Garvita Odiaଶୀତଦିନରେ ରୁପି ସମସ୍ୟାଟି ପ୍ରାୟତଃ ସମସ୍ତଙ୍କ ପାଖରେ ଦେଖାଯାଏ । କିନ୍ତୁ କିଛି ଲୋକଙ୍କ କ୍ଷେତ୍ରରେ ରୁପି ସମସ୍ୟା ଏତେ ଅଧିକ ଦେଖାଯାଏ ଯେ ବାହାରକୁ ଯିବାକୁ ମଧ୍ୟ ଖରାପ ଲାଗେ । ସ୍ଥାନ,କାଳ,ପାତ୍ର କିଛି ନଦେଖି ମୁଣ୍ଡ କୁଣ୍ଡାଇ ହେବ ଏବଂ ଖୋଳପା ଭଳି ଧଳା ଧଳା ଗୁଣ୍ଡ ପିନ୍ଧିଥିବା ସାର୍ଟରେ ପଡ଼ିଥିବ । କଳାରଙ୍ଗର ପୋଷାକ ପିନ୍ଧିଥିଲେ ତ କଥା ସରିଲା । ଲୋକଲଜ୍ଜା ହେବାଟା ପକ୍କା। ସ୍କାଲ୍ଫରେ ହେଉଥିବା ରୁପି ଫଙ୍ଗସ୍ କାରଣରୁ ହୋଇଥାଏ ଯାହା ଡେଡ୍ ସ୍କିନ୍ ସେଲ୍ସ୍ ଯୋଗୁଁ ବଢିଥାଏ। ରୁପିର ଆକାର ଗୁଣ୍ଡ ଏବଂ ଖୋଳପା ଭଳି ହୋଇଥାଏ ଯାହା କୁଣ୍ଡାଇବା ଦ୍ବାରା ବାହାରେ ନାହିଁ । ଏଭଳି ସ୍ଥିତିରେ ଡାକ୍ତରଙ୍କ ପରାମର୍ଶ ନେଇ ତେଲ , ସାମ୍ପୁ କିମ୍ବା ଔଷଧର ତ ବ୍ୟବହାର କରିପାରିବେ । କିନ୍ତୁ ଯଦି ଘରୋଇ ଉପାୟରେ ଏ ସମସ୍ୟାରୁ କିଞ୍ଚିତ ଉପସମ ପାଇବାକୁ ଚାହାଁନ୍ତି ତାହେଲେ ତଳେ ଦିଆଯାଇଥିବା ଉପାୟ ଆପଣାନ୍ତୁ । ଶୀତଦିନରେ ରୁପି ସମସ୍ୟାରୁ ମୁକ୍ତି ପାଆନ୍ତୁ ।
. ୨ ଚାମଚ ନଡିଆ ତେଲରେ ସମାନ ଭାବେ ଲେମ୍ବୁ ମିଶାଇ ଗୋଳାଇ ଦିଅନ୍ତୁ । ଏହି ମିଶ୍ରଣକୁ ମୁଣ୍ଡରେ ଲଗାଇ ୨୦ ମିନିଟ୍ ଛାଡ଼ିଦିଅନ୍ତୁ । ପରେ ଚୁଟି ଧୋଇଦିଅନ୍ତୁ ।
. ଦହିକୁ ରୁପି ପାଇଁ ରାମବାଣ ଔଷଧ ବୋଲି କୁହାଯାଏ । ଯଦି ଆପଣଙ୍କ ଦେହକୁ ଥଣ୍ଡା ସୁହାଉଥିବ ତାହେଲେ ଚୁଟି ମୂଳରୁ ଆରମ୍ଭ କରି ସଂପୂର୍ଣ୍ଣ କେଶରେ ଦହି ଲଗାଇଦିଅନ୍ତୁ ଏବଂ ଘଣ୍ଟାଏ ପାଇଁ ଛାଡ଼ିଦିଅନ୍ତୁ । ଏହାପରେ ଚୁଟି ସଫା କରିନିଅନ୍ତୁ ।
