Garvita Odia
କଟକ: ଦୀର୍ଘ ଦୁଇ ବର୍ଷ ହେଲା ଘୁଞ୍ଚୁଥିବା ପଦୋନ୍ନତି ଫାଇଲ୍ରେ ଶେଷରେ ମୋହର ବାଜିଛି । ୨୦୧୩ରୁ ଇନ୍ସପେକ୍ଟର ଭାବେ କାର୍ୟ୍ୟ କରିଆସୁଥିବା ୧୩୦ ଜଣ ଅଧିକାରୀ ଓ ଅନ୍ୟ ବ୍ୟାଚ୍ର ୩୮ ଜଣ ଇନ୍ସପେକ୍ଟରଙ୍କୁ ମିଶାଇ ମୋଟ ୧୬୮ ଜଣ ଡିଏସ୍ପି ପାହ୍ୟାକୁ ପଦୋନ୍ନତି ପାଇଛନ୍ତି । ଏ ସଂକ୍ରାନ୍ତରେ ପୁଲିସ୍ ମୁଖ୍ୟାଳୟ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ଡିଏସ୍ପି ପାହ୍ୟାକୁ ପଦୋନ୍ନତି ପାଇଥିବା ଅଧିକାରୀମାନଙ୍କ ବଦଳି ନେଇ ଖୁବ୍ଶୀଘ୍ର ପୁଲିସ ମୁଖ୍ୟାଳୟ ପକ୍ଷରୁ ନିଷ୍ପତ୍ତି ନିଆଯିବ । ଡିଏସ୍ପି ପାହ୍ୟା ଓ ଖାଲି ହେବାକୁ ଥିବା ଇନ୍ସପେକ୍ଟର ପଦବି ପୂରଣ ପାଇଁ ରାଜ୍ୟରେ ଏକ ବଡ଼ ଅଦଳବଦଳ କରାଯିବ । ଦୀର୍ଘ ବର୍ଷ ଜିଲ୍ଲାସ୍ତରରେ ଏବଂ ପୁଲିସର ବିଭିନ୍ନ ଏଷ୍ଟାବ୍ଲିସ୍ମେଣ୍ଟରେ ଗାଦି ମାଡ଼ି ବସିଥିବା ଅଫିସରମାନେ ମଧ୍ୟ ବଦଳିବେ । ବଦଳି ଓ ପୋଷ୍ଟିଂ ଲାଗି ପୁଲିସ ମୁଖ୍ୟାଳୟ ପକ୍ଷରୁ କମିଟି ହିଁ ସ୍ଥିର କରିବ । ଏଥିଲାଗି ଖୁବ୍ଶୀଘ୍ର କମିଟି ବୈଠକ ଲାଗି ସଦସ୍ୟମାନଙ୍କୁ ଡକାଯିବ । ତଦନ୍ତରେ ଇନ୍ସପେକ୍ଟର ଓ ଡିଏସ୍ପିମାନଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଛି । ନୂଆ ସରକାର ଗଠନ ପରେ ଇନ୍ସପେକ୍ଟର ଓ ଡିଏସ୍ପି ପାହ୍ୟାରେ ବଡ଼ ଧରଣର ଅଦଳବଦଳ ହୋଇନାହିଁ । ତେଣୁ ଇନ୍ସପେକ୍ଟର ଓ ଡିଏସ୍ପି ପାହ୍ୟାର ଅଧିକାରୀ ମନପସନ୍ଦ ଜାଗାରେ ପୋଷ୍ଟିଂ ପାଇଁ ଜୋର୍ଦାର ଲବି ଆରମ୍ଭ କରିଛନ୍ତି । ଏହାବାଦ୍ ପୁଲିସ ମୁଖ୍ୟାଳୟରେ ଡିଜିଙ୍କ ଅଭିଯୋଗ ପ୍ରକୋଷ୍ଠରେ ଇନ୍ସପେକ୍ଟର ଓ ଡିଏସ୍ପି ପାହ୍ୟାରେ ଜିଲ୍ଲା ଓ ଗୋଟିଏ ଏଷ୍ଟାବ୍ଲିସ୍ମେଣ୍ଟ୍ରୁ ଅନ୍ୟ ଏଷ୍ଟାବ୍ଲିସମେଣ୍ଟକୁ ବଦଳି ପାଇଁ ୭୦ରୁ ଅଧିକ ଅଧିକାରୀଙ୍କ ଆବେଦନପତ୍ର ଗଦା ହୋଇଛି । ଖାଲି ହେବାକୁ ଥିବା ଇନ୍ସପେକ୍ଟର ପଦବି ଆଗ ପୂରଣ କରାଯିବ । ଇନ୍ସପେକ୍ଟରଙ୍କ ବଦଳି ଅର୍ଡର ବାହାରିବା ପରେ ଡିଏସ୍ପି ପଦବିରେ ଅଦଳବଦଳ କରାଯିବ ।ଉଲ୍ଲେଖଯୋଗ୍ୟ, ୨୦୦୫ ବ୍ୟାଚ୍ର ପୁଲିସ ଅଫିସରଙ୍କର ଇନ୍ସପେକ୍ଟର ପାହ୍ୟାକୁ ୨୦୨୧ରେ ପଦୋନ୍ନତି ଆରମ୍ଭ ହୋଇଥିଲା । ୨୦୨୧ରେ ପ୍ରଥମେ ଏସ୍ସି, ଏସ୍ଟି ବର୍ଗରୁ ୨୦ରୁ ଅଧିକ ଇନ୍ସପେକ୍ଟର ପଦୋନ୍ନତି ପାଇଥିବା ବେଳେ ୨୦୨୩ରେ ୮୦ ଜଣ ପଦୋନ୍ନତି ପାଇଥିଲେ । ଅବଶିଷ୍ଟ ୧୩୦ ଇନ୍ସପେକ୍ଟର ଦୁଇ ବର୍ଷ ହେଲା ପଦୋନ୍ନତି ପାଇବାରୁ ବଞ୍ଚିତ ହୋଇଆସୁଥିଲେ । ଏହାକୁ ନେଇ ଇନ୍ସପେକ୍ଟରଙ୍କ ମଧ୍ୟରେ ପ୍ରବଳ ଅସନ୍ତୋଷ ଲାଗିରହିଥିଲା । ଶେଷରେ ପଦୋନ୍ନତି ଫାଇଲ୍ରେ ମୋହର ବାଜିଛି ।
