Garvita Odia
ନୂଆଦିଲ୍ଲୀ: ବିଶ୍ୱ ଶାନ୍ତି ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବଡ଼ ପ୍ରୟାସକୁ ଶକ୍ତ ଧକ୍କା ଲାଗିଛି । ଇସ୍ରାଏଲ୍ ଏବଂ ଲେବାନନ୍ ମଧ୍ୟରେ ହୋଇଥିବା ୧୦ ଦିନିଆ ଅସ୍ତ୍ରବିରତି ବା ‘ସିଜଫାୟାର୍’ ୧୦ ଘଣ୍ଟା ମଧ୍ୟ ଅତିକ୍ରମ କରିପାରିନାହିଁ । ଶୁକ୍ରବାର ଅର୍ଥାତ୍ ଆଜି ଭୋର ସମୟରେ ଇସ୍ରାଏଲ୍ ପକ୍ଷରୁ ସୀମା ଉଲ୍ଲଂଘନ କରାଯାଇଥିବା ନେଇ ଲେବାନନ୍ ସେନା ସଙ୍ଗୀନ ଅଭିଯୋଗ ଆଣିଛି । ଆମେରିକାର ମଧ୍ୟସ୍ଥିତାରେ ଗୁରୁବାର ମଧ୍ୟରାତ୍ରିରୁ ଏହି ଅସ୍ତ୍ରବିରତି ଲାଗୁ ହୋଇଥିଲା । କିନ୍ତୁ ଲେବାନନ୍ ସେନାର ଦାବି ଅନୁଯାୟୀ, ଶୁକ୍ରବାର ସକାଳୁ ଇସ୍ରାଏଲ୍ ସୈନ୍ୟମାନେ ଦକ୍ଷିଣ ଲେବାନନ୍ର ଅନେକ ଗାଁ ଉପରେ ଗୋଳାବାରୁଦ ମାଡ଼ କରିଛନ୍ତି । ଏହି କାରଣରୁ ଲେବାନନ୍ ସରକାର ନିଜ ନାଗରିକମାନଙ୍କୁ ବର୍ତ୍ତମାନ ପାଇଁ ନିଜ ଗାଁକୁ ନଫେରିବାକୁ ସତର୍କ କରାଇ ଦେଇଛନ୍ତି ।
ଇସ୍ରାଏଲ୍ ସାମରିକ ପ୍ରବକ୍ତା ଅଭିଚାଇ ଅଦ୍ରାଇ ସ୍ପଷ୍ଟ କରିଛନ୍ତି ଯେ, ଲେବାନନ୍ ଭିତରେ ପଶିଥିବା ଇସ୍ରାଏଲ୍ ସୈନ୍ୟମାନେ ପଛକୁ ହଟିନାହାନ୍ତି । ‘ହିଜବୁଲ୍ଲା’ର ଆତଙ୍କବାଦୀ କାର୍ୟ୍ୟକଳାପକୁ ଦୃଷ୍ଟିରେ ରଖି ସେନା ନିଜ ସ୍ଥିତି ବଜାୟ ରଖିଛି । ଇସ୍ରାଏଲ୍ ସେନା ପକ୍ଷରୁ ଚେତାବନୀ ଦିଆଯାଇଛି ଯେ, ପରବର୍ତ୍ତୀ ସୂଚନା ନମିଳିବା ପର୍ୟ୍ୟନ୍ତ କୌଣସି ସାଧାରଣ ନାଗରିକ ଯେପରି ଲିତାନୀ ନଦୀର ଦକ୍ଷିଣ ଭାଗକୁ ନଯାଆନ୍ତି ।
