Garvita Odia
ଭୁବନେଶ୍ୱର: ଷଷ୍ଠ ରାଜ୍ୟ ଅର୍ଥ କମିଶନ (ଏସଏଫ୍ସି) ସୁପାରିସ ଅନୁସାରେ ପଞ୍ଚାୟତକୁ ଦୁଇ ଗୁଣା ଅଧିକ ଅର୍ଥ ମିଳିବ । ବ୍ଲକ୍ ଓ ଜିଲ୍ଲା ପରିଷଦକୁ ମଧ୍ୟ ଅଧିକ ପାଣ୍ଠି ଦେବାକୁ ଅର୍ଥ କମିଶନ ସୁପାରିସ କରିଛନ୍ତି । ଏହି ସୁପାରିସକୁ ଲାଗୁ କରି ପାଣ୍ଠି ଦେବାକୁ ପଞ୍ଚାୟତିରାଜ ବିଭାଗ ନିଷ୍ପତ୍ତି ନେଇଛି ।
ଆସନ୍ତା ୧୫ ତାରିଖ ସୁଦ୍ଧା ଗ୍ରାମପଞ୍ଚାୟତ ଡେଭଲପମେଣ୍ଟ ପ୍ଲାନ୍ (ଜିପିଡିପି) ଅପଲୋଡ କରିବାକୁ ପଞ୍ଚାୟତିରାଜ ବିଭାଗ ପକ୍ଷରୁ ସବୁ ପଞ୍ଚାୟତ/ବ୍ଲକ୍/ଜିଲ୍ଲା ପରିଷଦକୁ ନିର୍ଦ୍ଦେଶ ଦିଆଯାଇଥିଲା । ଜୁନ୍ ୧୯ ତାରିଖରୁ ଅପଲୋଡ୍ ପ୍ରକ୍ରିୟା ଆରମ୍ଭ ହେଲାଣି । କିନ୍ତୁ ଅଧିକାଂଶ ପଞ୍ଚାୟତ ଏବେ ସୁଦ୍ଧା ଜିପିଡିପି ଅପଲୋଡ୍ କରିନାହାନ୍ତି । ଜିପିଡିପି ଆଧାରରେ ପଞ୍ଚାୟତ ଓ ଗାଁରେ ବିକାଶମୂଳକ କାମର ନକ୍ସା ଅଙ୍କାଯାଏ । ୧୫ ତାରିଖ ସୁଦ୍ଧା ଜିପିଡିପି ଅପଲୋଡ୍ ନ ହେଲେ ପଞ୍ଚାୟତରେ ବିକାଶମୂଳକ କାମ ଠପ୍ ହୋଇଯିବ । ନିର୍ଦ୍ଧାରିତ ସମୟ ଭିତରେ ଏହାକୁ ଅପଲୋଡ୍ କରିବାକୁ ସବୁ ଜିଲ୍ଲାପାଳ, ଜିଲ୍ଲା ପରିଷଦ କାର୍ଯ୍ୟନିର୍ବାହୀ ଅଧିକାରୀ ଓ ବିଡିଓଙ୍କୁ ଚିଠି ଲେଖିଛି ପଞ୍ଚାୟତିରାଜ ବିଭାଗ । ନଚେତ୍ କୌଣସି ପାଣ୍ଠି ମିଳିବନି ବୋଲି ଚେତାଇ ଦିଆଯାଇଛି ।
ରାଜ୍ୟର କେଉଁ ପଞ୍ଚାୟତ, ବ୍ଲକ୍ ଓ ଜିଲ୍ଲା ପରିଷଦକୁ କେତେ ପାଣ୍ଠି ମିଳିବ, ହିସାବ ଚୂଡ଼ାନ୍ତ କରିଛନ୍ତି ସରକାର । ଅଣ ଆଦିବାସୀ ଅଞ୍ଚଳରେ ଥିବା ପଞ୍ଚାୟତକୁ ପୂର୍ବରୁ ବାର୍ଷିକ ୭ରୁ ୮ ଲକ୍ଷ ଟଙ୍କା ପର୍ଯ୍ୟନ୍ତ ଏସଏଫ୍ସି ବା ରାଜ୍ୟ ସରକାରଙ୍କ ସୂତ୍ରରୁ ପାଣ୍ଠି ମିଳୁଥିଲା । କିନ୍ତୁ ଏହାକୁ ଦୁଇ ଗୁଣା ବଢ଼ାଇ ଦିଆଯାଇଛି । ୫ହଜାର ପର୍ଯ୍ୟନ୍ତ ଜନସଂଖ୍ୟା ରହୁଥିବା ପଞ୍ଚାୟତକୁ ବାର୍ଷିକ ୧୪ ଲକ୍ଷ ୩୯ ହଜାର ୮୨୧ ଟଙ୍କାର ଅନୁଦାନ ମିଳିବ । ୨୦୨୬-୨୭ରୁ ୨୦୩୦-୩୧ ଆର୍ଥିକ ବର୍ଷ ପର୍ଯ୍ୟନ୍ତ ବର୍ଷକୁ ଏହି ହିସାବରେ ପାଣ୍ଠି ଦିଆଯିବ । ଏବେ ୫ ହଜାର ପର୍ଯ୍ୟନ୍ତ ଜନସଂଖ୍ୟା ଥିବା ମୋଟ ୨୨୪୬ ପଞ୍ଚାୟତ ଅଛନ୍ତି । ଏହି ସବୁ ପଞ୍ଚାୟତକୁ ବର୍ଷକୁ ମୋଟ ୩୩୪ କୋଟି ୬୧ଲକ୍ଷ ୩୭ ହଜାର ଟଙ୍କାର ପାଣ୍ଠି ମିଳିବ ।
୫୦୦୧ରୁ ୭୫୦୦ ଜନସଂଖ୍ୟା ରହୁଥିବା ପଞ୍ଚାୟତକୁ ରାଜ୍ୟ ସରକାର ବାର୍ଷିକ ୧୭ ଲକ୍ଷ ୮୭ ହଜାର ଟଙ୍କାର ପାଣ୍ଠି ଦେବେ । ଏହି ବର୍ଗରେ ମୋଟ ୧୮୩୯ଟି ପଞ୍ଚାୟତ ଆସୁଛନ୍ତି । ରାଜ୍ୟ ସରକାର ଏ ସବୁ ପଞ୍ଚାୟତ ପାଇଁ ବର୍ଷକୁ ମୋଟ ୩୨୮ କୋଟି ୭୭ ଲକ୍ଷ ୩୬ ହଜାର ଟଙ୍କାର ପାଣ୍ଠି ଯୋଗାଇବେ । ୭୫୦୧ରୁ ୧୦ ହଜାର ଜନସଂଖ୍ୟା ବିଶିଷ୍ଟ ପଞ୍ଚାୟତକୁ ବାର୍ଷିକ ୧୯ ଲକ୍ଷ ୨୦ ହଜାର ୯୩୭ ଟଙ୍କାର ଅନୁଦାନ ମିଳିବ । ଏହି ବର୍ଗରେ ଆସୁଥିବା ୫୩୧ ପଞ୍ଚାୟତକୁ ବର୍ଷକୁ ମୋଟ ୧୦୨ କୋଟି ଟଙ୍କାର ପାଣ୍ଠି ଦିଆଯିବ । ୧୦ହଜାରରୁ ଅଧିକ ଜନସଂଖ୍ୟା ଥିବା ୫୦ଟି ପଞ୍ଚାୟତକୁ ୨୨ ଲକ୍ଷ ୩୪ ହଜାର ଟଙ୍କା ଲେଖାଏଁ ପାଣ୍ଠି ମିଳିବ । ଏ ବାବଦରେ ମୋଟ ୧୧ କୋଟି ୧୭ଲକ୍ଷ ଟଙ୍କାର ଅନୁଦାନ ଦିଆଯିବ । ଅଣ ଆଦିବାସୀ ଅଞ୍ଚଳରେ ଥିବା ମୋଟ ୪୬୬୬ ପଞ୍ଚାୟତକୁ ୭୭୬ କୋଟି ୫୬ଲକ୍ଷ ଟଙ୍କାର ଅନୁଦାନ ମିଳିବ ।
ଆଦିବାସୀ ଅଧ୍ୟୁଷିତ ଅଞ୍ଚଳରେ ଥିବା ଟ୍ରାଇବାଲ ସବ୍ ପ୍ଲାନ୍ (ଟିଏସପି) ପଞ୍ଚାୟତ ପାଇଁ ମଧ୍ୟ ଅଧିକ ପାଣ୍ଠିର ବ୍ୟବସ୍ଥା ହୋଇଛି । ୫ହଜାର ଜନସଂଖ୍ୟା ବିଶିଷ୍ଟ ଟିଏସ୍ପି ପଞ୍ଚାୟତ ପାଇଁ ୧୯ ଲକ୍ଷ ୩୬ ହଜାର ଲେଖାଏଁ ପାଣ୍ଠି ମିଳିବ । ଏହି ବର୍ଗରେ ଆସୁଥିବା ମୋଟ ୧୧୨୭ ପଞ୍ଚାୟତକୁ ୨୧୮ କୋଟି ୨୭ ଲକ୍ଷ ଟଙ୍କାର ଅନୁଦାନ ରାଶି ମିଳିବ । ୫୦୦୧ରୁ ୭୫୦୦ ପଞ୍ଚାୟତ ବିଶିଷ୍ଟ ୭୧୭ଟି ଟିଏସ୍ପି ପଞ୍ଚାୟତକୁ ବର୍ଷକୁ ୨୩ଲକ୍ଷ ୨୪ ହଜାର ଲେଖାଏଁ ପାଣ୍ଠି ମିଳିବ । ଏ ବାବଦରେ ରାଜ୍ୟ ସରକାର ମୋଟ ୧୬୬ କୋଟି ୬୩ ଲକ୍ଷ ଟଙ୍କାର ଅନୁଦାନ ଯୋଗାଇବେ । ୭୫୦୧ରୁ ୧୦ହଜାର ଜନସଂଖ୍ୟା ବିଶିଷ୍ଟ ପଞ୍ଚାୟତକୁ ୨୪ ଲକ୍ଷ ୯୮ହଜାର ଓ ୧୦ହଜାର ଜନସଂଖ୍ୟାରୁ ଅଧିକ ପଞ୍ଚାୟତକୁ ୨୯ ଲକ୍ଷ ୫ହଜାର ଟଙ୍କା ଲେଖାଏଁ ପାଣ୍ଠି ମିଳିବ ।
ଆଂକାକ୍ଷୀ ବ୍ଲକ୍କୁ ବର୍ଷକୁ ୧୦ ଲକ୍ଷ ୬୩ ହଜାର ଲେଖାଏଁ ପାଣ୍ଠି ଦିଆଯିବ । ଅନ୍ୟ ସବୁ ବ୍ଲକ୍କୁ ବାର୍ଷିକ ୮ ଲକ୍ଷ ୮୫ ହଜାର ଟଙ୍କାର ପାଣ୍ଠି ମିଳିବ । ସେହିଭଳି ଜିଲ୍ଲା ପରିଷଦ ପାଇଁ ଏସଏଫ୍ସି ପାଣ୍ଠିରୁ ବାର୍ଷିକ ମୋଟ ୨୦୩ କୋଟି ଟଙ୍କା ମିଳିବ । ଏହି ପାଣ୍ଠି ମିଳିବା ପାଇଁ ଅନେକ କଡ଼ା ସର୍ତ୍ତ ରହିଛି । ପୂର୍ବରୁ ଚତୁର୍ଥ ଓ ପଞ୍ଚମ ରାଜ୍ୟ ଅର୍ଥ କମିଶନ ଅଧୀନରେ ପଞ୍ଚାୟତକୁ ମିଳିଥିବା ସବୁ ଟଙ୍କା ଖର୍ଚ୍ଚ କରିଥିଲେ ହିଁ ଚଳିତ ଆର୍ଥିକ ବର୍ଷ ପାଇଁ ନୂଆ ପାଣ୍ଠି ମିଳିବ ବୋଲି ପଞ୍ଚାୟତିରାଜ ବିଭାଗ ପକ୍ଷରୁ ନିର୍ଦ୍ଦେଶନାମା ରଖାଯାଇଛି । ପୁଣି ଏସଏଫସି ପାଣ୍ଠିରୁ କୌଣସି ଧାର୍ମିକ କାମ, ମେଳା, ନୂଆ ଗାଡ଼ି କିଣି ପାରିବେନି । ଏହି ଅନୁଦାନରୁ କୌଣସି ପାରିଶ୍ରମିକ ବା ଦରମା ମଧ୍ୟ ଦେଇହେବନି ବୋଲି ବିଭାଗ ସ୍ପଷ୍ଟ କରିଛି । ଜଳବାୟୁ ସହନଶୀଳ ପାଇଁ ପ୍ରକଳ୍ପ ହାତକୁ ନେଇହେବ । ଗ୍ରୀନ ବିଲ୍ଡିଂ, ଅକ୍ଷୟ ଶକ୍ତି, ଜଳାଶୟର ପୁନରୁଦ୍ଧାର କାମ କରିହେବ ।
ସେପଟେ କିନ୍ତୁ ପଞ୍ଚାୟତକୁ ମିଳିବାକୁ ଥିବା କେନ୍ଦ୍ରୀୟ ପାଣ୍ଠିରେ ଓଡ଼ିଶା କ୍ଷତି ସହିବ । କେନ୍ଦ୍ରୀୟ ଷୋଡ଼ଶ ଅର୍ଥ କମିଶନଙ୍କ ନୂଆ ଫର୍ମୁଲା ଅନୁସାରେ ଗତବର୍ଷ ତୁଳନାରେ ଓଡ଼ିଶା ପ୍ରାୟ ୫୨୯ କୋଟି ଟଙ୍କା ହରାଇବାର ଆଶଙ୍କା ଅଛି ।
