ବାଲି ଟ୍ରକ୍‌ ଧକ୍କାରେ ଦମ୍ପତି ମୃତ

ଫୁଲନଖରା, 22/08: କଟକ ଜିଲା ସଦର ଥାନା ଅନ୍ତର୍ଗତ ୧୬ନମ୍ବର ଜାତୀୟ ରାଜପଥର େଗାପାଳପୁର ନିକଟରେ ଗୁରୁବାର ସନ୍ଧ୍ୟାରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏକ ବାଲି ବୋଝେଇ ଟ୍ରକ୍‌ ଧକ୍କାରେ ବାଇକ ଆରୋହୀ ଦମ୍ପତିଙ୍କ ଘଟଣାସ୍ଥଳରେ ହିଁ ମୃତ୍ୟୁ ଘଟିଛି। ମୃତକଦ୍ବୟ ଭୁବନେଶ୍ବର ଉତ୍ତରା ଅଞ୍ଚଳର ଦେବୀପ୍ରସାଦ ପାଲ ଓ ତାଙ୍କ ପତ୍ନୀ ସସ୍ମିତା ବିଶ୍ବାଳ। େଦବୀପ୍ରସାଦଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା ବେଳେ ସସ୍ମିତାଙ୍କ ଶରୀର ସଡ଼କରେ ପୂରା ମିଶି ଯାଇଛି।
ପୁଲିସ ସୂତ୍ରରୁ ପ୍ରକାଶ, କଟକରୁ ଭୁବନେଶ୍ୱର ଅଭିମୁଖେ ଦେବୀପ୍ରସାଦ ଓ ପତ୍ନୀ ସସ୍ମିତା ଏକ ବାଇକରେ ଯାଉଥିଲେ। କାଠଯୋଡ଼ି ପୋଲ ଶେଷ ଭାଗ ଗୋପାଳପୁର ଠାରେ ପଛପଟରୁ ଏକ ବାଲି ବୋଝେଇ ଟ୍ରକ ସେମାନଙ୍କୁ ଧକ୍କା େଦଇଥିଲେ। ଫଳରେ ଦମ୍ପତି ରାସ୍ତାରେ ଛିଟିକି ପଡ଼ିଥିଲେ। ଟ୍ରକ ସେମାନଙ୍କ ଉପରେ ମାଡ଼ି ଯାଇଥିଲା। ସଦର ଥାନା ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ କଟକ ବଡ଼ ଡାକ୍ତରଖାନା ପଠାଇଛି। ଏହି ଘଟଣାକୁ ନେଇ ଗୋପାଳପୁର ଛକରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ଦୀର୍ଘ ସମୟ ଧରି ରାଜପଥରେ ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା। ବରିଷ୍ଠ ପୁଲିସ ଅଧିକାରୀ ପହଞ୍ଚି ରାସ୍ତା ଅବରୋଧକାରୀ ଉତ୍ତ୍ୟକ୍ତଙ୍କୁ ବୁଝାସୁଝା କରିବା ପରେ ରାତି ୧୦ଟା ପରେ ଗାଡ଼ି ଚଳାଚଳ ସ୍ୱାଭାବିକ ହୋଇଥିଲା। ସୂଚନାଯୋଗ୍ୟ, ଗତ ଜାନୁଆରୀରୁ ଅଗଷ୍ଟ ମାସ ମଧ୍ୟରେ ଫୁଲନଖରାଠାରୁ ଗୋପାଳପୁର ମାତ୍ର ୯ କିଲୋମିଟର ଜାତୀୟ ରାଜପଥରେ ୨୦ଟି ଦୁର୍ଘଟଣା ଘଟି ୭ଜଣଙ୍କ ଜୀବନ ଗଲାଣି। ଶତାଧିକ ଆହତ ହୋଇଛନ୍ତି। ସମସ୍ତ ମୃତକ ଟ୍ରକ ଧକ୍କାରେ ହିଁ ପ୍ରାଣ ହରାଇଥିବା ଜଣାଯାଇଛି।