Garvita Odia
ଆବୁଧାବି: ସଂଯୁକ୍ତ ଆରବ ଏମିରେଟ୍ସ(ୟୁଏଇ) ଆମେରିକା-ଇରାନ ଯୁଦ୍ଧରେ ସିଧାସଳଖ ସାମିଲ ହେବାକୁ ପ୍ରସ୍ତୁତି କରୁଛି । ହୋର୍ମୁଜ ପ୍ରଣାଳୀକୁ ଜବରଦସ୍ତ ଖୋଲିବାକୁ ଏହା ଆମେରିକାକୁ ସହାୟତା କରିବ ବୋଲି ଏକ ରିପୋର୍ଟରେ ଦାବି କରାଯାଇଛି । ୱାଲ ଷ୍ଟ୍ରିଟ ଜର୍ଣ୍ଣାଲର ରିପୋର୍ଟ ମୁତାବକ, ଜାତିସଂଘ ସୁରକ୍ଷା ପରିଷଦ(ୟୁଏନ୍ଏସ୍ସି)ରେ ଏଥିଲାଗି ଏକ ପ୍ରସ୍ତାବ ଆଣିବାକୁ ୟୁଏଇ ଉଦ୍ୟମ କରୁଛି । ସେହି ପ୍ରସ୍ତାବରେ ହୋର୍ମୁଜ ପ୍ରଣାଳୀକୁ ଜବରଦସ୍ତ ଖୋଲିବା ଲାଗି ସମସ୍ତ ଉପାୟର ବ୍ୟବହାର କରିବାକୁ ଅନୁମତି ମଗାଯିବ । ସେଥିରେ ହୋର୍ମୁଜ ସୁରକ୍ଷା ଫୋର୍ସ ବନାଯିବା ନେଇ ମଧ୍ୟ ଗୁରୁତ୍ୱାରୋପ କରାଯିବ ଯାହାକି ଏହି ଗୁରୁତ୍ୱପୂର୍ଣ୍ଣ ଜଳମାର୍ଗରେ ଜାହାଜଗୁଡି଼କୁ ସୁରକ୍ଷା ଦେବ ।
ଅନ୍ୟପଟେ ଆମେରିକା, ୟୁରୋପ ଏବଂ ଏସିଆକୁ ଏକ ମେଣ୍ଟ ବନାଇ ହୋର୍ମୁଜର ସୁରକ୍ଷା କରିବାକୁ ୟୁଏଇ ଆହ୍ୱାନ କରୁଛି । ଏପରିସ୍ଥଳରେ ଯଦି ୟୁଏନ୍ଏସସିରେ ପ୍ରସ୍ତାବକୁ ମଞ୍ଜୁରି ମିଳିଯିବ ତେବେ ବର୍ତ୍ତମାନ କୁନ୍ଥକୁନ୍ଥ ହେଉଥିବା ଏସୀୟ ଏବଂ ୟୁରୋପୀୟ ଦେଶ ମଧ୍ୟ ହୋର୍ମୁଜ ଖୋଲିବାକୁ ସାହାଯ୍ୟ କରିବାକୁ ଆଗେଇ ଆସିପାରନ୍ତି ବୋଲି ଦେଶ ଭାବୁଛି । ତେବେ ଜାତିସଂଘରେ ରୁଷ୍ ଏବଂ ଚୀନ୍ ଏହି ପ୍ରସ୍ତାବ ଉପରେ ଭିଟୋ ପ୍ରୟୋଗ କରିପାରନ୍ତି । ଯଦି ଏହି ପ୍ରସ୍ତାବ ଜାତିସଂଘରେ ପାସ୍ ନ ହୁଏ ତଥାପି ବି ୟୁଏଇ ଇରାନ ବିରୋଧରେ ଆମେରିକାର ସାମରିକ ଅଭିଯାନକୁ ସମର୍ଥନ ଦେବାକୁ ପ୍ରସ୍ତୁତ ଅଛି । ଏହା ଆମେରିକାକୁ ଅବୁ ମୁସା ଦ୍ୱୀପ କବ୍ଜା କରିବାକୁ ପରାମର୍ଶ ବି ଦେଇଛି । ସେହି ଦ୍ୱୀପ ଦୀର୍ଘ ୫ ଦଶନ୍ଧି ହେଲା ଇରାନର ଦଖଲରେ ଥିବାବେଳେ ୟୁଏଇ ତାକୁ ନିଜର ବୋଲି ଦର୍ଶାଇ ଆସୁଛି ।
ସୂଚନା ଥାଉକି, ହୋର୍ମୁଜ ପ୍ରଣାଳୀ ହେଉଛି ଏକ ଗୁରୁତ୍ୱପୂର୍ଣ୍ଣ ସାମୁଦ୍ରିକ ମାର୍ଗ । ଏହି ଜଳମାର୍ଗ ଦେଇ ବିଶ୍ୱର ପ୍ରାୟ ୨୦ ପ୍ରତିଶତ ଅଶୋଧିତ ତେଲ ପରିବହନ ହୋଇଥାଏ । ଇରାନ ଏହାକୁ ବନ୍ଦ କରି ରଖିବା ଯୋଗୁ ବୈଶ୍ୱିକ ଅର୍ଥବ୍ୟବସ୍ଥା ପ୍ରଭାବିତ ହେଉଛି । ୟୁଏଇ ବି ଏଥିଯୋଗୁ ଗୁରୁତର କ୍ଷତିଗ୍ରସ୍ତ ହେଉଛି । କେବଳ ସେତିକି ନୁହେଁ, ଆମେରିକାଇସ୍ରାଏଲର ଆକ୍ରମଣ ପରେ ଜବାବୀ ଆକ୍ରମଣ ସ୍ୱରୂପ ଇରାନ ୟୁଏଇରେ ମିସାଇଲ ଏବଂ ଡ୍ରୋନ୍ ଆକ୍ରମଣକୁ ଜୋରଦାର କରିଛି । ଅଦ୍ୟାବଧି ଦେଶ ଉପରେ ୨୫୦୦ରୁ ଅଧିକ ମିସାଇଲ୍ ଏବଂ ଡ୍ରୋନ୍ ଆକ୍ରମଣ କରାଯାଇଛି । ସେଥିଯୋଗୁ ବିମାନବନ୍ଦର, ଆବାସିକ କୋଠା ଏବଂ ତୈଳ ସୁବିଧା କ୍ଷତିଗ୍ରସ୍ତ ହୋଇଛି । ଏହି କାରଣରୁ କ୍ଷୁବ୍ଧ ହୋଇ ୟୁଏଇ ଇରାନ ଯୁଦ୍ଧରେ ସାମିଲ ହେବାକୁ ବିଚାର କରୁଛି।
