ ସ୍ବାସ୍ଥ୍ୟ ବିଭାଗ ପକ୍ଷରୁ ପରାମର୍ଶ ଦିଆଯାଇଛି। ଉକ୍ତ ଟିମରେ ଅତିରିକ୍ତ ଜନସ୍ବାସ୍ଥ୍ୟ ଅଧିକାରୀ (ପରିବାର କଲ୍ୟାଣ ବିଭାଗ) ଡ.ବଂଶୀଧର ପାତ୍ର, ଭେକ୍ଟରବାହିତ ରୋଗର ପରାମର୍ଶଦାତା ନିରୁପମା ଦାଶ ଉପସ୍ଥିତ ଥିଲେ।ଏହାସହିତ ଜିଲ୍ଲାର ସମସ୍ତ ପାଥୋ ଲ୍ୟାବ ଗୁଡିକ ସରକାରୀ ନିୟମ ମୁତାବକ ପରିଚାଳନା କରିବା ପାଇଁ ସ୍ବାସ୍ଥ୍ୟ ବିଭାଗ ପକ୍ଷରୁ ପରାମର୍ଶ ଦିଆଯାଇଛି।