ଅସ୍ତ୍ରବିରତି ଉଲ୍ଲଂଘନ ଖବର ମଧ୍ୟରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜର ସୋସିଆଲ୍ ମିଡିଆ ପ୍ଲାଟଫର୍ମ ‘ଟ୍ରୁଥ୍ ସୋସିଆଲ୍’ରେ ଏକ ଗୁରୁତ୍ୱପୂର୍ଣ୍ଣ ପୋଷ୍ଟ କରିଛନ୍ତି । ସେ ଆଶା ପ୍ରକାଶ କରିଛନ୍ତି ଯେ, ଏହି ୧୦ ଦିନିଆ ଶାନ୍ତି କାଳରେ ହିଜବୁଲ୍ଲା ଭଲ ବ୍ୟବହାର ଦେଖାଇବ । ଟ୍ରମ୍ପ ଲେଖିଛନ୍ତି, “ଆଉ ହତ୍ୟାକାଣ୍ଡ ନୁହେଁ, ବରଂ ଶାନ୍ତି ପ୍ରତିଷ୍ଠା ହେବା ଉଚିତ୍ । ଯଦି ହିଜବୁଲ୍ଲା ଶାନ୍ତ ରହେ, ତେବେ ଏହା ସେମାନଙ୍କ ପାଇଁ ଏକ ବଡ଼ ସୁଯୋଗ ହେବ ।”
ସୂଚନାଯୋଗ୍, ଗତ ୩୦ ବର୍ଷ ମଧ୍ୟରେ ପ୍ରଥମ କରି ଇସ୍ରାଏଲ୍ ଏବଂ ଲେବାନନ୍ର ରାଜଦୂତମାନେ ୱାଶିଂଟନ ସିଧାସଳଖ ଆଲୋଚନା କରିଥିଲେ । ଟ୍ରମ୍ପ ଏବଂ ବୈଦେଶିକ ମନ୍ତ୍ରୀ ମାର୍କୋ ରୁବିଓଙ୍କ ବାରମ୍ବାର ଫୋନ୍ କଲ୍ ପରେ ଏହି ସନ୍ଧି ସମ୍ଭବ ହୋଇଥିଲା । ମାତ୍ର ବର୍ତ୍ତମାନର ଗୋଳାବାରୁଦ ମାଡ଼ ଏହି ଐତିହାସିକ ପ୍ରୟାସ ଉପରେ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି । ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ କହିଛନ୍ତି ଯେ, ସେ ଶାନ୍ତି ପ୍ରୟାସକୁ “ଆଗକୁ ବଢ଼ାଇବା” ପାଇଁ ଏହି ଅସ୍ତ୍ରବିରତିରେ ସମ୍ମତି ପ୍ରକାଶ କରିଛନ୍ତି । ତେବେ ସେ ସ୍ପଷ୍ଟ କରିଛନ୍ତି ଯେ, ଇସ୍ରାଏଲ୍ ସୈନ୍ୟମାନେ ଲେବାନନ୍ ସୀମା ଭିତରେ ଥିବା ‘ସୁରକ୍ଷା ଜୋନ୍’ ରୁ ବର୍ତ୍ତମାନ ପଛକୁ ହଟିବେ ନାହିଁ । ଲେବାନନ୍ ପ୍ରଧାନମନ୍ତ୍ରୀ ନୱାଫ୍ ସଲାମ ଏହି ଘୋଷଣାକୁ ସ୍ୱାଗତ କରିଛନ୍ତି । ସେ କହିଛନ୍ତି ଯେ, “ଯୁଦ୍ଧର ପ୍ରଥମ ଦିନରୁ ହିଁ ଅସ୍ତ୍ରବିରତି ଲେବାନନ୍ର ଏକ ପ୍ରମୁଖ ଦାବି ରହିଆସିଥିଲା ।” ଆମେରିକାରେ ଇସ୍ରାଏଲ୍ ଏବଂ ଲେବାନନ୍ ଅଧିକାରୀଙ୍କ ମଧ୍ୟରେ ହୋଇଥିବା ବୈଠକର ଏହା ହିଁ ମୁଖ୍ୟ ଲକ୍ଷ୍ୟ ଥିଲା ବୋଲି ସେ ପ୍ରକାଶ କରିଛନ୍ତି ।
