ମହୁମାଛି ଆକ୍ରମଣ: ଜଣେ ଶିକ୍ଷକ ଓ ଦୁଇ ଶିକ୍ଷୟିତ୍ରୀ ଗୁରୁତର

ନୀଳଗିରି : ସ୍କୁଲ ଖୋଲୁ ଖୋଲୁ ହଠାତ ଆକ୍ରମଣ କଲେ ମହୁମାଛି। ଜୀବନ ବଞ୍ଚାଇବାକୁ ପୋଖରୀ ଭିତରେ ପଶିଗଲେ ଶିକ୍ଷକ। ଆଜି ସକାଳୁ ବାଲେଶ୍ୱର ଜିଲ୍ଲା ନୀଳଗିରି ସରସ୍ୱତୀ ଶିଶୁ ବିଦ୍ୟାମନ୍ଦିରରେ ଘଟିଛି ଏଭଳି ଅଭାବନୀୟ ଘଟଣା। ମହୁମାଛି ଆକ୍ରମଣ ଘଟଣାରେ ଜଣେ ଶିକ୍ଷକ ଓ ଦୁଇ ଶିକ୍ଷୟିତ୍ରୀ ଗୁରୁତର ହୋଇଛନ୍ତି।
ନୀଳଗିରି ସରସ୍ୱତୀ ଶିଶୁ ବିଦ୍ୟାମନ୍ଦିରରେ ପରିସରରେ ଏକ ମହୁମାଛି ଫେଣା ଦୀର୍ଘ ଦିନ ହେବ ରହିଥିଲା। ଆଜି ସକାଳେ ୩ ଶିକ୍ଷକଶିକ୍ଷୟିତ୍ରୀ ସ୍କୁଲ ଗେଟ୍ ଖୋଲୁଖୋଲୁ ହଠାତ୍ ଶହ ଶହ ମହୁମାଛି ସେମାନଙ୍କ ଆଡ଼କୁ ମାଡ଼ି ଆସିଲେ। ମହୁମାଛି ଆକ୍ରମଣରୁ ବର୍ତ୍ତିବା ପାଇଁ ସେମାନେ ଦୌଡ଼ିବାକୁ ଲାଗିଲେ। ଜୀବନ ବିକଳରେ ଶିକ୍ଷକଜଣକ ପାଣିରେ ପଶିଗଲେ ମଧ୍ୟ ସେ ମହୁମାଛିଙ୍କ ଆକ୍ରମଣରୁ ବର୍ତ୍ତି ପାରି ନ ଥିଲେ।

ଏହାଦେଖି ଗ୍ରାମବାସୀ ମହୁମାଛିଙ୍କୁ ଘଉଡ଼ାଇବା ସହ ଶିକ୍ଷକ, ଶିକ୍ଷୟିତ୍ରୀଙ୍କୁ ତୁରନ୍ତ ଉଦ୍ଧାର କରି ନୀଳଗିରି ହସ୍ପିଟାଲରେ ଭର୍ତ୍ତି କରିଛନ୍ତି। ସେମାନଙ୍କ ଅବସ୍ଥା ଗୁରୁତର ଥିବା ଜଣାଯାଇଛି। ଏପରି କାଣ୍ଡ ପରେ ପିଲାମାନଙ୍କୁ ସ୍କୁଲ ଆସିବାକୁ ବାରଣ କରାଯାଇଥିଲା। ମହୁମାଛି ଫେଣା ସମ୍ପର୍କରେ ଅଗ୍ନିଶମ ବିଭାଗକୁ ଖବର ଦିଆଯାଇଛି। ସେମାନେ ସନ୍ଧ୍ୟା ସୁଦ୍ଧା ଏହାର ପ୍ରତିକାର ବ୍ୟବସ୍ଥା କରିବେ । ଏହାପରେ ପିଲାମାନଙ୍କ ସ୍କୁଲ ଆସିବା ସ୍ବାଭାବିକ ହେବ ବୋଲି କହିଛନ୍ତି ସ୍କୁଲର ଜଣେ ଶିକ୍ଷକ।