Garvita Odia
ନୂଆଦିଲ୍ଲୀ; ଆମେରିକା ଓ ଇରାନ ମଧ୍ୟରେ ଯୁଦ୍ଧବିରତି ଜାରି ରହିଥିବା ସତ୍ତେ୍ୱ ହୋର୍ମୁଜ ପ୍ରଣାଳୀ ସ୍ୱାଭାବିକ ହୋଇପାରୁ ନାହିଁ । ଏହା ଯୋଗୁ ବିଶ୍ୱ ବ୍ୟାପୀ ତୈଳ ଓ ଗ୍ୟାସ ସଙ୍କଟ ଘନେଇବାରେ ଲାଗିଛି । ବିଭିନ୍ନ ଦେଶର ଅର୍ଥ ବ୍ୟବସ୍ଥା ଉପରେ ଏହା ଗୁରୁତର ପ୍ରଭାବ ପକାଉଛି । ଏଭଳି ସ୍ଥିତିରେ ଆମେରିକା ଓ ଇରାନ ନିଜ ଜିଦ୍ ଅଟଳ ରହି ପୁଣି ଯୁଦ୍ଧମୁହାଁ ହେଉଛନ୍ତି ।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଶନିବାର ପୁଣି ଇରାନକୁ ଧମକ ଦେଇ ଡିଲ୍ ନ କଲେ ଧ୍ୱଂସ କରିଦେବୁ ବୋଲି କହିଛନ୍ତି । ଟ୍ରମ୍ପ୍ କହିଛନ୍ତି, ଇରାନ ପାଖରେ ବର୍ତ୍ତମାନ ଦୁଇଟି ବିକଳ୍ପ ରହିଛି । ଏହା ଉଚିତ ଢଙ୍ଗରେ ଆଲୋଚନା କରି ଚୂଡ଼ାନ୍ତ ବୁଝାମଣା କରୁ । ନଚେତ୍ ତେହରାନ ବିରୋଧରେ ଆମେରିକା ଏକ ପୂର୍ଣ୍ଣାଙ୍ଗ ସାମରିକ କାର୍ଯ୍ୟାନୁଷ୍ଠାନ ଆରମ୍ଭ କରିଦେବ । ଏହି କାର୍ଯ୍ୟାନୁଷ୍ଠାନ ପ୍ରଚଣ୍ଡ ହେବ ଏବଂ ଇରାନକୁ ଧ୍ୱଂସ କରିଦେବ । ତେବେ ମାନବିକତା ଦୃଷ୍ଟିକୋଣରୁ ଆମେ ଆଉ ଯୁଦ୍ଧ ଚାହୁଁନାହୁଁ । କିନ୍ତୁ ଆମ ପାଖରେ ବିକଳ୍ପ ରହିଛି । ସେମାନେ ଯଦିଓ ବୁଝାମଣା ଚାହୁଁଛନ୍ତି, କିନ୍ତୁ ଆମେରିକା ପାଇଁ ସେମାନଙ୍କ ପ୍ରସ୍ତାବ ସନ୍ତୋଷଜନକ ହେଉନାହିଁ । ଇରାନର ନେତୃତ୍ୱ ମଧ୍ୟରେ ଆଭ୍ୟନ୍ତରୀଣ କନ୍ଦଳ ରହିଛି ।
ବୁଝାମଣା ପ୍ରକ୍ରିୟାକୁ ନେଇ ସେମାନଙ୍କ ମଧ୍ୟରେ ଏକତାର ଅଭାବ ଦେଖାଦେଇଛି । ସେମାନେ ସମ୍ଭବତଃ ଦୁଇ କିମ୍ବା ତିନୋଟି ଗୋଷ୍ଠୀରେ ବିଭକ୍ତ ହୋଇଥିବା ଟ୍ରମ୍ପ୍ କହିଛନ୍ତି । ଟ୍ରମ୍ପ୍ଙ୍କ ଏଭଳି ଧମକ ପରେ ଇରାନର ପ୍ରତିକ୍ରିୟା ସାମ୍ନାକୁ ଆସିଛି । ଇରାନର ବରିଷ୍ଠ ସାମରିକ ଅଧିକାରୀ ମହମ୍ମଦ ଜାଫର ଅସଦୀ ଆମେରିକା ସହିତ ପୁନର୍ବାର ଯୁଦ୍ଧ ହେବା ନେଇ ଆଶଙ୍କା ପ୍ରକାଶ କରିଛନ୍ତି । ଏକ ସାକ୍ଷାତକାରରେ ସେ କହିଛନ୍ତି, ଇରାନର ସେନା ସମ୍ପୂର୍ଣ୍ଣ ଭାବେ ପ୍ରସ୍ତୁତ ଅଛି । ଆମେରିକାର ଯେ କୌଣସି ପ୍ରକାର ଭୁଲ ହରକତର ଜୋରଦାର ଜବାବ ଦିଆଯିବ । ଯୁଦ୍ଧ ବନ୍ଦ କିମ୍ବା ହୋର୍ମୁଜ ପ୍ରଣାଳୀ ଖୋଲିବା ନେଇ ଯାହା ବି ପ୍ରସ୍ତାବ ଦିଆଯାଉଛି ଆମେରିକା ତାହାକୁ ଜାଣିଶୁଣି ଅଗ୍ରାହ୍ୟ କରିଦେଉଛି ।
ଏମିତି କି କୌଣସି ବୁଝାମଣାକୁ ବି ଏହା ପାଳନ କରୁନାହିଁ । ଅସଦୀ ଆହୁରି କହିଛନ୍ତି, ଆମେରିକୀୟ ଅଧିକାରୀଙ୍କ ବୟାନ ଏବଂ ପଦକ୍ଷେପ ସବୁ ଦେଖାଣିଆ । ତାହା ସବୁ ଗଣମାଧ୍ୟମ ଆଗରେ ସୀମିତ । ତୈଳ ଦର ହ୍ରାସକୁ ରୋକିବା ସେମାନଙ୍କର ପ୍ରଥମ ଉଦ୍ଦେଶ୍ୟ । ଦ୍ୱିତୀୟ ଆମେରିକା ନିଜେ ଯେଉଁ ମୁସ୍କିଲ ପରିସ୍ଥିତି ସୃଷ୍ଟି କରିଛି, ସେଥିରୁ ବାହାରିବାକୁ ଚାହୁଁଛି । କିନ୍ତୁ ଆମେରିକାର କୌଣସି ଚାଲ୍କୁ ଆମେ ସଫଳ କରାଇ ଦେବୁନାହୁଁ । ଆମେ ନିଜ ପରମାଣୁ କାର୍ଯ୍ୟକ୍ରମ ଜାରି ରଖିବୁ ।
