Garvita Odia
ଭୁବନେଶ୍ୱର:ଭୁବନେଶ୍ୱର ମହାନଗର ନିଗମ(ବିଏମସି) କମିଶନର ଚଞ୍ଚଳ ରାଣା ବିଭିନ୍ନ ଉପବିଭାଗର କାର୍ୟ୍ୟ ସମୀକ୍ଷା କରିଛନ୍ତି । ଭୁବନେଶ୍ୱର ମହାନଗର ନିଗମ ଅଂଚଳରେ ହେଉଥିବା ବିଭିନ୍ନ ଉନ୍ନୟନ ମୂଳକ କାର୍ୟ୍ୟକୁ କିପରି ଆହୁରି ତ୍ୱରାନ୍ୱିତ କରାଯାଇ ପାରିବ ସେ ସଂପର୍କରେ ଅଧିକାରୀଙ୍କଠାରୁ ଆରମ୍ଭ କରି ତୃଣମୂଳସ୍ତରର କର୍ମଚାରୀଙ୍କ ସହ ଆଲୋଚନା କରିଥିଲେ । ବିଭିନ୍ନ କାର୍ୟ୍ୟ କରିବା ସମୟରେ କେଉଁ କେଉଁ ସମସ୍ୟା ଆସୁଛି ଏବଂ ତାହାର କିପରି ସମାଧାନ କରାଯାଇ ପାରିବ ସେ ସଂପର୍କରେ ଆଲୋଚନା କରିଛନ୍ତି । ବିଏମ୍ ସି ଏକାମ୍ର ହଲରେ ଅନୁଷ୍ଠିତ ଏହି ସମୀକ୍ଷା ବୈଠକରେ ପ୍ରଥମେ ଏନଫୋର୍ସମେଣ୍ଟ ଓ ସାଇନ୍ ଟିମ୍ କାର୍ୟ୍ୟର ସମୀକ୍ଷା କରାଯାଇଥିଲା । ତୃଣମୂଳସ୍ତରରେ କର୍ମଚାରୀମାନେ ସମ୍ମୁଖିନ ହେଉଥିବା ବିଭିନ୍ନ ସମସ୍ୟା ସଂପର୍କରେ କମିଶନରଙ୍କୁ ଅବଗତ କରାଇଥିଲେ । କର୍ମଚାରୀ ଓ ଅଧିକାରୀଠାରୁ ବିଭିନ୍ନ ସମସ୍ୟା ସଂପର୍କରେ ସିଧାସଳଖ ଶୁଣିବା ସହ କାର୍ୟ୍ୟ ଅଗ୍ରଗତି ନିମନ୍ତେ ସେମାନଙ୍କୁ ସମସ୍ତ ପ୍ରକାର ସହାୟତା ଯୋଗାଇ ଦେବାକୁ କହିଛନ୍ତି କମିଶନର । ତେବେ ଜୋରିମାନା ନୁହେଁ, ଲୋକମାନଙ୍କୁ ପରିମଳ, ସ୍ୱଚ୍ଛତା, ଏକକ ବ୍ୟବହାର ପଲିଥିନି, ଜବର ଦଖଲ ଆଦି ସଂପର୍କରେ ସଚେତନ କରାଇବା ଆମର ଉଦ୍ଦେଶ୍ୟ ହେବା ଦରକାର । ଏଥିପାଇଁ ଲୋକମାନଙ୍କ ସହଯୋଗ କାମନା କରିବା ସହ ସେମାନଙ୍କୁ ସଚେତନ କରାଇବା ପାଇଁ ନିର୍ଦେଶ ଦେଇଛନ୍ତି ଶ୍ରୀ ରାଣା । ସେହିପରି ପରିମଳ ଉପବିଭାଗ ଏବଂ ଗଣଯୋଗାଯୋଗ ଉପବିଭାଗର କାର୍ୟ୍ୟକଳାପ ଉପରେ ସମୀକ୍ଷା କରିଥିଲେ । ପରିମଳ ଉପରେ ବିଶେଷ ଭାବେ ସେ ଗୁରୁତ୍ୱାରୋପ କରିଛନ୍ତି । ଭୁବନେଶ୍ୱରକୁ ୧ ନମ୍ବର କରିବା ପାଇଁ ସମସ୍ତେ ଆନ୍ତରିକତାର ସହ ଉଦ୍ୟମ କରିବାକୁ ସେ ପରାମର୍ଶ ଦେଇଛନ୍ତି । ଯେଉଁମାନେ ପରିମଳ କ୍ଷେତ୍ରରେ ଭଲ କାମ କରିବେ, ସେମାନଙ୍କୁ ପୁରସ୍କୃତ କରାଯିବ । ଯେଉଁ ଓ୍ୱାର୍ଡରେ ପରିମଳ ବ୍ୟବସ୍ଥା ନିମ୍ନମାନର ରହିଛି, ସେହିସବୁ ଓ୍ୱାର୍ଡକୁ ଗୁରୁତ୍ୱ ଦେବା ସହ ଏକ ମାସ ମଧ୍ୟରେ ତାର ଚିତ୍ର ଯେପରି ବଦଳିବ, ସେହି ଅନୁପାତରେ କାର୍ୟ୍ୟ କରିବାକୁ ସେ ପରାମର୍ଶ ଦେଇଛନ୍ତି । ବିଏମ୍ ସିର ସାମାଜିକ ଗଣମାଧ୍ୟକୁ ସଶକ୍ତ ଏବଂ ଆହୁରି ସକ୍ରିୟ କରିବା ସହ ଲୋକମାନଙ୍କର ସମସ୍ୟା ଏବଂ ସହଯୋଗ କାମନା କରିଛନ୍ତି କମିଶନର । ଶେଷରେ ଆଇଇସି ଟିମର କାର୍ୟ୍ୟଧାରା ସଂପର୍କରେ ସମୀକ୍ଷା କରିଥିଲେ ଅତିରିକ୍ତ କମିଶନର ଶ୍ରୀ କୈଳାସ ଚନ୍ଦ୍ର ଦାସ ଓ ଡେପୁଟି କମିଶନର ଶ୍ରୀ ଏନ୍. ଗଣେଶ ବାବୁ । ପ୍ରତି ଓ୍ୱାର୍ଡରେ ଲୋକମାନଙ୍କୁ ସଚେତନ କରାଇବା ସହ ସେମାନଙ୍କ ଅଭ୍ୟାସର ପରିବର୍ତ୍ତନ ଆଣିବାକୁ ପରାମର୍ଶ ଦେଇଛନ୍ତି । ବର୍ଜ୍ୟ ଉତ୍ସରୁ ଶତକଡା ଶହେଭାଗ ପୃଥକିକରଣ କରିବା ପାଇଁ ଲୋକମାନଙ୍କୁ ପ୍ରବର୍ତ୍ତାଇବା ସହ ବର୍ଜ୍ୟ ପ୍ରବଣ ସ୍ଥାନ ବା ଜିଭିପି ଅଂଚଳରେ ସ୍ୱତନ୍ତ୍ର ଧ୍ୟାନ ଦେବାକୁ ଶ୍ରୀ ଦାସ ନିର୍ଦେଶ ଦେଇଛନ୍ତି । ଏହି ସମସ୍ତ କାର୍ୟ୍ୟର ସଂଯୋଜନା କରିଥିଲେ ଅତିରିକ୍ତ କମିଶନର ଶ୍ରୀ କୈଳାସ ଚନ୍ଦ୍ର ଦାସ ।
