ବଙ୍ଗରେ ପୁଣି ପଡ଼ିବ ଭୋଟ୍

ନୂଆଦିଲ୍ଲୀ: ପଶ୍ଚିମବଙ୍ଗ ଫାଲଟା ନିର୍ବାଚନ ମଣ୍ଡଳୀରେ ପୁଣି ହେବ ମତଦାନ। ଫାଲଟାର ସମସ୍ତ ୨୮୫ ବୁଥରେ ପୁଣି ପଡ଼ିବ ଭୋଟ୍। ଆସନ୍ତା ୨୧ ତାରିଖରେ ପୁନଃ ମତଦାନ କରିବାକୁ ନିର୍ବାଚନ କମିଶନ ନିର୍ଦ୍ଦେଶ ଦେଇଛନ୍ତି। ସେଦିନ ସକାଳ ୭ଟାରୁ ସନ୍ଧ୍ୟା ୬ଟା ଯାଏଁ ଭୋଟିଂ ଅନୁଷ୍ଠିତ ହେବ। ମେ ୨୪ ତାରିଖରେ ଗଣତି ସହ ଫଳାଫଳ ଘୋଷଣା ହେବ। ବିଧାନସଭା ନିର୍ବାଚନର ଦ୍ବିତୀୟ ପର୍ୟ୍ୟାୟରେ ଫାଲଟାରେ ପଡିଥିଲା ଭୋଟ୍। ତେବେ ଏଥିରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ହୋଇଥିଲା। ଇଭିଏମରେ ବିଜେପି ପ୍ରାର୍ଥୀଙ୍କ ନାଁ ଏବଂ ଫଟୋରେ ହ୍ବାଇଟ୍ ଟ୍ୟାପ ଲଗାଯାଇ ଘୋଡା ଯାଇଥିବା ଦେଖିବାକୁ ମିଳିଥିଲା।
ଏହା ଉପରେ ବିଚାର କରି ନିର୍ବାଚନ କମିଶନ ପଶ୍ଚିମବଙ୍ଗ ମୁଖ୍ୟ ନିର୍ବାଚନ ଅଧିକାରୀଙ୍କୁ ରିପୋର୍ଟ ମାଗିଥିଲେ। ଫାଲଟାରେ ଟିଏମସି ପ୍ରାର୍ଥୀ ଜାହାଙ୍ଗୀର ଖାନ୍ ଙ୍କ ସହଯୋଗୀ ଭୋଟରଙ୍କୁ ଭୟଭୀତ କରିଥିବା ଅଭିଯୋଗ ହୋଇଥିଲା। ବିଜେପିକୁ ଭୋଟ ଦେଲେ ପରିଣାମ ଭୟଙ୍କର ହେବ ବୋଲି ଗ୍ରାମବାସୀଙ୍କୁ କହିଥିଲେ ଟିଏମସି କର୍ମୀ। ଏ ନେଇ ଅଭିଯୋଗ ପରେ ସଂପକ୍ତ ସହଯୋଗୀଙ୍କ ବିରୋଧରେ ଏଫଆଇଆର୍ ରୁଜୁ କରିବାକୁ ଡାଏମଣ୍ଡ ହାର୍ବର ଡିଷ୍ଟ୍ରିକ୍ଟ ପୋଲିସକୁ ନିର୍ଦ୍ଦେଶ ଦେଇଥିଲେ ନିର୍ବାଚନ କମିଶନ।