Garvita Odia
ଦୁବାଇ: ଏସିଆ କପ୍ରେ ଭାରତ ଓ ପାକିସ୍ତାନ ମଧ୍ୟରେ ବହୁ ପ୍ରତୀକ୍ଷିତ ଗ୍ରୁପ୍ ‘ଏ’ ମୁକାବିଲା ମାତ୍ର ୪ଦିନ ପରେ ହେବ। ହେଲେ ଏହି ମ୍ୟାଚ୍ର ଟିକଟ ଏବେ ସୁଦ୍ଧା ସମାପ୍ତ ନ ହେବା କ୍ରିକେଟ୍ ବିଶେଜ୍ଞଙ୍କୁ ଚକିତ କରିଛି। ରବିବାର ଦୁବାଇରେ ଏହି ମ୍ୟାଚ୍ ଖେଳାଯିବ। ଏହି ହାଇ ଭୋଲ୍ଟେଜ ମ୍ୟାଚ୍ ପାଇଁ କିଛି ସ୍ବତନ୍ତ୍ର ପ୍ରକାରର ଟିକଟ ରହିଛି। ସର୍ବାଧିକ ମୂଲ୍ୟର ୨ଟି ଟିକଟ ଜଣେ କିଣିପାରିବେ। ଗୋଟିଏ ଟିକଟ ଦିଆ ଯିବନାହିଁ। ଏହି ୨ଟି ଟିକଟ ପାଇଁ ଭାରତୀୟ ମୁଦ୍ରାରେ ୨,୫୭,୮୧୫ ଟଙ୍କା ଦେବାକୁ ପଡ଼ିବ। ଏହି ଟିକଟଧାରୀ ଦୁଇ ବ୍ୟକ୍ତିଙ୍କୁ ସ୍ବତନ୍ତ୍ର ପ୍ୟାକେଜ୍ ମିଳିବ। ଦୁହେଁ ସ୍ବତନ୍ତ୍ର ଫାଟକରେ ଷ୍ଟାଡିୟମ୍ରେ ପ୍ରବେଶ କରିବାର ସୁବିଧା ପାଇବେ ଏବଂ ଭିଆଇପିଙ୍କ ପାର୍କିଂ ସ୍ଥଳରେ ଗାଡ଼ି ରଖିବାକୁ ପାସ୍ ମିଳିବ।
ସେମାନେ ଶୀତତାପ ନିୟନ୍ତ୍ରିତ ଭିଆଇପି ସୁଟ୍ରେ ଆରାମ ଦାୟକ ୨ଟି ସୋଫାରେ ବସିବେ। ସେମାନଙ୍କ ପାଇଁ ଅସୀମିିତ ଖାଦ୍ୟ ଓ ସମସ୍ତ ପ୍ରକାର ପାନୀୟର ବ୍ୟବସ୍ଥା ରହିବ। ସେମାନେ ଭିଆଇପି କ୍ଲବ୍/ଲାଉଞ୍ଜ୍କୁ ଯାଇପାରିବେ। ଯଦି ସେମାନେ ବିଶ୍ରାମ ନେବାକୁ ଚାହିଁବେ; ସେମାନଙ୍କ ପାଇଁ ସ୍ବତନ୍ତ୍ର କୋଠରୀ ପ୍ରସ୍ତୁତ ହୋଇ ରହିବ। ଏହାକୁ ଛାଡ଼ି ରୟାଲ ବକ୍ସର ଟିକଟ ରହିଛି। ଏହାର ୨ଟି ଟିକଟ ପାଇଁ ୨,୩୦,୭୦୦ ଟଙ୍କା ଏବଂ ସ୍କାଏ ବକ୍ସ ଇଷ୍ଟ ଶ୍ରେଣୀର ୨ଟି ଟିକଟ ପାଇଁ ୧,୬୭,୮୫୧ ଟଙ୍କା ଦେବାକୁ ପଡ଼ିବ। ମଧ୍ୟମ ଶ୍ରେଣୀର ଟିକଟର ମୂଲ୍ୟ ମଧ୍ୟ ବହୁତ ଅଧିକ ରହିଛି। ପ୍ଲାଟିନମ୍ ବକ୍ସରେ ୨ଟି ଟିକଟର ମୂଲ୍ୟ ୭୫,୬୫୯ ଟଙ୍କା, ଗ୍ରାଣ୍ଡ ଲାଉଞ୍ଜ୍ ଟିକଟର ମୂଲ୍ୟ ୪୧,୧୫୩ ଟଙ୍କା, ୱେଷ୍ଟ ପାଭିଲିଅନ୍ର ମୁଲ୍ୟ ୨୮,୧୭୪ ଟଙ୍କା ରଖାଯାଇଛି। ଶସ୍ତା ବର୍ଗର ଜେନେରାଲ ଇଷ୍ଟ ଷ୍ଟାଣ୍ଡ୍ର ୨ଟି ଟିକର ମୂଲ୍ୟ ୧୦,୦୦୦ ଟଙ୍କା ରଖାଯାଇଛି। ପୂର୍ବରୁ ଭାରତ-ପାକିସ୍ତାନ ମ୍ୟାଚ୍ରେ ଦୁବାଇରେ ଟିକଟର ମୂଲ୍ୟ ପ୍ରାୟ ଏହା ରହିଥିଲା। ହେଲେ ଏଥର କିଛି ଟିକଟ ଏବେ ମଧ୍ୟ ବାକି ଅଛି।
