Garvita Odia
ଆଦିଲ୍ଲୀ: ରେପୋ ରେଟ୍ ଅପିରବର୍ତ୍ତିତ । କମିବନି ଇଏମଆଇ । ଭାରତୀୟ ରିଜର୍ଭ ବ୍ୟାଙ୍କ ଜୁନ୍ ୨୦୨୬ ପାଇଁ ଏହାର ମୁଦ୍ରା ନୀତିରେ ରେପୋ ହାରକୁ ଅପରିବର୍ତ୍ତିତ ରଖିଛି । ଆରବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରା ଲଗାତାର ତୃତୀୟ ଥର ପାଇଁ ରେପୋ ହାରକୁ ଅପରିବର୍ତ୍ତିତ ରଖିଛନ୍ତି । ୫.୨୫%ରେ ଅପରିବର୍ତ୍ତିତ ରହିଲା ରେପୋ ରେଟ୍ । ଘରୋଇ ଅଭିବୃଦ୍ଧି ହାର (GDP) ଆକଳନ ୬.୬ ପ୍ରତିଶତକୁ ହ୍ରାସ ହୋଇଛି । ମାନ୍ଦାବସ୍ଥା ନିୟନ୍ତ୍ରଣାଧୀନ ଥିବା ନେଇ ସଞ୍ଜୟ ମଲହୋତ୍ରା ସୂଚନା ଦେଇଛନ୍ତି । ଆରବିଆଇ ଶେଷ ଥର ପାଇଁ ଡିସେମ୍ବର ୨୦୨୫ରେ ସୁଧ ହାରକୁ ହ୍ରାସ କରି ଏହାକୁ ୫.୫ ପ୍ରତିଶତରୁ ୫.୨୫ ପ୍ରତିଶତକୁ ହ୍ରାସ କରିଥିଲା ।
ଆରବିଆଇ ଏମପିସି ମିଟିଂରେ ରେପୋ ହାରକୁ ସ୍ଥିର ରଖିବା ସହିତ, ରିଜର୍ଭ ବ୍ୟାଙ୍କ ଅନ୍ୟାନ୍ୟ ପ୍ରମୁଖ ସୁଧ ହାରକୁ ମଧ୍ୟ ଅପରିବର୍ତ୍ତିତ ରଖିଛି। RBI ଗଭର୍ଣ୍ଣର ସଞ୍ଜୟ ମାଲହୋତ୍ରା କହିଛନ୍ତି ଯେ ସ୍ଥାୟୀ ଜମା ସୁବିଧା (SDF) ହାର ୫%ରେ ରହିବ। ମାର୍ଜିନାଲ୍ ସ୍ଥାୟୀ ସୁବିଧା (MSF) ହାର ଏବଂ ବ୍ୟାଙ୍କ ହାର ମଧ୍ୟ ୫.୫% ରେ ଅପରିବର୍ତ୍ତିତ ରହିଛି । ଏହା ସ୍ପଷ୍ଟ ଭାବରେ ସୂଚାଇ ଦିଏ ଯେ କେନ୍ଦ୍ରୀୟ ବ୍ୟାଙ୍କ ଅନ୍ୟାନ୍ୟ ପ୍ରମୁଖ ମୁଦ୍ରା ନୀତି ହାରରେ କୌଣସି ପରିବର୍ତ୍ତନ କରିନାହିଁ । ଖାଲି ସେତିକି ନୁହେଁ ଦେଶରେ ବଢିବ ଦରଦାମ ବୃଦ୍ଧି । ଯୁଦ୍ଧ ଏବଂ ଏଲ୍ ନିନୋକୁ କାରଣ ବୋଲି ଦର୍ଶାଇଛନ୍ତି ଆରବିଆଇ ଗଭର୍ଣ୍ଣର ।
ଆରବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରା କହିଛନ୍ତି ଯେ, ଗତ କିଛି ମାସ ଧରି ବିଶ୍ୱ ଅର୍ଥନୀତିରେ ଯଥେଷ୍ଟ ଅସ୍ଥିରତା ଦେଖାଦେଇଛି। ପ୍ରମୁଖ ବାଣିଜ୍ୟ ମାର୍ଗ ଏବଂ ଯୋଗାଣ ଶୃଙ୍ଖଳା ବାଧାପ୍ରାପ୍ତ ହୋଇଛି, ବଜାର ଅସ୍ଥିରତା ବୃଦ୍ଧି ପାଇଛି ଏବଂ କମ୍ପାନୀଗୁଡ଼ିକ ସେମାନଙ୍କର କାର୍ଯ୍ୟ ପ୍ରତି ସତର୍କତା ବଢ଼ାଉଛନ୍ତି । ଏହି ବିଶ୍ୱ ଅସ୍ଥିରତା ମଧ୍ୟରେ, ଭାରତୀୟ ଅର୍ଥନୀତିର ମୌଳିକ ତତ୍ତ୍ୱ ଗତ ଥର ଅପେକ୍ଷା ବହୁତ ଶକ୍ତିଶାଳୀ ଏବଂ ଭଲ । ଆମେ ନିଶ୍ଚିତ ଯେ ଆମେ ସର୍ବନିମ୍ନ କ୍ଷତି ସହିତ ଏହି ବାହ୍ୟ ଆଘାତକୁ ମୁକାବିଲା କରିବାକୁ ସମ୍ପୂର୍ଣ୍ଣ ସକ୍ଷମ ।
ମୁଦ୍ରାସ୍ଫୀତି ପୂର୍ବାନୁମାନ- ଆରବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରା ଦ୍ୱିମାସିକ ନୀତି ସମୀକ୍ଷା ବୈଠକ ପରେ କହିଥିଲେ ଯେ ୨୦୨୬-୨୭ ଆର୍ଥିକ ବର୍ଷ ପାଇଁ ସିପିଆଇ ମୁଦ୍ରାସ୍ଫୀତି ହାର ୫.୧% ରହିବ । ହାର ନିର୍ଦ୍ଧାରଣ କମିଟି ମୂଳ ମୁଦ୍ରାସ୍ଫୀତି ପୂର୍ବାନୁମାନକୁ ୪.୭% ବଜାୟ ରଖିବାକୁ ନିଷ୍ପତ୍ତି ନେଇଛି । ମୁଦ୍ରାସ୍ଫୀତି ଚାପ ବର୍ତ୍ତମାନ କମ୍ ଅଛି । ମଧ୍ୟପ୍ରାଚ୍ୟରେ ଚାଲିଥିବା ଉତ୍ତେଜନା ଯୋଗୁଁ, RBI ଏହାର GDP ଅଭିବୃଦ୍ଧି ପୂର୍ବାନୁମାନକୁ ହ୍ରାସ କରିଛି । ଆର୍ଥିକ ବର୍ଷ ପାଇଁ ପୂର୍ବ ଆକଳନ ୬.୯ ପ୍ରତିଶତରୁ ହ୍ରାସ କରାଯାଇଛି । କେନ୍ଦ୍ରୀୟ ବ୍ୟାଙ୍କ ଏବେ ଆଶା କରୁଛି ଯେ, FY27ର ପ୍ରଥମ ତ୍ରୈମାସିକରେ GDP ଅଭିବୃଦ୍ଧି ୬.୬%, ଦ୍ୱିତୀୟ ତ୍ରୈମାସିକରେ ୬.୩%, ତୃତୀୟ ତ୍ରୈମାସିକରେ ୬.୫% ଏବଂ ଚତୁର୍ଥ ତ୍ରୈମାସିକରେ ୬.୮% ରହିବ ।
