ପୁରୁଣା ଲୁଗାରେ ପୋଛୁଛନ୍ତି କି ଘର ? ସାବଧାନ ହୋଇଯିବେ କାଙ୍ଗାଳ !

ଆମେ ପ୍ରାୟତଃ ଘରର ପୁରୁଣା ଟି-ସାର୍ଟ, ଚିରା କପଡ଼ା କିମ୍ବା ପୁରୁଣା ବାନିଆନକୁ ନଫିଙ୍ଗି ସେଥିରେ ଘର ପୋଛିବା ଆରମ୍ଭ କରିଦେଉ । ପୁରୁଣା ପୋଷାକ କାହିଁକି ଫୋପାଡ଼ିବା ଭାବି ଏହାକୁ ସଙ୍ଗେ ସଙ୍ଗେ କାମରେ ଲଗାଇଦେଉ । କିନ୍ତୁ ବାସ୍ତୁଶାସ୍ତ୍ର ଅନୁସାରେ ଏହି ଗୋଟିଏ ଭୁଲ ଆପଣଙ୍କ ଘରର ସୁଖ-ଶାନ୍ତିକୁ ଛଡ଼ାଇ ନେଇପାରେ । ଜ୍ୟୋତିଷ ଶାସ୍ତ୍ର ଅନୁସାରେ, ପୁରୁଣା, ଚିରା ଓ ଅପରିଷ୍କାର କପଡ଼ାର ସିଧାସଳଖ ସମ୍ପର୍କ ଶୁକ୍ର ଗ୍ରହ ସହିତ ରହିଛି । ଶୁକ୍ରଙ୍କୁ ସୁଖ, ସମୃଦ୍ଧି ଏବଂ ଐଶ୍ୱର୍ଯ୍ୟର କାରକ ବୋଲି କୁହାଯାଏ । ଯେତେବେଳେ ଆପଣ ଏହି ପୁରୁଣା କପଡ଼ାରେ ପୋଛା ଲଗାନ୍ତି, ଶୁକ୍ର ଗ୍ରହ ଦୁର୍ବଳ ହେବାକୁ ଲାଗେ । ଏହାର ପରିଣାମ ସ୍ୱରୂପ ଜୀବନରେ ଆର୍ଥିକ ଅନାଟନ ଏବଂ ସୁଖ-ସୁବିଧାର ଅଭାବ ଦେଖାଦିଏ।
ପୁରୁଣା କପଡ଼ାରେ କେବଳ ଧୂଳି ନଥାଏ ବରଂ ସେଥିରେ ପୁରୁଣା ନକାରାତ୍ମକ ଶକ୍ତି ମଧ୍ୟ ଜମା ହୋଇ ରହିଥାଏ । ଯେତେବେଳେ ଆପଣ ସେଥିରେ ପୂରା ଘର ସଫା କରନ୍ତି ସେହି ଅଶୁଭ ଶକ୍ତି ଘରର ପ୍ରତିଟି କୋଣକୁ ବ୍ୟାପିଯାଏ । ଏହାଦ୍ୱାରା ପରିବାର ସଦସ୍ୟଙ୍କ ମଧ୍ୟରେ କଳି-ଝଗଡ଼ା, ମାନସିକ ଚାପ ଏବଂ ଚିଡ଼ିଚିଡ଼ାପଣ ବୃଦ୍ଧି ପାଇଥାଏ । ବାସ୍ତୁ ବିଶେଷଜ୍ଞଙ୍କ ମତରେ ଏଭଳି କପଡ଼ାର ବ୍ୟବହାର ଘରେ ସକାରାତ୍ମକ ଊର୍ଜାର ପ୍ରବାହକୁ ରୋକିଦିଏ । ଏହା ଘରର ମୁଖିଆଙ୍କ ଉନ୍ନତିରେ ବାଧା ସୃଷ୍ଟି କରେ ଏବଂ ଭଲ ଚାଲିଥିବା କାମ ମଧ୍ୟ ଶେଷ ମୁହୂର୍ତ୍ତରେ ବିଗିଡ଼ି ଯାଏ । କେବଳ ଏତିକି ନୁହେଁ ସ୍ୱାସ୍ଥ୍ୟ ଦୃଷ୍ଟିକୋଣରୁ ମଧ୍ୟ ଏହା ବିପଜ୍ଜନକ । ପୁରୁଣା କପଡ଼ାରେ ଥିବା ବ୍ୟାକ୍ଟେରିଆ ରୋଗର କାରଣ ସାଜିପାରେ ।

ତେଣୁ ଘର ସଫା କରିବା ପାଇଁ ସବୁବେଳେ ବଜାରରୁ ମିଳୁଥିବା ସଫା ଓ ନୂଆ ପୋଛା ବ୍ୟବହାର କରନ୍ତୁ । ପୁରୁଣା କପଡ଼ାକୁ ସଫା କରି କୌଣସି ଅଭାବୀ ଲୋକଙ୍କୁ ଦାନ କରନ୍ତୁ କିମ୍ବା ସେଗୁଡ଼ିକୁ ସଠିକ୍ ଭାବେ ଡିସପୋଜ୍ କରନ୍ତୁ । ପୋଛା ଲଗାଇବା ସମୟରେ ପାଣିରେ ଟିକେ ଲୁଣ ମିଶାନ୍ତୁ । ଏହା ଘରର ସମସ୍ତ ବାସ୍ତୁ ଦୋଷ ଦୂର କରି ସକାରାତ୍ମକତା ପରିବେଶ ସୃଷ୍ଟି କରିଥାଏ । ପୁରୁଣା କପଡ଼ାକୁ ସାଇତିବା ଭଲ କିନ୍ତୁ ଭାଗ୍ୟ ସହିତ ବାଜି ଲଗାଇ ନୁହେଁ । ତେଣୁ ଆଜିଠାରୁ ହିଁ ପୁରୁଣା କପଡ଼ାରେ ଘର ସଫା କରିବା ବନ୍ଦ କରନ୍ତୁ ଏବଂ ଘରକୁ ସୁଖ-ସମୃଦ୍ଧିରେ ଭରି ଦିଅନ୍ତୁ ।