ବିଜେପି ବିଶୃଙ୍ଖଳା ଆଉ ବେଗୁନିଆ

ବେଗୁନିଆ:ଖବରର ଶୀର୍ଷକ ଟିକେ ଅଡୁଆ ଲାଗିଲେବି ବେଗୁନିଆ ନିର୍ବାଚନ ମଣ୍ଡଳୀରେ ଏଭଳି କିଛି ଘଟଣା ଘଟିବାରେ ଲାଗିଛି । ରାଜ୍ୟରେ ବିଜେପି ଶାସନକୁ ଆସିବା ପରେ ବେଗୁନିଆର ବିଜେପି ନେତା କେତେ କଣ ସ୍ବପ୍ନ ଦେଖିଥିଲେ । କିନ୍ତୁ ସମୟ ଯେତିକି ଅତିକ୍ରାନ୍ତ ହେଲା ସେତିକି ବିଜେପି ଦଳ ପାଇଁ ଟେନସନ ବଢ଼ାଇଲା ବେଗୁନିଆରେ । ବେଗୁନିଆ ନିର୍ବାଚନ ମଣ୍ଡଳୀ ବିଜେପି ନେତା ତଥା ବିଧାୟକ ପାର୍ଥି ଥିବା ପ୍ରକାଶ ବିଜୁଳି ନିଜ ଅପାରଗତା ପାଇଁ ଦଳରେ ଏକ ପ୍ରକାର କଣଠେସା ହୋଇ ପଡ଼ିଛନ୍ତି । ପ୍ରକାଶ ଓ ବେଗୁନିଆ ବିଡ଼ିଓଙ୍କ ବାର୍ତାଳାପ ସାମାଜିକ ଗଣମାଧ୍ୟମରେ ଭାଇରଲ ହେବାପର ଠୁ ସେ ଆଉ ନିର୍ବାଚନ ମଣ୍ଡଳୀରେ ଦେଖା ଯାଉନାହାନ୍ତି କିମ୍ବା ଯୋଗାଯୋଗ କଲେ ତାହା ସମ୍ଭବ ହୋଇ ପାରୁନାହିଁ । ପ୍ରକାଶ ତାଙ୍କର କିଛି ହାତଗଣତି କର୍ମୀଙ୍କୁ ନେଇ କେବଳ ବିଭିନ୍ନ ସ୍ଥାନ ପରିଭ୍ରମଣ କରୁଥିବା ଦେଖିବାକୁ ମିଳୁଛି । ସେପଟେ ବେଗୁନିଆ ନିର୍ବାଚନ ମଣ୍ଡଳୀରେ ଦୀର୍ଘଦିନ ଧରି ସୁପ୍ତ ଥିବା ଯତୀନ ମହାନ୍ତିଙ୍କ ଟିମ ଧୀରେ ଧୀରେ ସକ୍ରିୟ ହେବାରେ ଲାଗିଛନ୍ତି । ଯତୀନ ବାବୁ ଆଗ ଆପେକ୍ଷା ଏବେ ବେଗୁନିଆ ବୋଲଗଡ଼ ଅଞ୍ଚଳକୁ ଆସି ନିଜ ପୁରୁଣା କର୍ମକର୍ତାଙ୍କୁ ଧରି ଛୋଟ ଛୋଟ କାର୍ଯ୍ୟକ୍ରମ ଆୟୋଜନ କରି ନିଜ ସ୍ଥିତି ଜାହିର କରୁଛନ୍ତି । ସେହିପରି ବିଜେପି ଦଳକୁ ମଜଭୁତ କରିବା ସହ ବେଗୁନିଆରେ ବିଜେଡି ଗଡ଼ ଭାଙ୍ଗିବା ପାଇଁ ଖୋର୍ଦ୍ଧା ବିଧାୟକ ବେଗୁନିଆରେ ନିଜ ଦବଦବା ଜାହିର କରି ଆସୁଥିବା ଦେଖିବାକୁ ମିଳୁଛି । ଦଳକୁ ମଜଭୁତ କରିବା ବଦଳରେ ବିଧାୟକ ପାର୍ଥି ପ୍ରକାଶ ବିଜୁଳି ସେତେଟା ସକ୍ଷମ ହୋଇପାରି ନଥିବା ବେଳେ ଭୁବନେଶ୍ୱର ସାଂସଦ ଖୋର୍ଦ୍ଧା ବିଧାୟକଙ୍କୁ ବେଗୁନିଆ ନିର୍ବାଚନ ମଣ୍ଡଳୀ ଦାୟିତ୍ୱ ଦେଇଥିଲେ । ଆଉ ସେବେଠୁ ଖୋର୍ଦ୍ଧା ବିଧାୟକଙ୍କ ଉପରେ ରକ୍ତ ଚାଉଳ ଚୋବାଇ ବିଷ ଓଗାଳି ନିଜେ ହଟହଟା ହୋଇଛନ୍ତି ପ୍ରକାଶ । ଦଳ ଭିତରେ ବିଶୃଙ୍ଖଳା ଓ ଅସନ୍ତୋଷ ବଢୁଥିବା ବେଳେ ଜିଲା ସଭାପତି ଓ ରାଜ୍ୟ ସଭାପତି ସବୁ ଜାଣି ଚୁପ ରହିଛନ୍ତି । ବେଗୁନିଆ ନିର୍ବାଚନ ମଣ୍ଡଳୀରେ ଦଳକୁ ମଜଭୁତ କରିବା ପାଇଁ ଦୃଢ଼ ନେତୃତ୍ୱ ଓ ସଂଗଠକଙ୍କ ଆବଶ୍ୟକ ଥିବା ବେଳେ ଦଳ ଭିତରେ ତୁ ତୁ ମେ ମେ ଭଳି ତିନି ନେତାଙ୍କ ଆବିର୍ଭାବ ଏବେ କର୍ମକର୍ତାଙ୍କୁ ଚିନ୍ତାରେ ପକାଇଛି । ଆଗକୁ ସଂଗଠନର କର୍ମକର୍ତ୍ତା ଚୟନ ରହିଥିବା ବେଳେ ଏହାକୁ ନେଇ ସମସ୍ତେ ଚୁପ ଅଛନ୍ତି ବୋଲି ଆକଳନ କରାଯାଉଛି । ତେବେ ସାଙ୍ଗଠନିକ କର୍ମକର୍ତା ଚୟନ ପରେ କାହାର କେଉଁ ପ୍ରକାର କାର୍ଯ୍ୟ ଶୈଳୀ ରହୁଛି ତାହା ଦେଖିବାକୁ ବାକି ରହିଲା । ସେହିଭଳି ବେଗୁନିଆରେ ପ୍ରକାଶ, ପ୍ରଶାନ୍ତ ଓ ଯତୀନଙ୍କ ଜଟିଳ ଗଣିତକୁ ଦଳ କିଭଳି ସମାଧାନ କରିବ ତାହା ସମୟ କହିବ ବୋଲି ଆକଳନ କରିଛନ୍ତି ବେଗୁନିଆର ବୁଦ୍ଧିଜୀବୀ ।