ତେଜିବ ବିଜୁ ଲିଗାସୀ ରାଜନୀତି

ଭୁବନେଶ୍ୱର: ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ନାଁକୁ ନେଇ ରାଜ୍ୟ ରାଜନୀତିରେ ଆଉ ଏକ ନୂଆ ସମୀକରଣ ପ୍ରସ୍ତୁତି ଚାଲିଛି । ଆସନ୍ତା ୧୭ ତାରିଖ ବିଜୁବାବୁଙ୍କ ଶ୍ରାଦ୍ଧ ଦିବସ । ଏହି ଅବସରରେ ସାମ୍ନାକୁ ଆସିବ ରାଜ୍ୟ ରାଜନୀତିର ନୂଆ ସମୀକରଣ । ତେଜିବ ବିଜୁ ଲିଗାସୀ ରାଜନୀତି । ଗୋଟିଏ ପଟେ ବିଜେଡି ବିଜୁବାବୁଙ୍କ ଶ୍ରାଦ୍ଧ ଦିବସ ପାଳନ ପାଇଁ ପ୍ରସ୍ତୁତି ଜୋରଦାର କରିଛି । ଅନ୍ୟପଟେ ବିଜେଡିରୁ ଦୂରେଇ ଯାଇଥିବା ବିଜୁ ଲିଗାସୀ ନେତାଏ ପୃଥକ ଭାବେ ବିଜୁଙ୍କୁ ମନେପକାଇବେ । ରାଜଧାନୀରେ ଏକ ବଡ଼ ଧରଣର ସଭା କରିବାକୁ ପ୍ରସ୍ତୁତି ଚାଲିଛି ।
ସୂତ୍ର ଅନୁସାରେ ବିଜୁଙ୍କ ନାଁ ନେଇ ଗୋଟିଏ ମଞ୍ଚ ଗଠନ ହେବାକୁ ଯାଉଛି । ରାଜ୍ୟସଭା ସାଂସଦ ଦିଲ୍ଲୀପ ରାୟ, ବରିଷ୍ଠ ନେତା ବିଜୟ ମହାପାତ୍ର, ପ୍ରଭାତ ତ୍ରିପାଠୀ, ଅମର ଶତପଥୀ, ପ୍ରଫୁଲ୍ଲ ମଲ୍ଲିକ, ପ୍ରଭାତ ବିଶ୍ୱାଳଙ୍କ ସମେତ ଅନେକ ବଡ଼ ନେତା ବିଜୁଙ୍କ ପାଇଁ ଏକାଠି ଗୋଟିଏ ମଞ୍ଚ ତଳେ ଯୋଗ ଦେଇପାରନ୍ତି । ବିଜେଡିରୁ ନିଲମ୍ବିତ ହୋଇଥିବା ବିଧାୟକମାନେ ମଧ୍ୟ ଏଥିରେ ସାମିଲ ହେବା ସମ୍ଭାବନା ଅଛି । ରାଜ୍ୟର ବିଭିନ୍ନ କୋଣରୁ ବିଜୁ ପ୍ରେମୀ, ଛାତ୍ର ଓ ଯୁବ ସଂଗଠକଙ୍କୁ ଏଥିରେ ସାମିଲ କରାଯିବ । ବିଜୁଙ୍କ ଶ୍ରାଦ୍ଧ ଦିବସରେ ଏକ ବିଶାଳ ସଭା ଆୟୋଜନ ହେବ । ଏହି ମଞ୍ଚରୁ ବିଜେଡିକୁ ଟାର୍ଗେଟ କରାଯିବ ବୋଲି ଜଣାପଡ଼ିଛି । ଛାତ୍ର ଓ ଯୁବ କର୍ମକର୍ତ୍ତାଙ୍କୁ ଏକାଠି କରିବା ଦାୟିତ୍ୱ ବାଙ୍କୀ ବିଧାୟକ ଦେବୀ ତ୍ରିପାଠୀ ନେଇଥିବା ସୂଚନା ମିଳିଛି ।
ଏ ସମ୍ପର୍କରେ ବରିଷ୍ଠ ନେତା ଅମର ଶତପଥୀ କିଛି ସଙ୍କେତ ଦେଇଛନ୍ତି । ସେ କହିଛନ୍ତି, ଆଗକୁ ଅନେକ କିଛି ଘଟିବାକୁ ଯାଉଛି । ବିଜୁଙ୍କ ବିଚାରଧାରାରେ ବିଶ୍ୱାସ କରୁଥିବା ବିଜୁ ପ୍ରେମୀ ଏକାଠି ହେବେ । ଗତ କିଛି ବର୍ଷ ଧରି ବିଜୁବାବୁଙ୍କୁ ନାଁ ଓ ଫଟୋକୁ ବାଦ୍ ଦେବାକୁ ବିଭିନ୍ନ ସମୟରେ ଅପଚେଷ୍ଟା କରାଯାଇଛି । ଆଜି ବି ବିଜୁଙ୍କ ନାଁ ବ୍ୟବହାର କରାଯାଉଛି, କିନ୍ତୁ ତାଙ୍କ ଲିଗାସୀକୁ ଆଗକୁ ନେବାକୁ ଚାହୁଁନାହାନ୍ତି । ବିଜେଡିରୁ ବିଜୁ ପ୍ରେମୀ ଦୂରେଇ ଯାଉଛନ୍ତି । ବିଜେଡି ଭୁବନେଶ୍ୱର ଜିଲ୍ଲା ସଭାପତି ଅଶୋକ ପଣ୍ଡା କହିଛନ୍ତି, ଯିଏ ଯେଉଁ ସାମ୍ମୁଖ୍ୟ ଗଢ଼ିଲେ କିଛି ଫରକ ନାହିଁ । ବିଜେଡି ବିଜୁବାବୁଙ୍କ ଆଦର୍ଶରେ ତା’ର କାମ ଓ ସେବା ଜାରି ରଖିଛି, ରଖିବ।