Garvita Odia
ନବରଙ୍ଗପୁର: ଅଲଗା ଜାତିରେ ଝିଅର ନିର୍ବନ୍ଧ କରିବା ପୂର୍ବତନ ବିଧାୟକ ସଦାଶିବ ପ୍ରଧାନୀଙ୍କୁ ମହଙ୍ଗା ପଡ଼ିଛି । ସମାଜ ନିୟମ ଉଲ୍ଲଂଘନ ଅଭିଯୋଗରେ ଅଖିଳ ଭାରତୀୟ ଭତରା ପରିଷଦ ତାଙ୍କ ପରିବାରକୁ ଜାତିରୁ ବାସନ୍ଦ କରିଛି । ବିଧାୟକଙ୍କ ପରିବାର ସଦସ୍ୟଙ୍କ ଭଲମନ୍ଦରେ ସମାଜ ସାମିଲ ହେବନି ବୋଲି ଜିଲ୍ଲା ସଭାପତି ଜଗନ୍ନାଥ ମାଝୀ କହିଛନ୍ତି ।
ଶ୍ରୀ ପ୍ରଧାନୀଙ୍କ ଝିଅର ବିବାହ ଅନ୍ୟ ଜାତିର ଜଣେ ଯୁବକଙ୍କ ସହ ହେବ । ନିର୍ବନ୍ଧ ପରେ ପ୍ରତିକ୍ରିୟା ପ୍ରକାଶ କରିଛି ଅଖିଳ ଭାରତୀୟ ଭତରା ପରିଷଦ । ଝରିଗାଁ ବ୍ଲକ ଧାମଣାଗୁଡ଼ା ଦନ୍ତେଶ୍ୱରୀ ମନ୍ଦିର ପରିସରରେ ଆଜି ବସିଥିଲା ସମାଜର ବୈଠକ । ଏଥିରେ ଜିଲ୍ଲାର ବିଭିନ୍ନ ବ୍ଲକ ସଭାପତି, ସମ୍ପାଦକ, ସମାଜର ନାଇକ, ପାଇକ ଯୋଗ ଦେଇଥିଲେ । ଜିଲ୍ଲା ସଭାପତି ଶ୍ରୀ ମାଝୀ, ଉପସଭାପତି ରାମଧର ମାଝୀ, ସମ୍ପାଦକ ପ୍ରତାପ ଚନ୍ଦ୍ର ନାୟକ, ଗୋପୀନାଥ ମାଝୀ ପ୍ରମୁଖଙ୍କ ସହ ସମାଜର ସଦସ୍ୟମାନେ ଏହି ନିର୍ବନ୍ଧକୁ ବିରୋଧ କରିଥିଲେ । ଆଲୋଚନା ପରେ ଉପରୋକ୍ତ ନିଷ୍ପତ୍ତି ଶୁଣାଇଥିଲେ ।
ଏ ସମ୍ପର୍କରେ ଶ୍ରୀ ପ୍ରଧାନୀ କହିଛନ୍ତି, ଝିଅର ସାମ୍ବିଧାନିକ ଅଧିକାର ରହିଛି । ବାପା ହୋଇ ସେ ଏହାକୁ କ୍ଷୁଣ୍ଣ କରିପାରିବେନି । ଝିଅ ଓ ଭାବି ଜ୍ୱାଇଁ ଉଚ୍ଚଶିକ୍ଷିତ । ସେମାନେ ଗୋଟିଏ କମ୍ପାନିରେ କାମ କରୁଛନ୍ତି । ଉଭୟ ପରିବାର ସହମତିରେ ବିବାହ ପାଇଁ ନିଷ୍ପତ୍ତି ନିଆଯାଇଛି । ସୂଚନାଥାଉକି, ଅନ୍ୟ ଜାତିରେ ପରିବାର ସଦସ୍ୟଙ୍କ ବିବାହ ଲାଗି ଜିଲ୍ଲାର କେତେକ ନେତା ପୂର୍ବରୁ ଚର୍ଚ୍ଚିତ ଥିଲେ । ସେମାନେ ହେଲେ ପୂର୍ବତନ ବିଧାୟକ ସଦନ ନାୟକ, ଡାବୁଗାଁ ବିଧାୟକ ମନୋହର ରନ୍ଧାରୀ, ପୂର୍ବତନ ସାଂସଦ ପ୍ରଦୀପ ମାଝୀ, ପୂର୍ବତନ ଜିଲ୍ଲା ପରିଷଦ ଅଧ୍ୟକ୍ଷା ମଞ୍ଜୁଳା ମାଝୀ ପ୍ରମୁଖ । ସେମାନଙ୍କୁ ମଧ୍ୟ ଭତରା ସମାଜ ବାସନ୍ଦ କରିଥିଲା । ପରେ ସେମାନେ ସମ୍ପ୍ରଦାୟର ନୀତି, ନିୟମ ଓ ସାମାଜିକ ପ୍ରଥାକୁ ଆପଣାଇ ଜାତିକୁ ଫେରିଥିଲେ ।