. ରୁପି ସମସ୍ୟା ଦୂର କରିବା ପାଇଁ ନିମ୍ବରସକୁ ଆପଣାଇପାରନ୍ତି । ଏଥିପାଇଁ ନିମ୍ବପତ୍ରକୁ ବାଟି ଏହା ରସ ବାହାର କରି ୧୦ ରୁ ୧୫ ମିନିଟ୍ କେଶରେ ଲଗାଇ ଛାଡ଼ିଦିଅନ୍ତୁ ଏବଂ ଥଣ୍ଡାପାଣିରେ ମୁଣ୍ଡ ଧୋଇନିଅନ୍ତୁ , ରୁପି ଚାଲିଯିବେ ।
. କମଳା ଚୋପା ରୁପି ଉପରେ ଭଲ ପ୍ରଭାବ ଦେଖାଇଥାଏ । କମଳା ଚୋପାକୁ ବାଟି ଲେମ୍ବୁ ରସ ମିଶାଇ ଏକ ପେଷ୍ଟ୍ ତିଆରି କରନ୍ତୁ ଏବଂ ଅଧଘଣ୍ଟା ମୁଣ୍ଡରେ ଲଗାଇ ଧୋଇନିଅନ୍ତୁ ।
. ଗ୍ରୀନ୍ ଟି ମଧ୍ୟ ରୁପି ସମସ୍ୟାକୁ କମାଇବାରେ ସହାୟକ ହୋଇଥାଏ । ୨ ଟି ଗ୍ରୀନ୍ ଟି ବ୍ୟାଗକୁ ଗରମ ପାଣିରେ ପକାଇ ଥଣ୍ଡା କରିନିଅନ୍ତୁ ଏବଂ ଏହି ପାଣିକୁ କିଛି ସମୟ ସ୍କାଲ୍ଫରେ ଲଗାଇରଖନ୍ତୁ ।
. ଗୋଟିଏ କଦଳୀରେ ୨ କପ୍ ଆପଲ୍ ସାଇଡର ଭିନେଗାର୍ ଗୋଳାଇ ନିଅନ୍ତୁ । ଏହି ପେଷ୍ଟକୁ ଚୁଟିରେ ୨୦ ମିନିଟ୍ ଲଗାଇ ରଖନ୍ତୁ ପରେ ଧୋଇନିଅନ୍ତୁ ।
. ରସୁଣକୁ ବାଟି ଏଥିରେ ମହୁ ମିଶାଇ ଦିଅନ୍ତୁ । ଏହି ପେଷ୍ଟକୁ ସ୍କାଲ୍ଫରେ ୧୫ ମିନିଟ୍ ଲଗାଇ ଛାଡ଼ି ଦିଅନ୍ତୁ । ରୁପି ସମସ୍ୟା ଦୂର ହୋଇଯିବ ।
. ଅଣ୍ଡାର ଧଳା ଅଂଶକୁ ବାହାର କରି ଚୁଟିରେ ଅଧଘଣ୍ଟା ପାଇଁ ଲଗାଇ ଛାଡ଼ିଦିଅନ୍ତୁ ଏବଂ ଭଲରେ ମୁଣ୍ଡକୁ ଧୁଅନ୍ତୁ । ଏଥିରେ ରୁପି ସମସ୍ୟା ତ ଦୂର ହେବ କିନ୍ତୁ ଭଲରେ ନ ଧୋଇଲେ ଦୁର୍ଗନ୍ଧ ବାହାରିବାର ମଧ୍ୟ ସମ୍ଭାବନା ଅଛି ।
. ରୁପି ସମସ୍ୟା ରୋକିବା ପାଇଁ ମେଥି ଏକ ଭଲ ଉପାୟ ହୋଇପାରେ । ରାତିସାରା ମେଥିକୁ ପାଣି ଭିଜାଇ ରଖନ୍ତୁ । ସକାଳୁ ଏହି ଭିଜା ମେଥିକୁ ବାଟି ମୁଣ୍ଡରେ ପେଷ୍ଟ୍ କରି ଲଗାନ୍ତୁ । ଏଥିରେ ଲେମ୍ବୁ ଚିପୁଡ଼ି ଅଧଘଣ୍ଟା ମୁଣ୍ଡରେ ଲଗାଇ ରଖନ୍ତୁ ଏବଂ ଚୁଟି ସଫା କରୁନ୍ତୁ ରୁପି ସମସ୍ୟା ଦୂର ହେବ ।
