ଚିତ୍ରୋପଳାରେ ଭାସିଗଲେ କାଉଡ଼ିଆ

ସାଲେପୁର: ଶ୍ରାବଣ ସୋମବାରରେ ମହାଦେବଙ୍କ ଜଳାଭିଷେକ ପାଇଁ ପାଣି ଉଠାଇବା ବେଳେ ଚିତ୍ରୋପଳା ନଦୀରେ ଭାସିଗଲେ ଯୁବକ । ଯୁବକ ଜଣକ ସାଲେପୁର ଥାନା ଅନ୍ତର୍ଗତ କାସିପୁର ଗାଁର ରବୀନ୍ଦ୍ର କରଙ୍କ ପୁଅ ଆବୃତ୍ତ କୁମାର କର(୨୫ ବର୍ଷ) ବୋଲି ଜଣାପଡ଼ିଛି । ଘଟଣା ସ୍ଥଳରେ ଅଗ୍ନିଶମ ବାହିନୀ ପହଞ୍ଚି ସର୍ଚ୍ଚ ଅପରେସନ ଜାରି ରଖିଛି । ଆଜି ଶ୍ରାବଣ ମାସର ଶେଷ ସୋମବାର । ମହାଦେବଙ୍କ ଜଳାଅଭିଷେକ କରିବା ପାଇଁ ଆଜି ସକାଳୁ ସାଲେପୁର ଥାନା ଅନ୍ତର୍ଗତ କାସିପୁର ଗାଁର ରବୀନ୍ଦ୍ର କରଙ୍କ ପୁଅ ଆବୃତ୍ତ କୁମାର କର ବଟେଶ୍ୱର ଗାଁ ନିକଟରେ ଚିତ୍ରୋପଳା ନଦୀରୁ ପାଣି ଉଠାଇବାକୁ ଯାଇଥିଲେ । ପାଣି ଉଠାଇବା ବେଳେ ନଦୀ ପାଣିରେ ଭାସି ଯାଇ ନିଖୋଜ ହୋଇଯାଇଛନ୍ତି । ସ୍ଥାନୀୟ ଲୋକେ ଓ ସାଲେପୁର ଅଗ୍ନିଶମ ବାହିନୀର କର୍ମଚାରୀମାନେ ଦୀର୍ଘ ସମୟ ଧରି ନଦୀ ପାଣିରେ ଖୋଜାଖୋଜି ଚଳାଇଛନ୍ତି ମଧ୍ୟ ଏପର୍ୟ୍ୟନ୍ତ ଆବୃତ୍ତ କୁମାରର କୌଣସି ପତ୍ତା ମିଳିନାହିଁ ।